މޯލްޑިވްސް ޕޯޓްސް ލިމިޓެޑް، އެމްޕީއެލްއިން މިދިޔަމަހު ކްލިއާކުރި ކޮންޓެއިނަރުގެ އަދަދު އޭގެކުރީ މަހާއި އަޅާބަލާއިރު އިތުރުވެފައިވާކަމަށް ތަފާސް ހިސާބުތަކުން ދައްކައިފިއެވެ.
މިދިޔަމަހު ކްލިއާކުރި ކޮންޓެއިނަރުގެ އަދަދު އޭގެކުރީ މަހާއި އަޅާބަލާއިރު އިތުރުވެފައިވާއިރު އެމްޕީއެލްއިން ވަނީ އެކުންފުނީގެ އޮޕަރޭޝަންތައް އަަވަސްކުރުމަށް ގިނަ މަސައްކަތްތަކެއް ކުރިއަށްގެންގޮސްފައެވެ.
އެމްޕީއެލްގެ ތަފާސް ހިސާބުތައް ދައްކާގޮތުން މިދިޔަމަހު 4172 ކޮންޓެއިނަރގެ މުދާ ވަނީ ކްލިއަރކޮށްފައެވެ. އޭގެތެރޭގައި 20 ފޫޓުގެ 2551 ކޮންޓެއިނަރާއި 40 ފޫޓުގެ 1621 ކޮންޓެއިނަރ ހިމެނެއެވެ. އެއީ އެވަރެޖްކޮށް ދުވާލެއްގެ މައްޗަށް 187 ކޮންޓެއިނަރެވެ. މިއީ ފެބްރުއަރީމަހާއި އަޅާބަލާއިރު %31 އިތުރު އަދަދެކެވެ. ފެބްރުއަރީމަހު ދުވާލެއްގެ މައްޗަށް ކްލިއާ ކޮށްފައިވަނީ 143 ކޮންޓެއިނަރެވެ.
Statistics of Cargo Operations for the month of March 2023 at Malé Commercial Harbour. #PortMvStats pic.twitter.com/wlpEifS7Tw
— Maldives Ports Limited (@Portmv) April 4, 2023
ތަފާސް ހިސާބުތައް ދައްކާގޮތުން އެމްޕީއެލް ބަނދަރަށް މިދިޔަަމަހު ވަނީ 30 ކޮންވެންޝަނަލް ބޯޓާއި 10 ކޮންޓެއިނަރ ބޯޓު ބަނދަރުކޮށްފައެވެ.
އެމްޕީއެލްއިން ދޭ ޚިދުމަތްތައް އަވަސްކުރުމަށް އެ ކުންފުނިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މީގެކުރިއާ އަޅާބަލާއިރު އެމްޕީއެލްއިން މުދާ ކްލިއަރކުރުމަށް ނަގާ ވަގުތު ވަނީ އެތައް ގުނައަކުން ކުޑަވެފައިކަމަށް އެ ކުންފުނިން ބުނެއެވެ. އަދި އެކުންފުނީގެ ޑިޖިޓަލައިޒޭޝަން މަސައްކަތުގެ ދަށުން ފަސޭހަކަމާއިއެކު މުދާ ގެންނަން ބޭނުންވާ ފަރާތްތަކަށް ބޭނުންވާ ހުރިހާ މަޢުލޫމާތެއް އެއްތަނަކުން ލިބޭނެ އިންތިޒާމު މިހާރު ވަނީ ހަމަޖައްސާފައެވެ.