މިދުވަސްވަރު ރާއްޖޭގައި ލޮލު ރޯގާ ފެތުރޭ މިންވަރު އިތުރުވަމުން އަންނަކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވިދާޅުވެއްޖެއެވެ. ލޮލު ރޯގާ ފެތުރޭތީ އެ ބަލީގެ އަލާމާތްތައް ދެނެގަނެ ރައްކާތެރިކަމުގެ ފިޔަވަޅު އެޅުމަށް އެޗްޕީއޭން ވަނީ އިލްތިމާސްކޮށްފައެވެ.
ލޮލު ރޯގާ (ކޮންޓަންކްޓިވަައިރަސް) އަކީ ތަފާތު ވައްތަރުގެ ވައިރަސް އަދި ބެކްޓީރިއާއިން ޖެހޭ ބައްޔަކެވެ. މި ބަލީގެ އަލާމާތްތަކުގެ ތެރޭގައި ހުން އައުމާއި، ލޯ ހިރުވުމާއި ، ލޮލޮން ފެން އައުމާއި، ލޯ ރަތްވުން، ލޮލުގައި މަޑުލުން ހިމެނެއެވެ. މި ބަލީގެ އެއްވެސް އަލާމާތެއް ފެނިއްޖެނަމަ ނުވަތަ ބައްޔަށް ޝައްކުކުރެވޭނަމަ ވީ އެންމެ އަވަހަކަށް ޑޮކްޓަރަށް ދެއްކުމަށް އެޗްޕީއޭއިން އިލްތިމާސްކުރެއެވެ.
ލޮލު ރޯގާއިން ރައްކާތެރިވުމަށް މި ފިޔަވަޅުތައް އަޅާ
- ގިނައިން ސައިބޯނި ލައިގެން އަތްދޮވުން
- އާންމުކޮށް އަތްލާ ތަކެއްޗާއި ތަންތަން ސާފުކުރުން
- ލޮލުގައި އަތްލުމާއި އުނގުޅުމުން ދުރުހެލިވުން
- ބޭނުންކޮށްފައިވާ ޓިޝޫފަދަ ތަކެތި ރައްކާތެރި ގޮތުގައި ނައްތާލުން
ލޮލު ރޯގާއަކީ ފަސޭހައިން ގައިން ގަޔަށް އަރާ ބައްޔެކެވެ. އެހެންކަމުން މި ބަލީގެ މީހުން ލޮލަށް އެޅުމަށް ބޭނުންކުރާ ބޭސް ބަލި ނުޖެހޭ މީހުން ބޭނުންނުކުރުމަށް އެޗްޕީއޭއިން އިލްތިމާސްކުރެއެވެ.