ރާއްޖެއިން މެލޭރިއާގެ ކޭސްއެއް ފެނިފައިވަނީ ރާއްޖެ ދަތުރުކުރި މީހެއްގެ ގައިންކަމަށާއި، ބަލި ފެތުރުމުގެ ފުރުޞަތު ނެތްކަމަށް ހެލްތު ޕްރޮޓެކްޝަން އެޖެންސީން ވިދާޅުވެއްޖެއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އެޗްޕީއޭއިން ވިދާޅުވީ، ރާއްޖެއިން ނައްތާލެވިފައިވާ ބައެއް ބަލިތަކުގެ ކޭސްތައް ރާއްޖެއަށް ދަތުރުކުރާ މީހުންގެ ތެރެއިން ބައެއް ފަހަރު ފެންނަކަމަށެވެ. ނަމަވެސް މިއީ ރާއްޖޭގައި ބަލި އޮތްކަމަށް އަދި، ބަލި ފެތުރުމުގެ ފުރުޞަތު އޮތް ކަމެއް ނޫންކަމަށް އެޗްޕީއޭއިން ވިދާޅުވެއެވެ.
އެޗްޕީއޭއިން ވިދާޅުވީ މިގޮތަށް އިމްޕޯޓެޑް ކޭސްތައް ފެނުމުން ޢަމަލުކުރާނެ ގޮތުގެ އުސޫލު ކަނޑައަޅާފައިވާކަމަށެވެ. އެގޮތުން ފެނުނު މެލޭރިއާ ކޭސްއާއި ގުޅިގެންވެސް އަޅަންޖެހޭ ފިޔަވަޅުތައް އަޅާފައިވާކަމަށެވެ.
ރާއްޖެއިން މުޅިން މެލޭރިއާ ނައްތާލާފައިވަނީ 2015ވަނަ އަހަރުއެވެ. ޑަބްލިއުއެޗްއޯއިން އެކަމުގެ ލިޔުން ރާއްޖެއާއި ހަވާލުކުރީ އެއަހަރު ޑިސެމްބަރު މަހުއެވެ.
މެލޭރިއާއަކީ ވަކި ބާވަތެއްގެ މަދިރީގެ ޒަރިއްޔާއިން ޖެހޭ ބައްޔެކެވެ. ރާއްޖެއަކީ މިސަރަޙައްދުގެ ޤައުމުތަކުގެ ތެރެއިންވެސް އެންމެ ފުރަތަމަ މި ބަލި ނައްތާލި ޤައުމެވެ. އޭގެ ފަހުން މެލޭރިއާ އައުޓްބްރޭކެއް ރާއްޖެއިން ފެނިފައެއް ނުވެއެވެ. ނަމަވެސް މިގޮތަށް ނައްތާލާފައިވާ ބަލިތަކުގެ އިމްޕޯޓެޑް ކޭސްތައް ބައެއް ޙާލަތްތަކުގައި ފެންނަމުންދެއެވެ.