ޑީޖޭއިން ތަމްރީންކުރުމުގެ ޕްރޮގްރާމެއް ޓޫރިޒަމް މިނިސްޓްރީން ފަށަނީ

މިއުޒިކް ކުޅޭ ޑީޖޭއިންގެ ގޮތުގައި ރިސޯޓްތަކުގައި މަސައްކަތްކުރާނެ މީހުން ތަމްރީންކުރުމަށް ޓޫރިޒަމް މިނިސްޓްރީން އޫބަރ އިވެންޓްސްއާއެކު އެއްބަސްވުމެއްގައި ޤާއިމްކޮށްފިއެވެ.

ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ ޓޫރިޒަމް މިނިސްޓްރީގެ ޕާމަނަންޓް ސެކްރެޓަރީގެ ފާތިމަތު ނިލްފާއެވެ. އަދި އޫބަރ އިވެންޓްސްގެ ފަރާތުން ސޮއެކުރެއްވީ ޑިރެކްޓަރ އުމަރު ޒިޔާދުއެވެ.

އެއްބަސްވުމުގައި ސޮއިކުރުމުގެ ރަސްމިއްުޔާތުގައި ވާހަކަދައްކަވަމުން ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވީ، ޑީޖޭއިންގެ ގޮތުގައި މަސައްކަތް ކުރުމަކީ ދިވެހިން ވަރަށް ޝައުގުވެރިކަމާއިއެކު ކުރާކަމެއްކަން ފާހަގަވެފައިވާކަމަށެވެ. އަދި އެ މަސައްކަތް ދަސްކުރާ ހިތްވާ ވަރަށް ގިނަ ކުދިން އުޅޭއިރު، މި ޕްރޮގްރާމްގެ ސަބަބުން އެ ކުދިންނަށް ކުރިއެރުންތަކެއް ލިބިގެންދާނެކަމަށް މިނިސްޓަރ ފާހަގަކުރެއްވިއެވެ.

“އުންމީދަކީ މި ޕްރޮގްރާމްގެ ތެރެއިން އިރާދަކުރެއްވިއްޔާ ސެޕްޓެމްބަރ މަހު ފަހުކޮޅުގައި ފެށިގެން އެ ގެންދާ ޕްރޮގްރާމް ނިންމާލާފައި އިރާދަކުރެއްވިއްޔާ ސީޒަން އަންނަންވާއިރަށް މިހާރު ޑީޖޭގައި އުޅޭ ކުދިންނާއި އައު ކުދިންވެސް އިންޑަސްޓްރީއަށް ހިދުމަތް ދިނުމަށް މުޅިން ރެޑީ ކުރެވޭނެކަމަށް. ރާއްޖޭގައި ޑީޖޭ ޝޯޓޭޖެއް އެބައޮތް. އެކަމަށް ކޮންމެވެސް ކަހަލަ މަގެއް ފަހިވެގެންދާނެ ކަމެއްކަމަށް މި ބެލެވެނީ.” މިނިސްޓަރ ވިދާޅުވިއެވެ.

އޫބަރ އިވެންޓްސް އެންޑް އާރޓިސްޓް ޕްރއިވެޓް ލިމިޑެޓްގެ ޑިރެކްޓަރ އުމަރު ޒިޔާދު ވިދާޅުވީ، މި ޕްރޮގްރާމް ނިމޭއިރު ޖީޑޭއެއްގެ ގޮތުގައި މަސައްކަތްކުރުމަށް ބޭނުންވާ އަސާސީ ތަމްރީންތަކާއި މައުލޫމާތުތައް ލިބޭނެކަމަށެވެ. އަދި މި ޕްރޮހްރާމްގައި ގާތްގަނޑަކަށް 20 ކުދިންނަށް ފުރުސަތު ދެވޭނެކަމަށާއި ފުރުސަތުދޭއިރު ބަލާނީ އިންޑަސްޓްރީއަށް ހިދުމަތްދޭ ކުދިންނަށް އިސްކަން ދިނުމަށްކަމަށްވެސް އުމަރު ވިދާޅުވިއެވެ.

”ސެޕްޓެމްބަރ 24 އިން ފެށިގެން އޮކްޓޯބަރ 6 އަކަށް 2 ހަފްތާގެ ކޯހެއް ކުރިއަށްގެންދަން. ކުރިންވެސް ރާއްޖޭގައި މިކަހަލަ ވޯކްޝޮޕްތައް ހިންގާފައި ވާނެ. ދިވެހިން ޒުވާނުން މި ދާއިރާއަށް ނެރުމުގެ މަޤްސަދުގައި ހިންގާ ކޯހެއް އިނގޭތޯ މިއީ. އަޅުގަނޑުމެން މިކަން މިކުރަނީ މެލޭޝިއާގެ ޑީޖޭސް ޕްލޭގްެރައުންޑް ކިޔާ ސްކޫލަކާއި ގުޅިގެން. ޕައިނިއާރސް ސެޓިފައިޑް ސެޓްފިކެޓެއް މި ކޯސް ނިމުނީމަ މި ލިބެނީ.” އުމަރު ޒިޔާދު ވިދާޅުވިއެވެ.

ޓޫރިޒަމް ބުނީ ޑީޖޭއިން ތަމްރީންކުރުމުގެ ޕްރޮގްރާމްގައި ބައިވެރިވުމުގެ ފުރުސަތު މާދަމާ ހުޅުވާލާނެކަމަށެވެ. އަދި މި ކޯހުގައި ބައިވެރިވާ ކުދިން އެއްވެސް ފީއެއް ދައްކާކަށް ނުޖެހޭނެކަމަށްވެސް ޓޫރިޒަމް މިނިސްޓްރީން ބުނެއެވެ.