ޕާކިން ޖޫރިމަނާތައް މަޢާފްކޮށްދެއްވުމަށް މުޢިއްޒު ވަޢުދުވެވަޑައިގެންފި

ޤަވާއިދާއި ޚިލާފަށް ކޮށްފައިވާ ޕާކިން ޖޫރިމަނާ މަޢާފުކޮށްދެއްވާނެމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދުވެއްޖެއެވެ. މުޢިއްޒު މިހެން ވިދާޅުވީ ކެމްޕެއިންގައި ށ.އަތޮޅަށް ކުރައްވާ ދަތުރުގައި، ފުނަދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

މުއިއްޒު ވިދާޅުވީ މި ސަރުކާރު އައީ ޕާކު ކުރާނެ ޖާގަ ނުދައްކާ، ޖޫރިމަނާ ސްޓިކަރ ނުޖަހާނެކަމަށް ވަޢުދުވަމުންކަމަށެވެ. ނަމަވެސް ޕާކިން ޖޫރިމަނާގެ ގޮތުގައި ދަޢުލަތަށް އާއްމުން މިހާރުވެސް އެތަށް ފައިސާއެއް ދައްކަންޖެހިފައިވާކަން ފާހަގަކުރައްވަމުން މުޢިއްޒު ވަނީ މިއީ ސަރުކާރުން ފައިސާ ހޯދުމަށް ބޭނުންކުރާ ވަސީލަތެއްގޮތަށް ސިފަކުރައްވާފައެވެ.

ޑރ.މުޢިއްޒު ވިދާޅުވީ، ސިޓީ ކައުންސިލުން މާލޭގައި ޕާކިން މައްސަލަ ޙައްލުކުރުމަށް މަސައްކަތްތަކެއް ރޭވިނަމަވެސް، އެކަމަށްވެސް ހުރަހަކަށް ވަނީ ސަރުކާރުކަމަށެވެ.

އެހެންކަމުން އަންނަ ދަޢުރަށް އިންތިޚާބުވެވަޑައިގެންފިނަމަ، ޤަވާއިދާ ޚިލާފު ޕާކުކޮށްގެން ކޮށްފައިވާ ހުރިހާ ޖޫރިމަމާ މަޢާފުކޮށްދެއްވާނެކަމަށް މުޢިއްޒު ވަޢޫދުވެވަޑައިގެންނެވިއެވެ.

"ބޮޑެތި ޢަދަދުތަކުން މީހުން ޖޫރިމަނާކޮށްފަ އެބަހުރި. މިއީ ޙައްލު ހޯދޭނެ މައްސަލައެއް. އެގޮތަށް އެކަން ނުކޮށް ޖޫރިމަނާކުރަނީ." މުޢިއްޒު ވިދާޅުވިއެވެ.

މުޢިއްޒުވަނީ ވެރިކަން ލިބިވަޑައިގެންފިނަމަ މާލޭގެ ޕާކިން މައްސަލަވެސް ޙައްލުކޮށްދެއްވާނެކަމަށް ވިދާޅުވެފައެވެ. އެގޮތުން ޕާކިން ބިލްޑިންގްތަކާއި އިތުރު ޒޯންތައް ހަދާނެކަމަށް މުޢިއްޒު ވިދާޅުވިއެވެ. އަދި ގަރާޖު ސިޓީއަށް ސަލާންޖެހުން ނިމުމަކަށް ގެންނަވާނެކަމަށްވެސް މުޢިއްޒު ވިދާޅުވިއެވެ.

މުޢިއްޒުވަނީ ށ. އަދި ނ.އަތޮޅަށް ކެމްޕެއިން ދަތުރު ފައްޓަވާފައެވެ. މި ދަތުރުގައި ށ އަތޮޅުގެ 7ރަށަށް ވަނީ ވަޑައިގެންފައެވެ. އަދި ނ އަތޮޅުގެ 7 ރަށަށް ވަޑައިގަންނަވާނެއެވެ.