މާދަމާއިން ފެށިގެން ޕާސްޕޯޓް ހެއްދުމުގެ ޚިދުމަތަށް ބޮޑު ލުޔެއް!

މާދަމާއިން ފެށިގެން ދިވެހި ޕާސްޕޯޓަށް އެދުމުގެ ޚިދުމަތް ޑިޖިޓަލައިޒްކޮށް، ޚިދުމަތް ދޭ ވަގުތު ރޭގަނޑު 9:00އާ ހަމައަށް އިތުރުކުރަން މޯލްޑިވްސް އިމިގްރޭޝަނުން ނިންމަވައިފިއެވެ.

ޕާސްޕޯޓަށް އެދުމުގެ ޚިދުމަތަކީ އާއްމުންނަށް ވީހާވެސް ލުއިފަސޭހަ ޚިދުމަތަކަށް ހެދުމަށް، އިމިގްރޭޝަންގެ ޑިޖިޓަލް ޕްލެޓްފޯމް "އިމުގާ" މެދުވެރިކޮށް އޮންލައިންކޮށް ހުށައެޅުމުގެ ފުރުޞަތު މިދިޔަ އަހަރު ހުޅުވާލިނަމަވެސް، އެކަމުގައި ހުރި ބައެއް ދަތިތައް އާއްމު ދިޔައީ ފާހަަގަކުރަމުންނެވެ.

2020 ވަނަ އަހަރުގެ ޖުލައިމަހުގެ ތެރޭގައި "އިމުގާ" މެދުވެރިކޮށް ޕާސްޕޯޓަށް އެދެމުގެ ޚިދުމަތް ފެށިފަހުން ހާތަނަށް މި ޚިދުމަތް މެދުވެރިކޮށް 125600 އަށްވުރެ ގިނަ މީހުން އޮންލައިންކޮށް ޕާސްޕޯޓް ހައްދާފައިވެއެވެ. ނަމަވެސް އޭރު އެ މަސައްކަތްކުރީ ކަރުދާސް ފޯމު ފުރުމަށްފަހު، އެ ފޯމް ސްކޭންކުރުމަށްފަހު އެހެން ލިޔެކިޔުންތަކާއެކު ޕޯޓަލްއަށް އަޕްލޯޑްކުރާގޮތަށެވެ.

އިމިގްރޭޝަނުން ވިދާޅުވީ މާދަމާއިން ފެށިގެން ޕާސްޕޯޓަށް އެދޭ ފޯމު ސްކޭންކޮށްގެން އަޕްލޯޑްކުރާކަށް ނުޖެހޭނެކަމަށާއި، އޭގެ ބަދަލުގައި ފުރަަންޖެހޭނީ އޮންލައިން ފޯމެއްކަމަށެވެ. އަދި އައިޑީ ކާޑާއި ކުރީގެ ޕާސްޕޯޓްގެ ކޮޕީވެސް މީގެފަހުން ހުށަހަޅަން ނުޖެހޭނެކަމަށް އިމިގްރޭޝަނުން ވިދާޅުވެއެވެ.

އިމިގްރޭޝަނުން ވިދާޅުވީ ޕާސްޕޯޓަށް ހުށައެޅުމަށް އޮންލައިންކޮށް ފޯމް ފުރިހަމަކުރުމަށްފަހު އަޕްލޯޑްކުރަންޖެހޭނީ ހަމައެކަނި އެމީހެއްގެ ސޮއިކޮށްފައިވާ ސާފުކޮށް ލިޔުމެއް ނުވަތަ ފޮޓޯއެއްކަމަށެވެ. މީގެއިތުރުން ޑިޖިޓަލް ސޮއިވެސް ހުށަހެޅޭނެކަމަށާއި ނަމަވެސް ޕާސްޕޯޓް ހެދުމަށް ހުށައެޅި ސޮއި، ޕާސްޕޯޓް ބަލާ އަންނައިރު ކުރަންޖެހޭނެކަމަށް އިމިގްރޭޝަނުން ވިދާޅުވެއެވެ.

މިގެނެވުނު ބަދަލާއެކު އަމިއްލަ ފޯނުންވެސް ޕާސްޕޯޓަށް ހުށައެޅޭހާ ފަސޭހަވާނެކަމަށް އިމިގްރޭޝަނުން ވިދާޅުވެއެވެ.

އިމިގްރޭޝަނުން ވިދާޅުވީ ޕާސްޕޯޓުގެ ޚިދުމަތަށް އެދޭއިރު، އިމުގާ ޕޯޓަލްއަށް ރަޖިސްޓަރކޮށް ވަކި އެކައުންޓެއް ހުޅުވަން ޖެހޭނެކަމަށާއި އަދި ސަރުކާރުގެ އީފާސް އެކައުންޓް މެދުވެރިކޮށްވެސް އިމުގާ ޕޯޓަލްއަށް ލޮގިން ވެވޭނެކަމަށެވެ.

ޕާސްޕޯޓް ހެއްދުމަށް ހުށަހެޅުން ފަސޭހަކޮށްދިނުމުގެ އިތުރުން އިމިގްރޭޝަނުން ވަނީ އެ އިދާރާއިން ޚިދުމަތްދޭ ވަގުތުވެސް އިތުރުކޮށްފައެވެ. އެގޮތުން އިމިގްރޭޝަންގެ މަސައްކަތު ގަޑި ހެނދުނު 08:00 އިން ރޭގަނޑު 9:00 އަށް ވަނީ އިތުރުކޮށްފައެވެ.

މި ބަދަލާއެކު، ޕާސްޕޯޓާ ހަވާލުވުމަށް ނަންބަރު ދޫކުރާ ގަނޑި، ހެނދުނު 08:30އިން މެންދުރު 12:00އަށް އަދި މެންދުރު 12:45 އިން ހަވީރު 5:00އަށް ވަނީ އިތުރުކޮށްފައެވެ. ކުރިން މި ޚިދުމަތް ދެއްވަމުން ދިޔައީ މެންދުރު 12:0އާ ހަމައަށެވެ.

އިމިގްރޭޝަނުން ވިދާޅުވީ މި ގެނެވުނު ބަދަލުގެ ސަބަބުން ޕާސްޕޯޓް ހައްދަން ހުށައަޅާ ލިޔެކިޔުންތައް އަވަހަށް ޕްރޮސެސްކޮށް، ޚިދުމަތްދިނުމުގައި ވަރަށް ބޮޑު ލުއިފަސޭހަތަކެއް ލިބިގެންދާނެކަމަށެވެ.