މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން 13 ކުންފުންޏަކުން 21 މަންދޫބުން ޑަބްލިޔުޓީއެމް އެފްރިކާގައި ބައިވެރިވެެއްޖެއެވެ.
މި ފެއަރ ކުރިއަށްދަނީ 5-3 އޭޕްރީލް 2023 ގެ ނިޔަލަށް ދެކުނު އެފްރިކާގެ ކޭޕް ޓައުންގައެވެ.
އެމްއެމްޕީއާރުސީން ބުނީ މި ފެއަރގައި ބައިވެރިވުމުން އެފްރިކާ މާކެޓުގައި ދިވެހިރާއްޖޭގެ ބްރޭންޑް ހަރުދަނާކޮށް، ޓްރެވަލް ޓްރޭޑާ ގުޅުން ބަދަހިކޮށް، ދިވެހިރާއްޖޭގެ ފަރުތުރުވެރިކަމުގެ އެންމެ ފަހުގެ އަޕްޑޭޓްތަކާއި މައުލޫމާތު ފޯރުކޮށްދިނުމަށް ފުރުސަތު ލިބޭކަމަށެވެ. ފަތުރުވެރިކަމުގެ ދާއިރާގައި ހަރަކާތްތެރިވާ 6000 އަށްވުރެ ގިނަ ބޭފުޅުން ބައިވެރިވާ ޑަބްލިއުޓީއެމް އެފްރިކާއަކީ މި ސަރަހައްދުގެ އައުޓްބައުންޑް އަދި އިންބައުންޑް މާކެޓަށް އަމާޒުކޮށް ކުރިއަށްދާ ހަމައެކަނި ޓްރެވެލް ޓްރޭޑް ފެއަރއެވެ.
އެފްރިކާ ޓްރެވެލް ވީކް ބްރޭންޑްގެ ދަށުން 2014 ވަނަ އަހަރު ފެށުނު މި ފެއަރއަކީ ޓްރެވެލް ޓްރޭޑް މާކެޓަށް ގިނަ ފުރުސަތުތަކާއި ފައިދާތައް ފޯރުކޮށްދޭ ފެއަރއެކެވެ. މި ފެއަރގައި ކޯޕަރޭޓް ޓްރެވަލް ޑިސިޝަންގެ މެކެރުންނާއި ޕޮޓެންޝަލް އިންވެސްޓަރުންނާއި ޓުއަރ އޮޕަރޭޓަރުންނާއި ވީއައިޕީ ކްލައިންޓުންނަށް ޚިދުމަތް ދޭޓްރެވަލް އޭޖެންޓުންނާއި ޓްރެވަލް ޓްރޭޑް އިންޑަސްޓްރީގެ ޕްރޮފެޝަނަލުން ބައިވެރިވާނެއެވެ.
މި ހަރަކާތައް ހާއްސަކޮށް ތައްޔާރުކޮށްފައިވާ ދިވެހިރާއްޖޭގެ 60 އަކަފޫޓު ސްޓޭންޑުން ވަރަށް ފުރިހަމަކޮށް ރާއްޖޭގެ ރަށްތަކުގެ ރީތިކަމާއި އަމާންކަން ދައްކާލައެވެ. ރާއްޖޭގެ ސްޓޭންޑު ފަރުމާކޮށްފައިވަނީ އުފެއްދުންތެރި ބައްދަލުވުންތައް ބާއްވައި، ޓްރޭޑް ސާވޭ އަދި ސޯޝަލް މީޑިއާ އެމްޕްލިފިކޭޝަން ޕްރޮމޯޝަން ފަދަ، ސްޓޭންޑްގައި ކުރިއަށްދާ ހަރަކާތްތަކުގައި ފަސޭހައިން ބައިވެރިވެވޭނެ ގޮތަކަށެވެ.
މި ފެއަރގައި އެމްއެމްޕީއާރުސީ އާއި އިންޑަސްޓްރީ ޕާޓްނަރުން ދިވެހިރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި ތަޖުރިބާތަކާއި ސެގްމެންޓްތައް އިޝްތިހާރުކުރާނެއެވެ. މި ފެއަރގެ ސަބަބުން ދެކުނު އެފްރިކާ މާކެޓާއި ދިވެހިރާއްޖޭގެ ފަތުރުވެރިކަމުގެ ދާއިރާއާ ދެމެދު އޮންނަ ގުޅުން ހަރުދަނާކުރުމަށް ފުރުސަތު ލިބެއެވެ. ޑަބްލިއުޓީއެމް އެފްރިކާގައި އެމްއެމްޕީއާރުސީއިން ބައިވެރިވުމަކީ ލޯންގް ހޯލް ޗުއްޓީ ހޭދަކުރަން ބޭނުންވާ ފަރާތްތަކަށް އެންމެ މަގުބޫލް މަންޒިލެއްގެ ގޮތުގައި ދިވެހިރާއްޖެ ގާއިމްކުރުމަށާއި ފަތުރުވެރިކަމުގެ ޕްރޮޑަކްޓްތަކާއި ތަޖުރިބާތައް އިޝްތިހާރުކޮށް، އެކި ސެގްމަންޓްތައް ދައްކާލާ، ރާއްޖެއަށް އަންނަ ފަތުރުވެރިން އިތުރުކުރުމަށް އެހީތެރިވެދޭ ކަމެކެވެ.
ދެކުނު އެފްރިކާއަކީ ދިވެހިރާއްޖެއަށް ވަރަށް އުއްމީދީ މާކެޓެކެވެ. ފާއިތުވެދިޔަ އަހަރުތަކުގައި މި މާކެޓުން ދިވެހިރާއްޖެއަށް ޒިޔާރަތްކުރާ ފަރުތުވެރިންގެ އަދަދު ދަނީ އިތުރުވަމުންނެވެ. އަދި މި މާކެޓުން ދިވެހިރާއްޖެއަށް ދަތުރުކުރަން ގިނަ ބައެއް ޝައުގުވެރިކަން ފާޅުކުރަމުންދެއެވެ. މާރިޗް 25ގެ ނިޔަލަށް، ދެކުނު އެފްރިކާއިން 1،917 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.