ސިޔާސީ ޕާޓީތައް ހިންގުމަށް މިއަހަރުގެ ބަޖެޓުން ފައިސާ ދިނުމަށް ކަނޑައެޅި ޕާޓީތަކުގެ ތެރެއިން އަދާލަތު ޕާޓީއާއި، އެމްއެންޕީގެ މެމްބަރުންގެ ޢަދަދު 10،000 އަށްވުރެ ދަށްވެއްޖެއެވެ.
ސިޔާސީ ޕާޓީތައް ހިންގުމަށް މިއަހަރުގެ ބަޖެޓުން ކަނޑައެޅުއްވި ފައިސާ 6 ޕާޓީއަކަށް ދޫކުރަން އިލެކްޝަންސް ކޮމިޝަނުން ނިންމީ މިދިޔަ އަހަރު ބަޖެޓް ފާސްކުރުމުގެ ކުރިން ޕާޓިތަކުގައި މެންބަރުން ތިބި ޢަދަދަށް ރިޔާޢަތްކޮށެވެ. ފައިސާ ދޫކުރަން ނިންމާފައިވަނީ އެމްޑީޕީ، ޕީޕީއެމް، ޖުމްހޫރީ ޕާޓީ، އެމްޑީއޭ، މޯލްޑިވްސް ނޭޝަނަލް ޕާޓީ (އެމްއެންޕީ) އަދި އަދާލަތު ޕާޓީއަށެވެ. މިޕާޓީތަކަކީ ސިޔާސީ ޕާޓީތަކުގެ ތެރެއިން ބަޖެޓް ފާސްކުރި ވަގުތާ ހަމައަށް 10،000 މެމްބަރުން ހަމަވާ ޕާޓީތަކެވެ.
އިލެކްޝަންގެ ދަފްތަރުގައި އޭރު މި ހަ ޕާޓީގެ މެމްބަރުންގެ އަދަދު 10،000 އަށްވުރެ އިތުރު ނަމަވެސް އިލެކްޝަނުން އެންމެ ފަހުން އާންމުކޮށްފައިވާ މިދިޔަ އަހަރުގެ ޑިސެމްބަރު މަހުގެ ތަފާސް ހިސާބުތަކަށް ބަލާއިރު، ބަޖެޓުން ފައިސާ ދޭން ނިންމި އަދާލަތު ޕާޓީއާއި، އެމްއެންޕީގެ މެމްބަރުން އަދަދު ވަނީ 10،000 އަށްވުރެ ދަށަށް ގޮސްފައެވެ.
އިލެކްޝަންސް ކޮމިޝަނުން ހިއްސާކުރި ތަފާސް ހިސާބުތަކުގައި ވާގޮތުން، އަދާލަތު ޕާޓީގައި ތިބީ 9،765 މެމްބަރުންނެވެ. އެމްއެންޕީގައި ތިބީ 9،937 މެމްބަރުންނެވެ.
ސިޔާސީ ޕާޓީތައް ހިންގުމަށް، މިއަހަރުގެ ބަޖެޓުން 36,896,088.00 ( ތިރީސް ހަމިލިއަން އަށްސަތޭކަ ނުވަދިހަ ހަހާސް އަށްޑިހަ އަށް) ރުފިޔާވަނީ ކަނޑައަޅާފައެވެ. މީގެ ތެރެއިން އަދާލަތު ޕާޓީއަށާއި، އެމްއެންޕީއަށް ދިނުމަށް ނިންމާފައިވަނީ ކޮންމެ ޕާޓީއަކަށް 2.4 މިލިޔަން ރުފިޔާއެވެ.
މިއަހަރު ބާއްވާ ރިޔާސީ އިންތިޚާބުގައި އަދާލަތު ޕާޓީން ވަނީ ވެރިކަން ކުރާ ކޯލިޝަންގައި ހިމެނޭ މައި ޕާޓީ އެމްޑީޕީއާއިއެކު ކޯލިޝަންގެ ތެރެއިން މަސައްކަތް ކުރުމަށް ނިންމާފައެވެ. އަދި އެމްއެންޕީން ވަނީ ރިޔާސީ އިންތިޚާބުގައި ވާދަކުރުމަށް ނިންމާފައެވެ.