ސަރުކާރު ޙިއްޞާވާ ކުންފުނިތައް އިޞްލާޙުކޮށް، އަމިއްލަ ވިޔަފާރިތަކުގެ ދާއިރާ ހަރުދަނާކުރުމަށް ވޯލްޑް ބޭންކުން ރާއްޖެއަށް 15 މިލިއަން ޑޮލަރުގެ އެހީއެއް ދިނުމަށް ނިންމައިފިއެވެ.
ވޯލްޑް ބޭންކުން ބުނީ ސަރުކާރު ޙިއްޞާވާ ކުންފުނިތަކުގައި އަމިއްލަ ވިޔަފާރިތަކުގެ ބައިވެރިވުން އިތުރުކޮށް، އެ ކުންފުނިތަކުގެ މާލީ ދެމެހެއްޓެނިވިކަން ހަރުދަނާކުރުމަށާއި، ޤާނޫނީ އޮނިގަނޑު އިޞްލާޙްކޮށް، ފައިސާ ލިބޭނެ މަގުތައް ތަނަވަސްކޮށް، ކަމާބެހޭ ފަރާތްތަކުގެ ޤާބިލްކަން އިތުރުކުރުމަށް އެހީތެރިވެދިނުމަށް ނިންމާފައިވާ ކަމަށެވެ. އަދި މާލީ ދެމެހެއްޓެނިވިކަމަށް އެހީތެރިވެދިނުމުގެ ތެރެއިން ރާއްޖޭގެ ކުދި ވިޔަފާރިތަކާއި މެދުފަންތީގެ ވިޔަފާރިތަކުގެ ވާދަވެރިކަން އިތުރުކުރުމަށް ވޯލްޑް ބޭންކުގެ އެގްޒެކެޓިވް ޑިރެކްޓަރުންގެ ބޯޑުން 15 މިލިއަން ޑޮލަރުގެ ޕްރޮޖެކްޓެއް ފާސްކޮށްފައިވާ ކަމަށް އެ ބޭންކުން ބުނެއެވެ.
މޯލްޑިވްސް ކޮމްޕެޓިޓިވްނެސް އެންޑް ގްރޯތު ޕްރޮޖެކްޓްގެ އަމާޒަކީ ސަރުކާރު ޙިއްޞާވާ ކުންފުނިތަކުގެ ތެރެއިން ހޮވާލެވޭ ކުންފުނިތަކެއްގައި އަމިއްލަ ފަރާތްތަކުގެ ބައިވެރިވުން އިތުރުކޮށް، އެ ވިޔަފާރިތައް ހިންގާ ގޮތް ރަނގަޅުކޮށް، އެ ކުންފުނިތަކާ މަތިކޮށްފައިވާ ޢާންމު ޚިދުމަތުގެ މަސްއޫލިއްޔަތުތަކާއި ދެވޭ ސަބްސިޑީތައް އިޞްލާޙްކުރުމަށް ސަރުކާރަށް އެހީތެރިވެދިނުމެވެ.
މި މަޝްރޫޢުގެ ޒަރީޢާއިން، ޑިޖިޓަލް ވަޞީލަތްތައް މެދުވެރިކޮށް ވިޔަފާރި ލޯނުތައް ހޯދުމުގައި ރާއްޖޭގެ އަމިއްލަ ކުދި ވިޔަފާރިތަކާއި މެދުފަންތީގެ ވިޔަފާރިތަކަށް ލުއި ފަސޭހަގޮތްތަކެއް ހަމަޖެއްސުމާއި ހޮވާލެވޭ އީޖާދީ އަދި ޤާބިލު ކުދި ވިޔަފާރިތަކާއި މެދުފަންތީގެ ވިޔަފާރިތައް ފުޅާކުރުމުގެ މަގުކޮށައިދީ، އާ މާރކެޓްތަކުގައި ވާދަކުރުމަށް އާ އަދި މޫސުމާ ރަށްޓެހި އުފެއްދުންތައް އުފެއްދުމަށް އެހީތެރިވެދިނުމަށް މަގުފަހިވެގެންދާނެ ކަމަށް އެ ބޭންކުން ބުނެއެވެ.
ވޯލްޑް ބޭންކުން ދިވެހިރާއްޖެ އާއި ސްރީލަންކާ އަދި ނޭޕާލަށް ކަނޑައަޅާފައި ހުންނަވާ ކަންޓްރީ ޑިރެކްޓަރ ފާރިސް އެޗް ހަދާދު-ޒާވޮސް ވިދާޅުވީ ކޮވިޑް-19ގެ ބަލިމަޑުކަމާއި ދުނިޔޭގެ މާޙައުލުގައި އުފެދިފައިވާ ނުތަނަވަސްކަމުގެ ސަބަބުން ރާއްޖޭގެ އިޤްތިސާދީ ކުރިއެރުމަށް ވަރަށް ބޮޑު އަސަރެއް ކުރިކަމަށެވެ. އެއާއެކު އެކަމުގެ އަސަރު ސަރުކާރު ޙިއްޞާވާ ވިޔަފާރިތަކަށާއި ކުދި ވިޔަފާރިތަކާއި މެދުފަންތީގެ ވިޔަފާރިތަކަށް ވެސް ކޮށްފައިވާކަމަށް އޭނާ ވިދާޅުވއެވެ. އަދި މަޝްރޫއުގެ ސަބަބުން އަމިއްލަ ވިޔަފާރިތަކަށް ހުރި އިޤްތިސާދީ ފުރުޞަތުތައް ފުޅާވެ، ސަރުކާރު ޙިއްޞާވާ ވިޔަފާރިތަކަށް މުހިންމު އިޞްލާޙުތަކެއް ގެނައުމަށް މަގުފަހިވާނެ ކަމަށާއި މިކަމުގެ ސަބަބުން ކުރިއަށް އޮތް ތާނގައި ރާއްޖޭގެ މާލީ ޙާލަތު ކުރިއެރުވުމަށް ވެސް އެހީތެރިކަން ލިބިގެންދާނެކަމަށެވެ.
ރާއްޖެއަކީ މަތީ މެދުފަންތީގެ އާމްދަނީ ލިބޭ ގައުމެއް ނަމަވެސް، ރާއްޖޭގެ އިގްތިޞާދު ވަރަށް ބޮޑަށް ބަރޯސާވެފައި ވަނީ މަދު ސިނާޢަތްތަކެއްގެ މައްޗަށެވެ. ވޯލްޑް ބޭންކުން ބުނީ އިޤްތިޞާދީ މުހިންމު މައްސަލަތައް ޙައްލުކުރުމުގައި ރާއްޖޭން ކޮންމެވެސް ވަރެއްގެ ކުރިއެރުންތަކެއް ހޯދާފައިވީ ނަމަވެސް، އިޤްތިސާދީ ކުރިއެރުން ވަރުގަދަކުރުމަށް އިތުރު މަސައްކަތްތަކެއް ކުރަން ޖެހޭކަމަށެވެ.
މޯލްޑިވްސް ކޮމްޕެޓިޓިވްނެސް އެންޑް ގްރޯތު ޕްރޮޖެކްޓް ކުރިއަށް ގެންދާނީ މިނިސްޓްރީ އޮފް ފައިނޭންސުންނެވެ. މި މަޝްރޫއަށް ޚަރަދުކުރުމަށް ހަމަޖެހިފައިވަނީ ޖުމްލަ 15 މިލިއަން ޑޮލަރެވެ. އޭގެ ތެރޭގައި ހިމެނެނީ، ތަރައްގީވަމުން އަންނަ ޤައުމްތަކަށް ލުއި ގޮތްތަކެއްގެ މަތިން އެހީތެރިކަން ދިނުމަށް ޚާއްޞަ، ވޯލްޑް ބޭންކްގެ ގޮފި ކަމަށްވާ އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ) ން ދޭ 7.5 މިލިއަން ޑޮލަރުގެ ލޯނާއި 7.5 މިލިއަން ޑޮލަރުގެ ހިލޭ އެހީއެވެ.