އަންނަ މޭ މަހުގެ 1 ވަނަ ދުވަހުން ފެށިގެން ސިއްޙީ ދާއިރާގެ މުސާރަ ބޮޑުވެގެންދާނެކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އިޢުލާންކުރައްވައިފިއެވެ.
ރާއްޖޭގެ ޚިދުމަތުގެ މައި ދާއިރާތަކުގެ މުވައްޒަފުންގެ ޚިދުމަތަށް އެކަށީގެންވާ މުސާރައެއް ދިނުމަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ ވަޢުދެކެވެ.
އެގޮތުން ތަޢުލީމީ ދާއިރާގެ މުވައްޒަފުންގެ މުސާރަ ބޮޑުކުރުމަށްފަހު، ދެން ބޮޑު ކުރައްވާނީ ސިއްހީ ދާއިރާގެ މުވައްޒަފުންގެ މުސާރަކަން ރައީސުލްޖުމްހޫރިއްޔާ އިޢުލާނުކުރެއްވީ 2022 ވަނަ އަހަރުގެ ރިޔާސީ ބަޔާނުގައެވެ. އެގޮތުން މިކަން ތަންފީޒުކުރުމަށް، މުވައްޒަފުންގެ މުސާރައިގެ އޮނިގަނޑު ދިރާސާ ކުރުމާއި، އަދި ގެންނަން ޖެހޭ ބަދަލުތަކާއި ގުޅުންހުރި މަސައްކަތްތައް މިހާރު ދަނީ ކުރިއަށެވެ.
މަޖުލީހުގައި މިއަހަރުގެ ރިޔާސީ ބަޔާން އިއްވަވާ ރައީސުލްޖުމްހޫރިއްޔާ ވިދާޅުވީ މުސާރައާއި ގުޅޭގޮތުން މިދިޔަ އަހަރު ގެނެވުނު ހެޔޮ ބަދަލާއެކު އާއިލާތަކުގެ އާއިލާތަކުގެ ދިރިއުޅުމުގެ ޙާލަތު ރަނގަޅުވެއްޖެކަމަށެވެ. އެގޮތުން ރައީސް ދެންނެވިގޮތަށް ތަޢުލީމީ ދާއިރާގެ ޕޭ ހާމަނައިޒްކޮށް، ސަރުކާރުން އިޢުލާނުކުރި ތާރީޚާއި އެއްގޮތަށް މުސާރައަށް ބޮޑު ބަދަލެއް ގެނެސްފައިވާކަމަށް ރައީސް ވިދާޅުވިއެވެ.
"މިހާރު ކުރިއަށް އޮތީ ޞިއްޙީ ދާއިރާ. އިރާދަ ކުރެއްވިއްޔާ އަންނަ މޭ މަހުގެ 1 އިން ފެށިގެން ޞިއްޙީ ދާއިރާގެ މުވައްޒަފުންގެ މުސާރަ ބޮޑުވެގެންދާނެެ" ރައީސް ވިދާޅުވިއެވެ.
މިއަހަރުގެ ބަޖެޓުގައި 2.4 ބިލިއަން ރުފިޔާ މުވައްޒަފުންގެ މުސާރައަށް ކަނޑައަޅާފައިވެއެވެ. އޭގެތެރެއިން 500 މިލިއަން ރުފިޔާ ކަނޑައަޅާފައިވަނީ، މުވައްޒަފުންގެ މުސާރަ ބޮޑުކުރުމަށެވެ. އަދި ސިއްޙީ ދާއިރާއަށް މުވައްޒަފުން އިތުރުކުރުމަށް 40.3 މިލިއަން ރުފިޔާ ކަނޑައަޅާފައިވެއެވެ.
މިއަހަރަށް މަޖިލީހުން ފާސްކުރި ބަޖެޓަށް ބަލާއިރުވެސް، އެންމެ ބޮޑު ބަޖެޓެއް ސަރުކާރުން ކަނޑައަޅުއްވާފައިވަނީ ސިއްޙީ ދާއިރާގެ ކުރިއެރުމަށެވެ.
މުޅި ސިއްޙީ ދާއިރާއަށް ބާލާއިރު މިއަހަރު 5 ބިލިއަން ރުފިޔާގެ ބަޖެޓެއް މި ދާއިރާއިން ހުށައަޅާފައިވެއެވެ. އޭގެތެރެއިން 4.1 ބިލިއަން ރުފިޔާއަކީ ރިކަރަންޓް ޚަރަދެވެ. އަދި ކެޕިޓަލް ޚަރަދުގެ ގޮތުގައި 891 މިލިއަން ރުފިޔާ ކަނޑައަޅާފައިވެއެވެ.