އެމްޑީޕީގެ ހެޔޮވެރިކަމުގެ ސިޔާސަތު ހާމަކޮށް، ރޯދަމަހުގެ ފަހު ދިހައެއްގައި ގޭގައި މަސައްކަތްކުރެވޭނެގޮތް ހަދަނީ

ސަރުކާރު މުވައްޒަފުންނަށް ރޯދަމަހުގެ ފަހު 10 ގައި ގޭގައި ތިބެގެން މަސައްކަތްކުރެވޭނެގޮތަށް ކަނޑައެޅުމަށް އެމް.ޑީ.ޕީގެ މެނިފެސްޓޯ 2023 ގައި ހިމަނައިފިއެވެ.

ކުރިއަށްއޮތް ރިޔާސީ އިންތިޚާބުގައި ވެރިކަން ކުރާ މައި ޕާޓީ އެމް.ޑީ.ޕީގެ ފަރާތުން ވާދަކުރައްވާ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަތޮޅުތަކަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުތަކުގެ ތެރެއިން ބ. ދަރަވަންދޫގައި ރޭ ބޭއްވި ޖަލްސާގައި ވަނީ އެމް.ޑީ.ޕީގެ "މެނިފެސްޓޯ 2023" ގައި ހިމެނޭ "ހެޔޮވެރިކަން" ސިޔާސަތުގެ ދަށުން ކުރުމަށް ނިންމާފައިވާ ކަންކަން ހިއްސާކޮށްފައެވެ.

"ހެޔޮވެރިކަން" ސިޔާސަތުގެ ދަށުން ދައުލަތް ހިންގުމާއި ޖަވާބުދާރީ ކުރުވަނިވި ނިޒާމު ހަރުދަނާކުރުމަށްޓަކާ، ކޮރަޕްޝަނުން ސަލާމަތްވެފައިވާ ހާމަކަން ބޮޑު ދައުލަތެއް ހެދުމަށާއި، ދައުލަތުގެ ހިންގުން ވަރުގަދަކުރުމުގެ އިތުރުން މީޑިއާގެ މިނިވަންކަން ކަށަވަރުކުރުމަށް ކުރާނެ ކަންތައްތައް ހިމަނާފައިވެއެވެ.

މިގޮތުން ދައުލަތުގެ ހިންގުން ވަރުގަދަކުރުމަށްޓަކާ "ވަންގަވް" މެދުވެރިކޮށް ލިބޭ ޚިދުމަތްތަކުގެ ދާއިރާ ފުޅާކޮށް، ދައުލަތުގެ ހުރިހާ އިދާރާއަކުން އާންމުންނަށް ދޭ ޚިދުމަތްތައް މި ނިޒާމު މެދުވެރިކޮށް ލިބޭނެގޮތް ހެދުމަށް މެނިފެސްޓޯގައި ވަނީ ހިމަނާފައެވެ. އަދި ރައްޔިތުންގެ މަޖިލީސް އެކުލެވިގެންވާގޮތަށް ގެންނަންޖެހޭ ބަދަލުތައް ގެނައުމަށާއި، މެމްބަރުންގެ އަދަދު ކޮންމެ ފަސްއަހަރަކުން އިތުރުވާ ގޮތަށް އޮތް އޮތުން ބަދަލުކުރުމަށް ގާނޫނު އަސާސީ އިސްލާހުކުރުމަށްވެސް މެނިފެސްޓޯގައި ހުށަހަޅާފައިވެއެވެ.

މި ސިޔާސަތުގެ ދަށުން އިސްކަންދީފައިވާ އިތުރު ކަންކަމަށްބަލާއިރު، ދިވެހި ސިވިލް ސަރވިސްއަކީ ވެރިކަން ހިންގުމުގެ ބާރުގެ ސިޔާސަތުތައް ހަލުވިކަމާއެކު ތަންފީޒުކުރެވޭނެފަދަ ބައްޓަމަކަށް ގާއިމްކޮށްފައިވާ އެފިޝަންޓް ނިޒާމެއްގެ ގޮތަށް ބަދަލު ކުރުން ހިމެނެއެވެ. އަދި ސިވިލް ސަރވިސްގެ ރެގިއުލޭޓަރީ ނިޒާމަކީ ޒަމާނީ ހިންގުމުގެ ގޮތަށް ބައްޓަންކުރެވިފައިވާ ފްލެކްސިބަލް އަސާސްތަކުގެ މައްޗަށް ޤާއިމްކުރެވިފައިވާ ނިޒާމެއްގެ ގޮތަށް ބަދަލު ކުރުމުގެ ގޮތުން ސިވިލް ސަރވިސްގެ މޮޑެލްއަށް ގެންނަންޖެހޭ ޤާނޫނީ އިސްލާހުތައް ގެނައުމަށް ހިމަނާފައިވެއެވެ.

ހަމައެހެންމެ ރޯދަ މަހުގެ ފަހު 10 ދުވަހަކީ ގިނަ ބަޔަކު ރޭ އަޅުކަމުގައި މަސްއޫލުވެގެންއުޅޭ ދުވަސްވަރުކަމަށްވާތީއާއި މުވައްޒަފުންނަށް ލުއި ފަސޭހަކުރުމަށްޓަކައި، މި ދުވަސްތަކުގައި ސަރުކާރުގެ މުވައްޒަފުން 'ވޯކް ފްރޮމް ހޯމް' މޮޑަލިޓީއިން މަސައްކަތްކުރާގޮތަށް ކަނޑައެޅުމަށްވެސް މެނިފެސްޓޯގައި ހިމަނާފައިވެއެވެ.

މީގެ އިތުރުން ދައުލަތުގެ މުއައްސަސާތަކުގެ ގަވަރނަންސްގައި ހުރި ފަރަގުތައް ނައްތާލައި، އޮޕަރޭޝަނަލް މިނިވަންކަމާއެކު ދައުލަތުގެ މުއައްސަސާތައް ހިންގޭނެ ޒަމާނީ އޮނިގަނޑެއް ގާއިމްކުރުމަށްޓަކައި، ޕަބްލިކް ސަރވިސެއް ގާއިމްކުރުމުގެ ގޮތުން ޤާނޫނުތަކަށް ގެންނަންޖެހޭ އިސްލާހުތައް ގެނައުން މި ސިޔާސަތުގެ ދަށުން ހިމެނެއެވެ. އަދި ވަޒީފާއާބެހޭ ޤާނޫނަކީ ވަޒީފާއަދާކުރާ ފަރާތްތަކާއި ވަޒީފާދޭ ފަރާތްތަކުގެ ހައްޤުތައް ފުރިހަމަގޮތުގައި ހޯދައިދޭ، ހިންގުމުގެ ނިޒާމުތަކަށް އައިސްފައިވާ ކުރިއެރުންތައް އެކުލެވޭ، ފްލެކްސިބަލް އަސާސްތަކެއްގެ މައްޗަށް ބައްޓަންކުރެވިފައިވާ ޤާނޫނެއްގެ ގޮތަށް ބަދަލުކުރުމަށްޓަކައި ޤާނޫނު އިސްލާހުކުރުމަށްވެސް ހުށަހަޅާފައިވެއެވެ.

ހަމައެހެންމެ ދައުލަތުގެ މުސާރަތައް އެއްހަމަ ކުރުމުގެ ސިޔާސަތުގެ ދަށުން ދައުލަތުގެ ހުރިހާ އިދާރާތަކުގައި މަސައްކަތްކުރާ ހުރިހާ ފަންނުތަކަކަށް ބޭނުންވާ ޖޮބް މެޓްރިކްސްތައް އެކުލަވާލައި، އެއްހަމަ މުސާރައިގެ މިންގަނޑުތަކެއް ޤާއިމްކޮށް، މުސާރަތަކަށް ގެންނަންޖެހޭ ކުރިއެރުންތައް ގެނައުމަށްވެސް އެމް.ޑީ.ޕީގެ މެނިފެސްޓޯ 2023 ގައި ހިމަނާފައިވެއެވެ.