އިންސާނީ ހައްޤުތަކާއި ބެހޭ މައްސަލަތަކުގެ ތެރެއިން 50 އިންސައްތަ މައްސަލައަކީ އިޤްތިޞާދީ، އިޖްތިމާޢީ އަދި ސަޤާފީ މައްސަލަތައް ކަމަށް ހިއުމަން ރައިޓްސް ކޮމިޝަނުން ވިދާޅުވެއްޖެއެވެ.
ހިއުމަން ރައިޓްސް ކޮމިޝަންގެ ވޭތުވެދިޔަ އަހަރުގެ އަހަރީ ރިޕޯޓްގައި މިފަދަ 138 މައްސަލައެއް ހުށަހަޅާފައިވާކަން ފާހަގަކޮށްފައިވެއެވެ. މީގެތެރޭގައި ރަގަޅު ފެންވަރެއްގައި ސިއްޙީ ފަރުވާ ލިބުމުގެ ޙައްޤާއި ގުޅޭ މައްސަލަތައް ގިނަކަމަށް އެކޮމިޝަނުން ފާހަގަކުރައްވައެވެ. އެގޮތުން މިފަދަ 83 މައްސަލައެއް ހިއުމަންރައިޓްސް ކޮމިޝަނަށް ވަނީ ހުށަހަޅާފަައެވެ.
އިންސާނީ ހައްޤުތަކާއި ގުޅޭގޮތުން މިދިޔަ އަހަރު 592 މައްސަލަ އެޗްއާރުސީއެމް އިން ވަނީ ބަލާ ނިންމާފައެވެ. ހުށަހަޅާފައިވާ ޝަކުވާތަކުގެ ތެރޭގައި އިންސާނީ ހައްޤުތައް ނިއުޅައިގަނެފައިވާކަމަށް ބުނެ އާއްމު ފަރާތްތަކުންނާއި، ކަމާއިބެހޭ އިދާރާތަކުން 546 ޝަކުވާއެއް ހުށަހަޅާފައިވާއިރު، އިންސާނީ ޙައްޤަކަށް އުނިކަމެއް ލިބިދާނެކަމުގެ ފުރުސަތު އޮވެދާނެކަމަށް ބަލާ ކޮމިޝަނުން އިސް ނަގައިގެން 46 މައްސަލައެއް ވެސް ބަލާފައިވާކަމަށް ހިއުމަންރައިޓްސް ކޮމިޝަނުން ވިދާޅުވެއެވެ.
އެކޮމިޝަނަށް ހުށަހަޅާފައިވާ މައްސަލަތަކުގެ ތެރެއިން މައިގަނޑު ގޮތެއްގައި މައްސަލަތައް ހުށަހަޅާފައިވާ ދާއިރާތަކުގެ ތެރޭގައި ކުޑަކުދިންނާއި ޢުމުރުން ދުވަސްވީ މީހުންނާއި ޚާއްސައެހީއަށް ބޭނުންވާ މީހުންގެ އިންސާނީ އެހީއަށް ހުރަސްއެޅިފައިވާކަމަށް ބުނެ ހުށަހަޅާފައިވާ 80 މައްސަލައަކާއި، ލާއިންސާނީ އަދަބާއި ގުޅޭ 78 މައްސަލައެއް އަދި ޚިޔާލުފާޅުކުރުމުގެ މިނިވަންކަން ގެއްލިގެން ހުށައެޅުނު 32 މައްސަލައެއް ފާހަގަކޮށްލެވެއެވެ.
ހިއުމަންރައިޓްސް ކޮމިޝަންގެ ރައީސް އާމިނަތު އީނާސް ވިދާޅުވީ، ރާއްޖޭގެ އިންސާނީ ޙައްޤުތަކުގެ ޙާލަތަށް ބަލާއިރު މިދިޔަ އަހަރަކީ ދިވެހިރާއްޖެއަށް ހެޔޮ ބަދަލުތަކަކާއި ކުރިއެރުންތަކެއް ލިބިގެންދިޔަ އަހަރެއްކަމަށެވެ. އެގޮތުން ޤާނޫނީ ނިޒާމުގެތެރެއަށް އައި ބަދަލުތައް ފާހަގަކުރެއްވިއެވެ. އަދި އިންސާނީ ޙައްޤުތައް ކުރިއަރުވާ ދެމެހެއްޓުމަށްޓަކައި ކުރަމުންދާ މަސައްކަތަށް ގޮންޖެހުންތަކެއް ކުރިމަތިވިކަންވެސް އީނާސް ފާހަގަކުރެއްވިއެވެ.
ހިއުމަން ރައިޓްސް ކޮމިޝަންގެ ނައިބު ރައީސް ޝިފާޤް މުފީދު ވިދާޅުވީ ކޮމިޝަނަށް ހުށަހެޅޭ މައްސަލަތަކުގެ ނިސްބަތް، މާހައުލާއެއްގޮތަށް ބަރޯސާވަމުންދާކަމަށެވެ. އަދި އަހަރުން އަހަރަށް ހުށަހަޅަމުންދާ މައްސަލަތަކުގެ ބާވަތްތައް ބަދަލުވަމުންދާކަމަށްވެސް ޝިފާޤު ވިދާޅުވިއެވެ.
2014 ވަނަ އަހަރާއި އަޅާބަލާއިރު، ވޭތުވެދިޔަ އަހަރު އިންސާނީ ޙައްޤުތަކުގެ ދާއިރާއިން ކުރިއެރުންތަކެއް ލިބިފައިވީނަމަވެސް ޙައްޤުތައް ހޯދައިދިނުމުގައި ގިނަ މަސައްކަތްތަކެއް ކުރަންޖެހޭކަން ހިއުމަންރައިޓްސް ކޮމިޝަނުން ފާހަގަކުރައްވައެވެ.