މާލެއަތޮޅު ރަސްފަރި ފަރަށް އާގު ބޯޓެއް އުރި ލިބުނު ގެއްލުންތައް އިޔާދަކޮށް، ކުރިން އެފަރު އޮތްގޮތަށް ބަދަލުކުރުމުގެ މަސައްކަތް ކޮށްދޭނެ ބަޔަކު ހޯދުމަށް އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ހުޅުވާލައިފިއެވެ.
2021 ވަނަ އަހަރުގެ އޮގަސްޓްްމަހުގެ 19 ވަނަ ދުވަހު ރަސްފަރި ފަރަށް އަރާފައިވަނީ ޕެނަމާގެ "އެމް.ވީނަވިއޯސް އަމަރިލިސް" ކިޔާ ބޯޓެކެވެ. މި ބޯޓު އެރަށު ފަރަށް އަރާފައިވަނީ އިންޑިއާގެ ޓުޓިކޮރިން ބަނދަރުން ފުރައިގެން ސައުތު އެފްރިކާއަށް ދަތުރުކުރަމުން ދަނިކޮށެވެ. 19 މީހުންނާއި އެކު ދަތުރުކުރަމުންދިޔަ ބޮޑު އާގު ބޯޓު ރަސްފަރި ފަރަށް ބީހުނީ އެބޯޓްގެ އިންޖީނު ހޫނުވެގެން ނިންވާލާފައި އޮއްވާ އޮޔާ ގެންގޮހެވެ.
ބޯޓު ފަރަށް އެރިނަމަވެސް އެކަން ބޯޓުން ކަމާއި ބެހޭ ފަރާތްތަކަށް އަންގާފައެނުވެއެވެ. ރާއްޖޭގެ ކަމާއި ބެހޭ ފަރާތްތަކަށް އެކަން އެނގުނީ އެބޯޓު އެތަނުގައި އޮއްވާ ފެނިގެން އާއްމުންގެ ބަޔަކު ރިޕޯޓްކުރުމުންނެވެ. ބޯޓު ފަރަށް އެރުމުން ފަރުގެ 8.86 އަކަ މީޓަރުގެ ސަރަހަދެއް ހަލާކުވިއެވެ. އެކަމުގެ ބަދަލެއްގެ ގޮތުގައި ޖޫރިމަނާ ކުރި 10 މިލިއަން ޑޮލަރު އެ ބޯޓުން ވަނީ ދައްކާފައެވެ.
އީޕީއޭއިން ވަނީ ރަސްފަރި ފަރަށް ލިބުނު ގެއްލުން އިޔާދަކޮށްދިނުމުގެ މަސައްކަތް ކުރާނެ ބަޔަކު ހޯދުމުގެ މަސައްކަތް ފަށާފައެވެ. އެ އިދާރާއިން ވިދާޅުވީ މިކަމަށް ހިނގާ ހުރިހާ ޚަރަދެއް ދެނީ ފަރަށް އެރި ބޯޓުން ކަމަށެވެ. އަދި މީ ބޯޓެއް ފަރަކަށް އަރައިގެން ލިބުނު ގެއްލުންތައް އިޔާދަކުރުމަށް އެ ބަޔަކު ޚަރަދުކުރާ ފުރަތަމަ ފަހަރުކަމަށްވެސް އީޕީއޭއިން ވިދާޅުވެއެވެ.
ފަރު ކުރިން އޮތް ގޮތަށް ބަދަލުކުރުމަށް ކުރަންޖެހޭ ކަންކަން
- ހަލާކުވެފައިވާ މުރަކަތައް ދެނެގަތުމާއި ނާސަރީ ހެދުން
- ނާސަރީތައް ބަލަހައްޓާ އެތަން ތަން މޮނީޓަރކުރުން
- ނާސަރީގައި އާލާކުރާ މުރަކަތައް ރަސްފަރި ފަރުގައި އިންދުން
- އިންދާ މުރަކަތައް އަލާވާގޮތް ދުވަހުން ދުވަހަށް ބެލުން
- ދަތުރުފަތުރާ ލޮޖިސްޓިކް ކަންކަން ބެލެހެއްޓުން
- މި މަސައްކަތައް މެނޭޖްކޫރުމާއި ޕްރޮފެޝަނަލް އެހީތެރިކަން ދިނުން
މި މަސައްކަތް ކޮށްދިނުމަށް އެދޭ ރާއްޖެއާއި ރާއްޖޭގެ ބޭރުގެ ކުންފުނިތަކާއި އެންޖީއޯތަކުން މިމަހުގެ 26 ވަނަދުވަހުގެ ކުރިން ޝައުގުވެރިކަން ފާޅުކުރުމަށް އީޕީއޭއިން ވަނީ ހުޅުވާލާފައެވެ. އަދި މި މަސައްކަތް އަންނަ އަހަރު ފެށުމަށް މަސައްކަތް ކުރަމުން އަންނަކަމަށްވެސް އީޕީއޭއިން ވިދާޅުވެއެވެ.
ރަސްފަރި ފަރަކީ 1995އިން ފެށިގެން ހިމާޔަތްކޮށްފައިވާ ފަރެކެވެ. އަދި މިއީ މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަހައްދުވެސްމެއެވެ.