ހިސާބުތަކާއި ޢަދަދުތައް، އެނގެނީ މި ޚިދުމަތް ބޭނުންވާވަރު

މިނީ ބަހުގެ ވާހަކަތައް ދައްކާތާ އެތައް އަހަރެއްފަހުން ބަހުގެ ޚިދުމަތް ފެށީ މިދިޔަ އަހަރުގެ ސެޕްޓެމްބަރުމަހުގެ 5 ވަނަދުވަހުއެވެ. އޭރު މާލޭގައި ޓެކްސީ ހޯދުމަކީ ތަކުލީފު ބޮޑު ކަމެކެވެ. ބައެއް ފަހަރަށް ހެޔޮ ވަރުގެ ފަރުބަދައެއް ކެނޑުން ކަހަލަ ކަމެކެވެ. ޓެކްސީ ޑްރައިވަރުންގެ ޑިމާންޑުތައް އޮތީ ހައްދުންމަތީގައެވެ. އެމީހުން ބުނި އަގުތަކަށް އާނ ބަސް ނުބުނެގެން ދަތުރުތައް ހުއްޓާލާނެކަމުގެ އިންޒާރުވެސް ފުލުފުލުން ދިނެވެ.

މިކަންތައްގަނޑުގައި އޮއްވާ ބަހުގެ ޚިދުމަތް ފެށުމުން ބައެއް އުނދަގޫތަކާވެސް ބަސް ޑްރައިވަރުން ކުރިމަތިލިއެވެ. މަގުން ތަން ނުލިބުމާއި ބަސްމަޑުކުރަން ހަދާފައިވާ ޖާގަތަކުގައި ޕާކުކޮށްގެން ކަހާ އަތަށް ހިރުވާނުލައޭ ބުނާ ގޮތަށް އަޅާ ނުލާ ތިބި މީހުންނާއި ކާރުތައްވެސް މަދެއްނޫނެވެ.

ދެން އައީ ހުސް ޝަކުވާއެވެ. ބަސްތައް މާބޮޑީއެވެ. މަގަށް ނުކަތައެވެ. ޓްރެފިކް ބާރު ބޮޑުވަނީއެވެ. މި ހުރިހާ ވާހަކަތައް ދެއްކި މީހުންނަށް ރައްދުދިން އެންމެންވެސް ބުނީ އެއް ވާހަކައެކެވެ. ޕާކިންގ އެރިޔާތައް ނަގާ ސާފުކޮށްލާ ބަސްތައް ދުއްވި ނަމަވެސް މަޖީދީމަގުވެސް ދުއްވާލަން ފަސޭހަވި ވާހަކައެވެ. ދެންވެސް ދައްކަން ހުރި ވާހަކަތަކެއް ނުނިމުނެވެ. ބަހުގައި ހިލޭ ދަތުރުކުރަން ލިބުނު ދުވަސްވަރު މީހުން ދަތުރުކުރި ނަމަވެސް އަގު ނަގަން ފެށުމުން ބަހަށް އަރާނެ މީހަކު ނުވާނެކަމަށް ބައެއް ފަރާތްތަކުން ދިޔައީ ބުނަމުންނެވެ.

ދުވާލަކު 4000 ވުރެ ގިނަ މީހުން

ބަހުގެ ޚިދުމަތް ހިލޭ ދިން 4 ހަފްތާގެ ނަމްބަރުތަކަށް ބަލާއިރު ޖުމްލަ 257,863 (ދެލައްކަ ފަންސާސް ހަތް ހާސް އަށް ސަތޭކަ ފަސްދޮޅަސް ތިނެއް) މީހުން ވަނީ ބަހުގެ ޚިދުމަތް ހޯދާފައެވެ. ދަރިންނާއި ދުވަސްވީ އާއިލީ މެމްބަރުން ގޮވައިގެން ބަސް ތަޖުރިބާކޮށްލަން އެރި މީހުންވެސް މީގެ ތެރޭގައި މަދެއްނޫނެވެ.

ދެން އައީ 7 ރުފިޔާ ދީގެން ދަތުރަށް އަރަން ޖެހުނު ހިސާބެވެ. އޭގެ ފަހުގެ ނަމްބަރުތަކަށް ބަލާއިރުވެސް ބަހުގެ ޚިދުމަތް ބޭނުންކުރި މީހުންގެ އަދަދުން ޕަބްލިކް ޓްރާންސްޕޯޓް މީހުން ބޭނުންވާކަން އެނގެއެވެ. ހިސާބުތައް ހަދާލުމުން އެވެރެޖްކޮށް ދުވާލަކު 4000 ވުރެ ގިނަ މީހުން އަންނަނީ މާލޭގައި ބޭނުންކުރާ މިނީ ބަހުގެ ޚިދުމަތް ހޯދަމުންނެވެ.

■ އޮކްޓޯބަރުމަހު 132،281 މީހުން
■ ނޮވެމްބަރމަހު 127،772 މީހުން
■ ޑިސެމްބަރުމަހު 120،430 މީހުން

ޓެކްސީ ޑްރައިވަރުން ޝަކުވާއެއް ގެއްލުމެއް ނެތް

ބަހުގެ ޚިދުމަތް ފަށަން އުޅުނު ދުވަސްވަރު ޓެކްސީ ޑްރައިވަރުންނަށް އެތައް ހާހެއް ގެއްލުން ވެގެންދާނެކަމަށް ބުނެ އެ ވާހަކަ ނުދައްކާ މޭޒެއްނެތެވެ. ސައި ހޮޓާތަކާއި ކެފޭތަކާއި އެހެނިހެން ބައެއް ތަންތާގައިވެސް އެންމެ ވަރުގަދަ ބަހުސަކީ އޭރު މިއެވެ.

މާލޭގައި މިނީ ބަހުގެ ޚިދުމަތް ދޭންފެށިތާ 4 މަސްފަހުން އައި ބަދަލުގެ ވާހަކަ އަހާލުމުން ވާހަކަ މުޅިން ތަފާތެވެ. އެމީހުން ބުނީ ބަރާބަރަށް ކެރިގެން ދަތުރަށް ނުކުންނަމަ އެއްވެސް ގެއްލުމެއް ނެތި ރަނގަޅު އާމްދަނީއެއް ލިބޭކަމަށެވެ.

އަތޮޅުތެެރޭގައިވެސް ބަހަށް ޑިމާންޑް ބޮޑު

މިނީ ބަހުގެ ޚިދުމަތް އަތޮޅުތެރޭގައި ދެމުން އަންނަނީ އައްޑޫ ސިޓީ، ފުވައްމުލަކު ސިޓީ އަދި ލ. އަތޮޅުގައެވެ. އެއަތޮޅުތަކުގައިވެސް ބަހުގެ ޚިދުމަތް މުހިއްމުކަން އެނގެނީ މިދިޔަ 5 މަހުގެ ހިސާބުތަކަށް ބަލާލުމުންނެވެ.

އަބާދީގެ ގޮތުން ބޮޑު އަދި ބިމުގެ ސައިޒުންވެސް ބޮޑެތި މި އަތޮޅުތަކުގެ ޖުމްލަ ނަމްބަރުތަކުން ދުވާލެއްގެ މައްޗަށް 700 ވުރެ ގިނަ މީހުން ބަހުގައި ދަތުރުކޮށްފައި އެބަވެއެވެ. ޔަޤީނުންވެސް މިއިން ކޮންމެ މީހަކު ކުރިން ދަތުރަށްކުރި ޚަރަދު އެތައް ތަނުން މި ދަތުރުތަކުން ސަލާމަތްވާނެއެވެ. މި 3 އަތޮޅުން ޖުމްލަ 114،768 މީހުން ބަހުގެ ޚިދުމަތް ވަނީ ހޯދާފައެވެ.

■ ޖުލައިމަހު 16 މީހުން
■ އޮގަސްޓްމަހު 50،034 މީހުން
■ ސެޕްޓެމްބަރުމަހު 18،748 މީހުން
■ އޮކްޓޫބަރުމަހު 20،298 މީހުން
■ ނޮވެމްބަރުމަހު 25،672

ފެރީތައްވެސް ދުލެއް ނުކުރޭ

ދަތުރުފަތުރުގެ ފަސޭހަ ނިޒާމުން ރަށްތައް ގުޅުވާލުމުގެ މަސައްކަތް ފެށުނީ ބޮޑު ތިލަދުންމަތިންނެވެ. ހިތްގައިމު ފެރީ ލޯންޗުގައި ކުޑަ ޚަރަދެއްގައި އަތޮޅުތެރޭގައި ދަތުރުކުރަން ލިބުމުން ރަށު ބަންދުގައި ގިނަ ބަޔަކު ހުންނަން ބޭނުންނުވާކަން އެމް.ޓީ.ސީ.ސީގެ ރެކޯޑްތަކަށް އެރިއެވެ.

ފުރަތަމަ ސްޕީޑް ފެރީ ދަތުރުތައް ފެށި ޒޯން އެކެއްގައި ހިމެނޭ ހއ. އަތޮޅުން ޖޫންމަހުން ފެށިގެން ނޮވެމްބަރު މަހުގެ ނިޔަލަށް 54،536 މީހުން މި ޚިދުމަތް ބޭނުންކުރިއެވެ. މީ ދުވާލަކަށް ބަލާނަމަ އެވެރެޖްކޮށް 300 ވުރެ ގިނަ މީހުންނެވެ. ޖެހިގެން އޮތް ރަށަށް ޞިއްޚީ ޚިދުމަތެއް ހޯދަން ނޫނީ އެހެންވެސް ބޭނުމެއްގައި މިހާރު ދަތުކުރަނީ ވަރަށް ޖީބަށް ލުއިކޮށެވެ. ކުރިން އެތައް ހާހެކެވެ. މިހާރު ހާހަކާ ގާތްވެސް ނުކުރެއެވެ.

އެންމެފަހުން ޚިދުމަތް ފެށި ށ. އަތޮޅުންވެސް މިދިޔަ ދެ މަހުގެތެރޭގައި ގާތްގަޑަކަށް 16 ހާސް މީހުން މިނިޒާމުގެ ބޭނުން ހިފާފައި އެބަވެއެވެ.

ރަނގަޅު ބޮޑު ބަދަލެއް، ބޭނުންވި ބަދަލެއް

ރާއްޖެ ޓްރާންސްޕޯޓް ލިންކް، އާރް.ޓީ.އެލްގެ ޚިދުމަތާއެކު ދަތުރުފަތުރަށް ކުރަމުންދިޔަ ޚަރަދުތަކަށް ލުޔެއް ލިބިއްޖެއެވެ. މި ޚިދުމަތް ހޯދަމުން އަންނަ ހުރިހާ ހިސާބެއްގެ ރައްޔިތުންވެސް މިކަން ފާހަގަކުރެއެވެ. ހާސްކަމެއްނެތި، ޔަޤީންކަމާއެކު ދަތުރުކުރެވުމާއި، އަރާމުގައި އިނދެ މަންޒިލަށް ފޯރުމުގެ އިތުރުން ޖީބަށްލުއި ވުމެވެ.

މިދިޔަ 5 މަހުގެ ބަހާއި ފެރީގެ ތަފާސް ހިސާބުތަކަށް ބަލާލުމުން އާރް.ޓީ.އެލްގެ މި ޚިދުމަތަކީ ގިނަ ބަޔަކު ބޭނުންވާ ޚިދުމަތެއްކަން ސާފުވެއެވެ. އަދި މީ ބޭނުންވި ރަނގަޅު ހެޔޮ ބަދަލެއްކަންވެސް އެނގެއެވެ. ހުއްޓުމެއްނެތި ކުރިޔަށް ދާން ބޭނުންވާ ނިޒާމެއްކަންވެސް ބުނެދެއެވެ. މި ޚިދުމަތް ނުފެށޭ ހިސާބުތަކުންވެސް ތިބީ މި ނިޒާމުން ގުޅުވާލާނެ ދުވަހެއްގެ އިންތިޒާރުގައެވެ.