ކުންމިންގ ފެއަރގައި ތަކެތި ބައިވެރިކުރަން ބޭނުންވާ ފަރާތްތަކަށް ހުޅުވާލެއްވި ފުރުޞަތުގައި 29 ފަރާތަކުން ޝައުޤުވެރިކަން ފާޅުކޮށްފިއެވެ.
ސައުތު އޭޝިއާގެ ޤައުމުތަކުގެ އުފެއްދުންތެރި ތަކެތި އެއްތަނަކުން ވިއްކުމަށް ކޮންމެ އަހަރަކުވެސް ޗައިނާގެ ކުމްމިންގައި ބާއްވަމުން އަންނަ މި ފެއަރގައި ތަކެތި ބައިވެރިކުރަން ބޭނުންވާ ފަރާތްތަކަށް ހުޅުވާލެއްވި ފުރުޞަތުގެ މުއްދަތު ހަމަވެފައިވަނީ ފެބްރުއަރީމަހުގެ 29 ވަނަ ދުވަހުއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓުން ހާމަކުރެއްވިގޮތުގައި ޝައުގުވެރިކަން ފާޅުކުރި ފަރާތްތަކުން ހުށަހެޅި ސާމްޕަލްތައް ބެއްލެވުމަށްފަހު ކުންމިންގ ފެއަރގެ ސްޓޭންޑަޑަށް ފެތޭ ތަކެތި އަދި އެއަށްވުރެ ކޮލިޓީ ދަށް ތަކެތިވެސް، ކޮލިޓީ ރަނގަޅު ކުރުމަށްފަހު އިކޮނޮމިކް މިނިސްޓްރީއަށް ހުށަހެޅުމަށް މިހާރު އަންގާފައިވާ ކަމަށެވެ.
"ފެއަރއަށް ގެންދާ ތަކެތި އޭޕްރިލް 10 ގެ ކުރިން ޙަވާލުކުރަންޖެހޭ. ފެއަރގައި ބައިވެރިކުރާ ތަކެތި ޗައިނާއަށް ގެންދިޔުމުގެ އިންތިޒާމް ހަމަޖައްސައިދެއްވާނީ އިކޮނޮމިކް މިނިސްޓްރީން." އެ މިނިސްޓްރީގެ އޮފިޝަލަކު ވިދާޅުވިއެވެ.
ސާމްޕަލްގެ ގޮތުގައި ހުށަހަޅާފައިވާ ތަކެތީގެ ތެރޭގައި، ދިވެހިވަންތަ ގަހަނާގެ އުފެއްދުންތަކާއި ހޭންޑީ ކްރާފްޓްގެ ތަކެތި ހިމޭނޭ ކަމަށް އިކޮނޮމިން މިނިސްޓްރީން ހާމަކުރައްވައެވެ.
މިއަހަރުގެ ކުންމިންގ ފެއަރގެ "ކަންޓްރީ އޮފް އޮނާ"ގެ މަޤާމް ރާއްޖެއަށް ވަނީ ލިބިފައެވެ. އަދި މި ޝަރަފާއެކު ރާއްޖޭގެ އުފެއްދުންތައް ދައްކާލުމަށް ބޮޑު ޖާގައެއް ވަނީ ލިބިފައެވެ. މި ފަހަރުގެ ކުންމިން ފެއަރގައި ރާއްޖެއިން ބައިވެރިވުމަށް ލިބިފައިވާ މި ފުރުޞަތަކީ ދިވެހިންގެ އުފެއްދުންތައް މާކެޓްކޮށް، އުފައްދާ ތަކެތި އިޝްތިހާރުކުރުމަށް ލިބިގެންދާ ވަރަށް ބޮޑު ފުރުޞަތެއްކަމަށް އިކޮނޮމިކް މިނިސްޓްރީން ވިދާޅުވެއެވެ.
ކުންމިން ފެއަރއަކީ މިއަހަރުގެ ޖޫންމަހު ޗައިނާގެ ކުންމިންގައި ބޭއްވުމަށް ހަމަޖެހިފައިވާ ފެއަރއެކެވެ.