ތާރީހުގައިވެސް ލިބުނު އެންމެ ބޮޑު އާމްދަނީއާއެކު އެމްޓީސީސީގެ ހިއްސާދާރުންނަށް ރެކޯޑް ފައިދާއެއް

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ ތާރީހުގައިވެސް ލިބުނު އެންމެ ބޮޑު އާމްދަނީއާއެކު ކުންފުނީގެ ހިއްސާދާރުންނަށް ރެކޯޑް އަދަދެއްގެ އާމްދަނީއެއް ބެހުމަށް ނިންމައިފިއެވެ.

ސަރުކާރާއި ދިވެހި ރައްޔިތުން ހިއްސާވާ ރާއްޖޭގެ އެންމެ ބިޔަ ޓްރާންސްޕޯޓް އަދި ކޮންޓްރެކްޓިންގ ކުންފުނިކަމަށްވާ، އެމްޓީސީސީން މިހާރު ވަނީ މިދިޔަ އަހަރުގެ މާލީ ހިސާބުތައް އާންމުކޮށްފައެވެ.

1981 ވަނަ އަހަރު ސަރުކާރުން އުފެއްދި އެމްޓީސީސީއަށް މިދިޔަ އަހަރު ލިބުނު އާމްދަނީއަކީ ކުންފުނީގެ 42 އަހަރުގެ ދިގު ތާރީޚުގައިވެސް މިހާތަނަށް ލިބުނު އެންމެ ބޮޑު އާމްދަނީކަމަށް އެކުންފުނިން ބުނެއެވެ. އަދި ކުންފުންޏަށް ހިންގުމުގެ ފައިދާގެ ގޮތުގައި ލިބިފައިވާ އާމްދަނީއާއި ޑިރެކްޓަރުންގެ ބޯޑުން ހިއްސާދާރުންނަށް ބެހުމަށް ހުށަހަޅާފައިވާ ފައިދާއަކީވެސް ކުންފުނީގެ ތާރީހުގައި މިހާތަނަށް ފައިދާގެ ގޮތުގައި ބަހާ އެންމެ ބޮޑު މިންވަރެވެ.

42 އަހަރުވީ ކުންފުނީގެ ތާރީހުގައިވެސް އެންމެ ބޮޑު އާމްދަނީއެއް ލިބުނީ މިދިޔަ އަހަރު

• އާމްދަނީ 2.47 ބިލިއަން ރުފިޔާ
• ހިންގުމުގެ ފައިދާއަށް 324.16
• ސާފު ފައިދާ 196 މިލިއަން ރުފިޔާ
• ހިއްސާދާރުންނަށް 32.15 މިލިއަން ރުފިޔާ

އެމްޓީސީސީގެ މިދިޔަ އަހަރުގެ މާލީ ހިސާބުތައް ދައްކާގޮތުން މިިދިޔަ އަހަރު އެ ކުންފުންޏަށް 2.47 ބިލިއަން ރުފިޔާގެ އާމްދަނީއެއް ވަނީ ލިބިފައެވެ. އަދި ހިންގުމުގެ ފައިދާގެ ގޮތުގައި ވަނީ 324.16 މިލިއަން ރުފިޔާ ލިބިފައެވެ.

މިއީ މިދިޔަ އަހަރު ލިބުނު އާމްދަނީއާއި ހިންގުމުގެ ފައިދާއާ އަޅާބަލާއިރު އިތުރު އަދަދެއްގެ އިތުރުން، މިއީ އެމްޓީސީސީގެ ތާރީހުގައިވެސް އެންމެ ބޮޑު އާމްދަނީއަކާއި ހިންގުމުގެ ފައިދާއެއް ލިބުނު އަހަރެވެ.

އެމްޓީސީސީން ބުނީ އާމްދަނީއާއި ހިންގުމުގެ ފައިދާ އިތުރުވިނަމަވެސް ކުންފުންޏަށް ލިބުނު ފައިދާ %36.15 ދަށްވެފައިވާކަމަށެވެ. އެގޮތުން ޓެކްސްއަށް ކެނޑުމުގެ ކުރިން ފައިދާގެ ގޮތުގައި 2021 ވަނަ އަހަރު 271.82 މިލިއަން ރުފިޔާ ލިބިފައިވާއިރު މިދިޔަ އަހަރު ލިބުނު ފައިދާ އުޅެނީ 229.53 މިލިއަން ރުފިޔާގައެވެ.

ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި 2021 ވަނަ އަހަރު 196 މިލިއަން ރުފިޔާ ލިބިފައިވީނަމަވެސް، އެއަދަދު މިދިޔަ އަހަރު ވަނީ 231 މިލިއަން ރުފިޔާއަށް ދަށްވެފައެވެ.

އެމްޓީސީސީން ބުނީ ކުންފުންޏަށް ލިބުނު ފައިދާ ދަށަށްދިޔައީ ރަޝިޔާ-ޔޫކްރޭން ހަނގުރާމައިގެ ސަބަބުން ދުނިޔޭގެ ބާޒާރުގައި ތަކެތީގެ އަގާއި ތެލުގެ އަގު އުފުލުމުގެ ސަބަބުންނާއި ބޭރު ފައިސާ ހޯދުމަށް ކުރަންޖެހުނު ޚަރަދު އިތުރުވުމުގެ ސަބަބުންކަމަށެވެ.

2022 ވަނަ އަހަރު ހާސިލްކުރި މާލީ ނަތީޖާއާއިއެކު -/5 ރުފިޔާގެ މޫނުމަތީ އަގުގެ ހިއްސާއަކަށް -/4 ރުފިޔާގެ މަގުން ޖުމުލަ ހިއްސާގެ ފައިދާގެ ގޮތުގައި 32.15 މިލިއަން ރުފިޔާ ބެހުމަށް ވަނީ ނިންމާފައެވެ. މިއީ ކުންފުނީގެ 42 އަހަރުގެ ދިގު ތާރީޚުގައި ހިއްސާގެ ފައިދާގެ ގޮތުގައި ހިއްސާދާރުންނަށް ބެހުމަށް ހުށަހަޅާ އެންމެ ބޮޑު އަދަދުކަން ކުންފުނިން ފާހަގަކުރެއެވެ.

2022 ވަނަ އަހަރު އެމްޓީސީސީން ހާސިލްކޮށްފައިވާ ލަނޑުދަނޑިތަކަށް ބަލާއިރު، ރާއްޖޭގެ ޢުމްރާނީ ތަރައްޤީގެ މުހިއްމު މަސައްކަތެއް ވަނީ ކުރިއަށްގެންގޮސްފައެވެ. އެގޮތުން މިދިޔަ އަހަރު ތެރޭގައި ޢުމްރާނީ ތަރައްޤީގެ އައު 65 މަޝްރޫޢުއަކާއި ކުންފުނިން ހަވާލުވެ، 42 މަޝްރޫއެއްގެ މަސައްކަތް ވަނީ ކާމިޔާބުކަމާއިއެކު ނިންމާލާފައެވެ. އަދި ރާއްޖޭގެ ތަރައްޤީއާއި ކުރިއެރުމާއި ގުޅުންހުރި ގިނަ މަސައްކަތްތަކެއްވެސް އެމްޓީސީސީން އަންނަނީ ކުރިއަށްގެންދަމުންނެވެ.