ތަފާތެއްނެތި ސަރުކާރުންދޭ ޚިދުމަތުގެ އެންމެބޮޑު ދައުރެއް އޮތީ ކައުންސިލްތަކުގައި: ނައިބު ރައީސް
އެއްވެސް ތަފާތެއްނެތި ސަރުކާރުން ރަށްރަށަށް ފޯރުކޮށްދޭ ޚިދުމަތުގެ އެންމެބޮޑު ދައުރެއް އޮތީ ކައުންސިލްތަކުގައި ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މޯލްޑިވްސް އިނިްސްޓިޓިއުޓް އޮފް ލޯކަލް ގަވަރނަންސް އިފްތިތާހު ކުރެއްވުމަށްފަހު ވާހަކަފުޅު ދައްކަވަމުންނެވެ.
މިރަސްމިއްޔާތުގައި ވާހަކަފުޅު ދައްކަވަމުން ނައިބް ރައީސް ވިދާޅުވީ ލާމަރުކަޒީ އުސޫލުން އިދާރީ ދާއިރާތައް ހިންގުމަށް ކައުންސިލްތަކަށް ބޮޑެތި އިޚްތިޔާރުތަކާއި ބާރުތައްދީގެން މަރުކަޒީކޮށް ހުރި ބާރުތައް ދޫކޮށްލުމުގެ މުހިންމު މަސައްކަތްތަކެއް މިސަރުކާރުން ކޮށްފައިވާކަމަށެވެ. ޒަމާނުއްސުރެ މާލެއަށް ޖަމާވެފައިވާ އެތައް ބާރުތަކަކާއި، މަސްއޫލިއްޔަތުތަކެއް ކޮންމެ ރަށެއްގައިހުރި ކޮންމެ މީހަކަށްވެސް ފަސޭހައިން ލިބޭނެ ޖާގަ މިސަރުކާރުން ތަނަވަސް ކޮށްދީފައިވާ ކަމަށް ނައިބު ރައީސް ވިދާޅުވިއެވެ.
"އަޅުގަނޑުމެންނަށް މިރާއްޖޭގެ ވަކި ކުޑަރަށަކަށް ވީތީ އިހުމާލު ނުވެވޭނެ. އަޅުގަނޑުމެންނަށް ކުޑަ ރަށަކަށްވިޔަސް ބޮޑު ރަށަކަށް ވިޔަސް އަދި ސިޓީއަކަށް ވިޔަސް އެތަނެއްގައި ދިރިއުޅޭ ރައްޔިތުންނަށް މީހުންނަށް ބޭނުންވާ ކަންތައްތައް ފުރިހަމަކޮށްދޭން ޖެހޭ. މިހުރިހާ ކަމެއްގައިވެސް އެންމެ މުހިންމު ދައުރެއް އަދާކުރާނެ ބަޔަކީ ކައުންސިލްތައް. ކައުންސިލްތައް ބާރުވެރިވި ވަރަކަށް، ގާބިލްވި ވަރަކަށް ކެޕޭސިޓީ ހައިވި ވަރަކަށް ފަސޭހަ ވެގެންދާނެ." ނައިބު ރައީސް ވިދާޅުވިއެވެ.
އެމަނިކުފާނު ވިދާޅުވީ ކައުންސިލްތަކަށް ޤާނޫނުގެ ތެރެއިން އެތައް ފުރުސަތެއް ހުޅުވާލެވިފައިވާކަމަށެވެ. ނަމަވެސް އޮތް ގޮންޖެހުމަކީ ކައުންސިލްތައް ހިންގުމުގައި އިދާރީ އަދި ފަންނީ މީހުން ނެތުން ކަމަށް ނައިބު ރައީސް ވިދާޅުވިއެވެ. އިފްތިތާހު ކުރެވުނު އިންސްޓިޓުޓަކީ މިދާއިރާއިން ފަންނީ ގާބިލް އެތައްބަޔަކު އުފެދިގެންދާނެ އިންސްޓިޓުޓަކަށް ވެގެންދާނެ ކަމަށް ނައިބު ރައީސް ވިދާޅުވިއެވެ.
"އަޅުގަނޑުމެންނަށް މިހުރިހާ މަސައްކަތްތަކެއްގެ ތެރެއިންވެސް އަޅުގަނޑުމެން ބޭނުންވެގެން މިއުޅޭ ކަމަކީ ރަށްރަށުގެ ރައްޔިތުންނަށް ކުރީގަ ދަތި އުދަނގުލުން ކަންތައްތައް ޚިދުމަތްތައް ހޯދި ފަރާތްތަކަށް ފަސޭހަ ކޮށްދިނުން. ސަރުކާރުގެ ކޮންމެ ކަމެއްގެވެސް އަމާޒުހުރީ، ރަށުގަ ތިބެގެން ކަންތައްތައް ފަސޭހަ ވެގެންދިއުން. ސިއްޚީ ކަންތައްތަކަށް ވިޔަސް، އަދި ތައުލީމީ ކަންތައްތަކަށް ވިޔަސް ވަޒީފާގެ ފުރުސަތު ތަކަށް ވިޔަސް، އަދި ރަށުގައި ލިބެންޖެހޭ އެހެނިހެން ކަންތައްތައްވެސް ވަރަށް ބޮޑު އަހައްމިޔަތެއް މިސަރުކާރުން ދޭކަންތައްތައް މިހިރީ." ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ މިސަރުކާރުން ކައުންސިލްތަކުގެ ދައުރު 3 އަހަރުން 5 އަހަރަށް ބަދަލުކޮށްދެއްވި ކަމަށެވެ. އަންހެނުންގެ ބާރުވެރިކަން އިތުރުކުރުމަށް، ކައުންސިލްތަކުން އަންހެނުންނަށް ޚާއްސަ ޖާގަތަކެއް ކަނޑައަޅައި، އަންހެނުންގެ ކޮމެޓީތައްވެސް އުފައްދަވާފައިވާކަމަށެވެ. ރާއްޖެއަކީ ޖަޒީރާ ގޮތަކަށް އޮތް ޤައުމަކަށް ވާއިއިރު، ބޭނުންވާ ތަރައްޤީ ހާސިލް ކުރެވޭނީ ލާމަރުކަޒީ އުސޫލުން ހިންގޭނެ ގާބިލް ހިންގުންތެރި ބަޔަކު އުފެއްދިގެންކަމަށް ނައިބު ރައީސް ވިދާޅުވިއެވެ.