ކެނޑިޑޭޓަކު ނެރެފިނަމަ، ކަންތައް ކުރައްވާނެ ގޮތެއް ނިންމަވާނީ ޖޭޕީއާ މަޝްވަރާކުރެއްވުމަށްފަހު: މިއުވާން
ކުރިއަށް އޮތް ރިޔާސީ އިންތިޚާބުގައި ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީން ކެނޑިޑޭޓަކު ނެރެފިނަމަ، އެޕާޓީއާއިމެދު ކަންތައް ކުރައްވާނެ ގޮތެއް ނިންމަވާނީ ރައީސުލްޖުމްހޫރިއްޔާ ޖުމްހޫރީ ޕާޓީއާއި މަޝްވަރާ ކުރެއްވުމަށް ފަހުގައި ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢްވާން މުޙައްމަދު ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ކެންޑިޑޭޓަކު ނެރެ، އެ ޕާޓީން އިސްވެ އޮވެ ޕާޓީތަކާއެކު ކޯލިޝަނަކުން ވާދަކުރަން އިއްޔެ ބޭއްވި އެޕާޓީގެ ކައުންސިލް ބައްދަލުވުމުގައި ވަނީ ނިންމާފައެވެ. ނަމަވެސް އެޕާޓީން އަދި މިހާތަނަށް ނެރޭނެ ކެނޑިޑޭޓެއް ކަނޑައަޅާފައިނުވެއެވެ.
ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރުމަށް އެޕާޓީގެ ކައުންސިލުން ނިންމި ނިންމުމާއި ގުޅިގެން ރައީސުލްޖުމްހޫރިއްޔާގެ އޮފީހުގެ ތަރުޖަމާން މިއުވާން ވިދާޅުވީ ރިޔާސީ އިންތިޚާބުގައި ރައީސުލްޖުމްހޫރިއްޔާ ވާދަކުރެއްވުމަށް ނިންމަވައި، އެކީގައި ކުރިއަށްދާން ކޯލިޝަން ހެދުމަށް ޖުމްހޫރީ ޕާޓީއަށް ރައީސް ފޮނުއްވި ސިޓީގެ ޖަވާބެއް އަދި ލިބިފައި ނުވާކަމަށެވެ. ރިޔާސީ އިންތިޚާބުގައި އެއް ކޯލިޝަނެއްގައި ދެކެނޑިޑޭޓަކު ތިބެގެން މަސައްކަތް ކުރުމަކީ ފަސޭހަ ކަމަށް ނުވާނެކަން ފާހަގަކޮށް މިއުވާން ވިދާޅުވީ ޖޭޕީން ކެނޑިޑޭޓަކު ނެރޭ ހިސާބުން ރައީސުލްޖުމްހޫރިއްޔާ ޖޭޕީއާއިއެކު މަޝްވަރާ ކުރައްވާނެކަމަށެވެ.
އަދި ޖުމްހޫރީ ޕާޓީއާއެކު ސިޔާސީ މަސައްކަތް ކުރިއަށް ގެންދިއުމުގައި އިތުރު ގޮތްތަކެއް ނިންމަވާނީ އެމަޝްވަރާތަކަށް ފަހުކަމަށް މިއުވާން ވިދާޅުވިއެވެ. ވެރިކަން ކުރާ ކޯލިޝަންގައި ހިމެނޭ ޕާޓީތަކަށް އެކީގައި ކުރިއަށް ދިއުމަށް ރައީސް ފޮނުވި ސިޓީގެ ޖަވާބު ދެއްވައި ރައީސް ޞާލިހާއިއެކު ކުރިއަށް ދިއުމަށް އަދާލަތު ޕާޓީން ވަނީ ނިންމާފައެވެ. ސިޓީގެ ޖަވާބު އެމްއާރުއެމްއާއި، ޖުމްހޫރީ ޕާޓީން އަދި ދީފައި ނުވެއެވެ.
ރިޔާސީ އިންތިޚާބުގައި ރައީސް ޞާލިހާއިއެކު ކުރިއަށްދާން އެމްޑީއޭއިންވެސް ވަނީ ކޯލިޝަން ހަދާފައެވެ. އަންނަ ރިޔާސީ އިންތިޚާބުގައިވެސް ވާދަކޮށް ޚިދުމަތް ކުރުމަށް ބޭނުންވަނީ ކޯލިޝަނެއްގެ ތެރެއިންކަމަށް ރައީސް ޞާލިހު ވަނީ ވިދާޅުވެފައެވެ.
ރިޔާސީ އިންތިހާބުގައި ވާދަކުރާނެކަން އިއުލާންކޮށްފައިވަނީ އެމްޑީޕީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުﷲ ޔާމީނާއި އެމްއެންޕީގެ ރައީސް މުހައްމަދު ނާޒިމްއެވެ. ނަމަވެސް ރައީސް ޔާމީންގެ މައްޗަށް މަނީ ލޯންޑަރިންގއާއި ރިޝްވަތު ހިފުމުގެ ކުށް ސާބިތުވެ، ޖަލު ހުކުމެއް އިއްވާފައިވާތީ އެމަނިކުފާނަށް އިންތިޚާބުގައި ވާދަކުރުމުގެ ފުރުސަތު ވަނީ ހަނިވެފައެވެ.