މޯލްޑިވްސް އިސްލާމިކް ބޭންކް، އެމްއައިބީގެ 12 ވަނަ އަހަރީ ދުވަސް ފާހަގަކުރުމުގެ ގޮތުން ގިނަ ހަރަކާތްތަކެއް ކުރިއަށްގެންދިއުމަށް ނިންމައިފިއެވެ.
ދިވެހިރާއްޖޭގައި ޝަރީއާގެ އުސޫލުން ހިންގާ ފުރަތަމަ ބޭންކް، މޯލްޑިވްސް އިސްލާމިކް ބޭންކު ރަސްމީކޮށް ހުޅުވީ 7 މާރޗް 2011ގައެވެ.
މޯލްޑިވްސް އިސްލާމިކް ބޭންކު، އެމްއައިބީން ބުނީ ބޭންކަށް 12 އަހަރު ފުރުން ފާހަގަކުރުމަށް ހޮނިހިރުދުވަހު ވަރަށް ހާއްސަ ހަރަކާތްތަކެއް އޮންނާނެކަމަށެވެ. އެގޮތުން އިސްލާމިކް ޔުނިވާސިޓީގައި ކުރިއަށްދާ އިސްލާމިކް ފައިނޭންސް އެގްޒިބިޝަންގައި އެމްއައިބީގެ އެކި ވަޒީފާތަކަށް ވޯކިން އިންޓަވިއު އޮންނާނެކަމަށް އެބޭންކުން މައުލޫމާތުދެއެވެ.
އެމްއައިބީން ވޯކްއިން އިންޓަވިއުއަށް ހުޅުވާލާފައިވާ ވަޒީފާގެ ފުރުސަތުތަކުގެ ތެރޭގައި ކަސްޓަމަރ ސާވިސް ރިޕްރެޒެންޓޭޓިވް އަދި ކޯލް ސެންޓަރ ރިޕްރެޒިންޓޭޓިވް ހިމެނެއެވެ.
މި އެކްޒިބިޝަން ކުރިއަށްދާނީ އަންނަ ހޮނިހިރު ދުވަހުގެ 9:30 އިން ހަވީރު 6:00 އަށްކަމަށް އެމްއައިބީއިން ބުނެއެވެ.
އިސްލާމިކް ޔުނިވާސިޓީގައި ބާއްވާ އެމްއައިބީ އައިފެމް ( މޯލްޑިވްސް އިސްލާމިކް ބޭންކް އިސްލާމިކް ފައިނޭންސް އެގްޒިބިޝަން އޮފް މޯލްޑިވްސް ) އަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް އުމްރާ ދަތުރެއް ލިބޭނެކަމަށް އައިޔޫއެމްއިން ބުނެއެވެ.
މި ދަތުރު ސްޕޮންސާކޮށްފައި ވަނީ ޔަލަމްލަމް ހައްޖް އެންޑް އުމްރާ ގްރޫޕްގެ ފަރާތުންނެވެ.މިއީ އިސްލާމިކް ފައިނޭންސަށް ޚާއްސަކޮށްގެ ރާއްޖޭގައި މިފަދަ އެގްޒިބިޝަނެއް ބާއްވާ ފުރަތަމަ ފަހަރެވެ.
އެމްއައިބީގެ 12 ވަނަ އަހަރީ ދުވަހާއި ގުޅިގެން އެބޭންކުން ވަނީ އެއްދުވަހުން އުޖާލާގެ ނަމުގައި ހަރާކާތެއްވެސް ކުރިއަށްގެންދިއުމަށް ރާވާފައިއެވެ. މިހަރާކަތުގެ ތެރެއިން އުޖާލާ ދިރިއުޅުން ފެސިލިޓީއަށް އެދި ހުށަހަޅަންޖެހޭ ލިޔެކިޔުންތައް ހަމަކޮށްގެން ބޭންކަށް ދިޔުމުން އުޖާލާ ފެސިލިޓީ ހަމަޖައްސައިދޭނެކަމަށް އެބޭންކުން ބުނެއެވެ.
މިހަރަކާތް ކުރިއަށްދާނީ ހޮނިހިރު ދުވަހު ހެނދުނު 10:00 އިން ހަވީރު 3:00 އަށެވެ.
އަހަރީ ދުވަހުގެ ހަރަކާތްތަކުގެ ތެރެއިން އެމްއައިބީގެ އެކައުންޓް ހުޅުވުމުގެ ހަރަކާތެއްވެސް ކުރިއަށްގެންދިއުމަށްވެސް ވަނީ ރާވާފައިއެވެ. ހެނދުނު 9:30 އިން މެންދުރު 2:00އަށް ކުރިއަށްދާ މިހަރާކާތުގެ ތެރެއިން އެކައުންޓް ހުޅުވުމުގެ ޚިދުމަތް އަވަހަށް ލިބޭނެކަމަށް އެބޭންކުން ބުނެއެވެ. އަދި އެމްއައިބީގެ އެކި ޚިދުމަތްތަކުގެ މަޢުލޫމާތު ހިއްސާކުރުމަށް ހުޅުމާލެ ދުވާ ޓްރެކްގައި ޓެންޓްތައްވެސް ހުންނާނެކަމަށް އެބޭންކުން ބުނެއެވެ.
މޯލްޑިވްސް އިސްލާމިކް ބޭންކަކީ ދިވެހި ސަރުކާރުގެ 15 އިންސައްތަ ހިއްސާއާއި އިސްލާމިކް ކޯރޕަރޭޝަން ފޮރ ދަ ޑިވެލޮޕްމަންޓް އޮފް ދަ ޕްރައިވެޓް ސެކްޓަރ، އައި.ސީ.ޑީގެ 85 އިންސައްތަ ހިއްސާއާއެކު އުފައްދާފައިވާ ބެންކެކެވެ.