އެސްއެމްއީ ބޭންކްގެ ޕޯޓަލް އަޕްގްރޭޑްކޮށް ލޯނަށް އެދުމަށް ހުޅުވާލައިފި

އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްއެމްއީ ބޭންކްގެ ޕޯޓަލް އަޕްގްރޭޑްކޮށް ލޯނަށް އެދުމުގެ ފުރުސަތު ހުޅުވާލައިފިއެވެ. އެސްއެމްއީ ބޭންކަކީ ކުދި ވިޔަފާރިތަކާއި މެދު ފަންތީގެ ވިޔަފާރިތަކަށް މާލީ އެހީ ފޯރުކޮށްދިނުމަށް މި ސަރުކާރުން އުފައްދަވާފައިވާ ބޭންކެވެ.

2020 ވަނަ އަހަރުގެ ނޮވެމްބަރ މަހު އެސްއެމްއީ ބޭންކްގެ ކަސްޓަމަރ ސަރވިސް ޕޯޓަލް ލޯންޗްކުރުމާއިއެކު މުޅިން އޮންލައިންކޮށް ލޯނަށް އެދި ހުށައަޅާ ރާއްޖޭގެ ފުރަތަމަ މާލީ އިދާރާއަށް އެސްއެމްއީ ބޭންކް ވަނީ ވެގެންގޮސްފައެވެ. މިއަހަރުގެ މާރޗް މަހުގެ ނިޔަލަށް އެސްއެމްއީ ބޭންކުން ވަނީ 1387 ފަރާތަކަށް 1.67 ބިލިއަން ރުފިޔާގެ ލޯނު ދޫކޮށްފައެވެ.

އެސްއެމްއީ ބޭންކްގެ އައު ޕޯޓަލް މިއަދު ލޯންޗްކުރުމާއިއެކު އެ ބޭންކުން ދޫކުރަމުންދާ 7 ލޯނަށް މިޕޯޓަލް މެދުވެރިކޮށް އެދެވޭނެއެވެ. އެއީ ދަނޑުވެރި ނަފާ، ކަނޑުފަޅު ނަފާ ލޯނު، ފަށާވިޔަފާރި، ވިޔަފާރި ތަރައްޤީ، ހަރުމުދާ، ވިޔަފާރި އެހީ އަދި ރަށުފަތުރު ލޯނެވެ. ޕޯޓަލް އަޕްޑޭޓްކުރުމަށްޓަކައި މިދިޔަ ދުވަސްތަކުގައި ބައެއް ލޯނުތަކަށް އެދުމުގެ ފުރުސަތު އެ އިދާރާއިން ވަނީ މެދުކަނޑާލާފައެވެ.

އެސްއެމްއީ ބޭންކުން މިހާތަނަށް ލޯނު ދޫކޮށްފައިވާ އަދަދު:

* ކަނޑުފަޅު ނަފާ - 2 މީހަކަށް 1 މިލިއަން ރުފިޔާ
* ފަށާ ވިޔަފާރި - 402 މީހަކަށް 297 މިލިއަން ރުފިޔާ
* ހަރުމުދާ - 241 މީހަކަށް 475 މިލިއަން ރުފިޔާ
* ވިޔަފާރި ތަރައްޤީ - 218 މީހަކަށް 266 މިލިއަން ރުފިޔާ
* ވިޔަފާރި އެހީ - 215 މީހަކަށް 159 މިލިއަން ރުފިޔާ
* ރަށުފަތުރު - 183 މީހަކަށް 396 މިލިއަން ރުފިޔާ
* ވިޔަފާރި ދިރުން - 82 މީހަކަށް 55 މިލިއަން ރުފިޔާ
* ދަނޑުވެރި ނަފާ - 35 މީހަކަށް 11 މިލިއަން ރުފިޔާ

އެސްއެމްއީ ބޭންކުން ބުނީ އެ ކޯޕަރޭޝަނުން ކަސްޓަމަރުންނަށް ފޯރުކޮށްދޭ ޚިދުމަތްތައް ފުޅާކޮށް، އަޕްގްރޭޑްކޮށްފައިވާ އެސްއެމްއީ ޕޯޓަލްއިން މިހާރު ލޯނަށް އެދުމުގެ އިތުރުން، ލޯނުގެ އެކި މަރުހަލާތަކުގެ އަޕްޑޭޓް ބެލުމާއި، ޕޯޓަލް މެދުވެރިކޮށް ފަސޭހަކަމާއެކު ލޯނާ ގުޅޭގޮތުން އެކި ކަންކަމުގައި އެހީތެރިކަން ލިބޭނެކަމަށެވެ.

އެގޮތުން އެޕޮއިންޓްމަންޓް ހަމަޖެއްސުމާއި، މައުލޫމާތު ސާފުކުރުމާއި، އެއްތަނަކުން ލޯނާ ގުޅޭ ހުރިހައި ލިޔެކިޔުންތަކާއި ކަސްޓަމަރުންގެ މައުލޫމާތު ބެލެހެއްޓޭނެކަމަށް އެ ބޭންކުން ބުނެއެވެ. އަދި ކަސްޓަމަރަކު ޚިޔާރުކުރައްވަން އެންމެ އެކަށޭނެ ލޯނެއް ދެނެގަތުމަށް އެހީތެރިވެދޭ ލޯން ޕްރޮޑަކްޓް ވިޒާޑެއްވެސް ވަނީ ގާއިމްކޮށްފައެވެ.