އިންޑިއާއަކީ ދިވެހިރާއްޖެއާއި އެންމެ ގާތް، އެންމެ އިތުރުބާކުރެވޭ އެއް ބައިވެރިޔާކަމަށާއި، އެކަން ފާއިތުވި އަހަރުތަކުގެ ތެރޭގައިވެސް ސާބިތުކޮށްދީފައިވާކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ އިންޑިއާގެ 74 ވަނަ ޖުމްހޫރީ ދުވަސް ފާހަގަކުރުމަށް ދަރުބަރުގޭގައި ބޭއްވި ޚާއްސަ ޙަފްލާގައި ވާހަކަފުޅުދައްކަވަމުންނެވެ.
އިންޑިއާގެ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވަނީ އިންޑިއާގެ ރައީސް ދްރައުޕަތީ މުރްމުއާއި، ބޮޑުވަޒީރު ނަރެންދުރަ މޯދީ އަދި އިންޑިއާގެ ރައްޔިތުންނަށް، އެމަނިކުފާނުގެ އަމިއްލަ ނަންފުޅުގައާއި، ދިވެހި ރައްޔިތުންގެ ނަމުގައި ދުވަހުގެ ތަހުނިޔާއާއި ހެޔޮއެދުންތައް ފޮނުއްވާފައެވެ.
ދަރުބާރުގޭގައި ބޭއްވި ޚާއްސަ ޙަފްލާގައި ވާހަކަފުޅުދައްކަވަމުން ރައީސް ވިދާޅުވީ، އިންޑިއާއަކީ ޤައުމު ތަރައްޤީކުރުމަށް ސާބިތުކަމާ ވިލުންތެރިކަމާއެކު މަސައްކަތްކުރާ ޤައިމެއްކަމަށެވެ. އަދި އިންޑިއާއަކީ ދުސްތޫރީ ވެރިކަން ދެމެހެއްޓުމުގައިވެސް ނަމޫނާ ދައްކަމުންދާ ޤައުމެއްކަމަށެވެ. ޤައުމުގެ ރައްޔިތުންގެ މެދުގައިވާ ތަފާތުތަކާއެކުވެސް، އެއްބައިވަންތަކަން ކަށަވަރުކޮށް ހުރިހާ ރައްޔިތުންނަށް ޤާނޫންނުން ލިބިދޭ ޙައްގުތައް ޙިމާޔަތް ކުރަމުންދާކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި އިންޑިއާކީ އަދުލުވެރި، ހަރުދަނާ ޝާމިލު ސިޔާސަތެއް ތަންފީޒުކުރަމުންދާ ޤައުމެއްކަމަށްވެސް ވިދާޅުވިއެވެ.
މުޖުތަމަޢުގައި ހަމަހަމަކަން ޤާއިމުކުރެވިދާނެކަމުގެ ނަމޫނާ އިންޑިއާއިން ދުނިޔެއަށް ދައްކަމުންދާކަމުގައިވެސް ރައީސް ވިދާޅުވިއެވެ. ކުރިއަށް އޮތް 25 އަހަރުގެ ތެރޭގައި، ދުނިޔޭގެ ދެވަނައަށް އިޤްތިޞާދީ ގޮތުން އެންމެ ވަރުގަދަ ޤައުމަށްވުމަށް ކުރަމުންދާ މަސައްކަތުގެ ޢަމާޒަށް އެ ޤައުމަށް ވާސިވޭވެނެކަން، ދުނިޔޭގެ އެހެން ޤައުމުތަކުންވެސް ޤަބޫލުކުރާކަމަށް އެމަނިކުފާނު ވިދާޅުވިއެވެ.
"އިންޑިއާގެ ކުރިއެރުމަށް އެ ޤައުމުން ކުރާ މަސައްކަތަށް ދުނިޔެ އަންނަނީ ތަރުޚީބުދެމުން. އަދި އެއްބައިވަންތަކަން ކުރިއެރުވުމަށް އިންޑިއާއިން ގެންގުޅޭ އުޞޫލުތަކުން ރާއްޖެއަށް ބޮޑު ހިތްވަރެއް ލިބޭ" ރައީސް ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، އިންޑީއާއިން ނަމޫނާ ދައްކަނީ ހަމައެކަނި އެ ޤައުމުގައި ނޫންކަމަށާއި، އަވަށްޓެރި ޤައުމުތަކާއެކު ގެންގުޅޭ "ވަން އަރތް، ވަން ފެމިލީ، ވަން ފިއުޗަރ" ޝިއާރު އާލާކުރުމުގައިވެސް އެ ޤައުމުގެ ދަޢުރު ފުޅާކަމަށެވެ. އަދި ޖީ 20ގެ ރިޔާސަތު އިންޑިއާއިން ބަަހައްޓަމުން އަންނައިރު އެކަމުގައިވެސް އިންޑިއާއިން ނަމޫނާ ދައްކާނެކަމާމެދު ޝައްކު ނުކުރައްވާކަމަށް އެމަނިކުފާނު ވިދާޅުވިއެވެ.
މީގެއިތުރުން ރައީސް ވަނީ އިންޑިއާއިން ރާއްޖެއަށް ދޭ އަޙަމިއްޔަތުކަމާއި، ބާއްވަމުންދާ ގާތްގުޅުން ފާހަގަކުރައްވާފައެވެ. އެގޮތުން އެ ޤައުމުގެ ނޭބަހުޑް ފަސްޓް ޕޮލިސީގެ ތެރެއިން، މިދިޔަ 4 އަހަރު ރާއްޖޭގެ ތަރައްޤީއަށް ބޮޑެތި އެހީ ދިންކަން ރައީސް ފާހަގަކުރެއްވިއެވެ.
"އިންޑިއާއަކީ އަބަދުވެސް އިތުބާރުކުރެވޭ، އަގު ވަޒަންކުރެވޭ ޤައުމެއް. ރާއްޖެއަށް ދިމާވި އެންމެ ދަތި ޙާލަތުތަކުގައިވެސް އެ ޤައުމުން ރާއްޖެއަށް އެތައް އެހީއެއް ދިން. ކޮވިޑްގެ ޙާލަތުގައިވެސް" ރައީސް ވިދާޅުވިއެވެ.
ރައީސް ވިދާޅުވީ، ކުރިއަށްއޮތްތަނުގައިވެސް ދެ ޤައުމުގެ ގާތް ގުޅުމުގެ ތެރެއިން މުހިއްމު މަސައްކަތްތަކެއް ކުރެވި، މި އުޅުން އިތުރަށް ވަރުގަވެގެންދާނެކަމަށް އުއްމީދު ކުރައްވާކަމަށެވެ.
އިންޑިއާއިން އަންނަނީ ރާއްޖޭގައި މިހާރު ކުރިއަށްގެންދާ އެންމެ ބޮޑެތި މަޝްރޫޢުތަކަށް އެހީތެރިކަން ދެމުންނެވެ. އެގޮތުން ގްރޭޓަރ މާލެ ކަނެކްޓިވިޓީ ބްރިޖާއި، ހަނިމާދޫ އިންޓަނޭޝަން އެއަރޕޯޓް ތަރައްޤީކުރުމާއި، އައްޑޫ ސިޓީގެ މަގުތައް ހެދުން ފަދަ މަޝްރޫޢުތައް ހިމެނެއެވެ.
އިންޑިއާގެ 74 ވަނަ ޖުމްހޫރީ ދުވަސް ފާހަގަކުރުމަށް ބޭއްވި ހަފްލާގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރާއި، ދައުލަތުގެ ޢިއްޒަތްތެރިންނާއި، ކެބިނެޓްގެ ވަޒީރުންނާއި، ރައްޔިތުންގެ މަޖިލީހުގެ މެންބަރުންގެ އިތުރުން ސަރުކާރުގެ އިސްމަޤާމުތަކުގައި ތިއްބެވި ބޭފުޅުން ބައިވެރިވެވަޑައިގެންނެވިއެވެ.
ރާއްޖެއާއި އިންޑިއާއާ ދެމެދު ސިޔާސީ ގުޅުން ޤާއިމުކޮށްފައިވަނީ 1965 ވަނަ އަހަރުގެ ނޮވެމްބަރު މަހުގެ 1 ވަނަ ދުވަހުއެވެ. ދެ ޤައުމުގެ ގުޅުމަށް 58 އަހަރު ވަނީ ފުރިފައެވެ.