ޖޮބް ފެސްޓިވަލް: ޕީއެސްއެމްގެ ޗެނަލްތަކުގައި ހުރި ފުރުޞަތުތަކުގެ މައުލޫމާތާއި ތަޖުރިބާކޮށްލުމުގެ ފުރުސަތު
ރާއްޖޭގައި ހުރި ވަޒީފާގެ ފުރުސަތުތަކާއި ގުޅޭ މައުލޫމާތު ޒުވާނުންނަށް ފޯރުކޮށްދިނުމަށް ދިވެހިރާއްޖޭގެ ޤައުމީ ޔުނިވަރސިޓީން ފަހި ފުރުސަތުގެ ނަމުހައި ކުރިއަށްގެންދަވާ ޖޮބް ފެސްޓިވަލް ފަށައިފިއެވެ.
މިއީ ޤައުމީ ޔުނިވަރސިޓީން މި ޖޮބް ފެސްޓިވަލް ކުރިއަށްގެންދަވާ 3 ވަނަ އަހަރެވެ. މިއަދު ފެށި މިއަހަރު ޖޮބް ފެސްޓިވަލް ކުރިއަށްދާނީ މާދަމާގެ ނިޔަލަށް، ކޮންމެ ދުވަހަކު ހަވީރު 16:00 އިން ރޭގަނޑު 10:00 އަށް އަމީނީ ބިލްޑިންގައި ހުންނަ ޤައުމީ ޔުނިވަރސިޓީގެ ޕީއީ ހޯލްގައެވެ.
މި ޖޮބް ފެސްޓިވަލްއަކީ ރާއްޖޭގެ ވަޒީފާގެ ބާޒާރުގައި ހުރި ފުރުޞަތުތަކުގެ މަޢުލޫމާތުދީ، އެ ވަޒީފާތަކަށް މީހުން ހޯދުމަށް ކުރިއަށްގެންދާ ހަރަކާތެކެވެ. މިފަހަރުގެ ފެސްޓިވަލް ފަށްޓަވައިދެއްވީ މިނިސްޓަރ އޮފް ޓުއަރިޒަމް ޑރ.ޢަބްދުﷲ މަޢުޞޫމްއެވެ.
މި ފެސްޓިވަލް ފަށްޓަވައިދެއްވާ ވާހަކަފުޅު ދައްކަވަމުން މިނިސްޓަރ މަޢުޞޫމް ވިދާޅުވީ މިފަދަ ފެސްޓިވަލްއަކީ ވަޒީފާގެ ފުރުޞަތުތައް ހޯދުމަށް ލިބޭ ރަނުގެ ފުރުޞަތެއްކަމަށާއި މިފަދަ ފެސްޓިވަލްތަކުގެ ތެރެއިން ވަޒީފާއަށް ދިއުމުގެ ކުރިން އެ ވަޒީފާއަކާ ގުޅޭ މަޢުލޫމާތުތައް ފޯރުކޮށްދިނުމަކީ މުހިއްމުކަމެއްކަމަށެވެ. މިނިސްޓަރ ވިދާޅުވީ ރާއްޖޭގައި ވަޒީފާގެ އަދަދު ނިސްބަތުން ގިނަކަމަށެވެ. އެހެންނަމަވެސް އެ ވަޒީފާތަކަށް ކުރިމަތިލާއިރު ފުރިހަމަކުރަންޖެހޭ ބައެއްކަންކަން ހުންނަކަން މިނިސްޓަރ ފާހަގަކުރެއްވިއެވެ.
"ވަޒީފާއަކަށް ދާއިރު ހުނަރާއި ތަޖުރިބާއަކީ ވަރަށް މުހިއްމު ކަމެއް. މިހާރު މިލިބޭ ފުރުޞަތުިތަކުގެ ބޭނުންކޮށްގެން އެމީހަކަށް އެންމެ ރަނގަޅު ވަޒީފާއަކަށްގޮސް އާމްދަނީ ހޯއްދަވާ. ދަށު ވަޒީފާތައް ދޫކޮށް މަތީ ވަޒީފާތަކަށް އައުމަށް މަސައްކަތް ކުރައްވާ. ބޭރު މީހުންނަށް ވުރެ ގިނައިން ވަޒީފާގެ ބޮޑެތި މަޤާމުތަކަށް ދިވެހިން އައުމަށް މަސައްކަތް ކުރައްވާ." މިނިސްޓަރ އޮފް ޓުއަރިޒަމް ޑރ. އަބްދުﷲ މަޢުޞޫމް ވިދާޅުވިއެވެ.
މިފަހަރު ކުރިއަށްގެންދާ ޖޮބް ފެސްޓިވަލްގައި ޕަބްލިކް ސަރވިސް މީޑިއާ، ޕީއެސްއެމް ހިމެނޭހެން 32 ފަރާތަކުން ބައިވެރިވިއެވެ. ޓުއަރިޒަމް މިނިސްޓަރ ޑރ.ޢަބްދުﷲ މަޢުޞޫމް ވަނީ ޕީއެސްއެމްގެ ސްޓޯލްއަށް ޒިޔާރަތްކުރައްވާ އެތަނުގައި ހުރި ވަޒީފާގެ ފުރުޞަތުތައް އޮޅުން ފިލުއްވައި، ސްޓޯލްގައި ހުރި ބައެއްކަން ތަޖުރިބާ ކޮށްލައްވާފައެވެ. ޕީއެސްއެމް ސްޓޯލްގައި ކުންފުނީގެ އެކި ޑިޕާޓްމަންޓްތަކުގައި ހުރި ވަޒީފާގެ ފުރުޞަތުތަކުގެ މައުލޫމާތު ދަނީ ފޯރުކޮށްދެމުންނެވެ. އެގޮތުން ޕީއެސްއެމްގެ އެކި ޗެނަލްތަކުގައި ހުރި ވަޒީފާގެ ފުރުޞަތުތަކާއި ބައެއްކަންކަން ތަހުރިބާ ކޮށްލުމުގެ ފުރުޞަތުތައްވެސް މި ސްޓޯލްއިން ލިބޭނެއެވެ.
މި ފެސްޓިވަލްގައި ޕީއެސްއެމްގެ އިތުރުން ފަތުރުވެރިކަމާއި، ފަންނާ ސަޤާފަތުގެ ދާއިރާއާއި، ޔުޓިލިޓީ ކުންފުނިތަކާއި، ކަނޑު ދަތުރުފަތުރުގެ ދާއިރާއާއި އަދިވެސް ގިނަ ދާއިރާތަކެއްގައި ހަރަކާތްތެރިވާ ކުންފުނިތަކުން ވަނީ ބައިވެރިވެފައެވެ. މި ފެސްޓިވަލްގައި 6000 އަށްވުރެ ގިނަ ވަޒީފާގެ ފުރުޞަތުތާއި އެކަމާއި ގުޅޭ މައުލޫމާތު ލިބެން ހުންނާނެކަމަށް ޤައުމީ ޔުނިވަރސިޓީން މައުލޫމާތުދެއްވައެވެ.