ރާއްޖެއަށް މިއަދު އަންނަމުންދާ ތަރައްޤީއާއި ކުރިއެރުން އެގޮތުގައި ދެމެހެއްޓުމަށްޓަކައި، ވެރިކަމުގައި އެމްޑީޕީ ދެމި އޮތުމަކީ ވަރަށް މުހިންމު ކަމެއްކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގައި ނ.މިލަދޫއަށް ވަޑައިގެން ރައީސުލްޖުމްހޫރިއްޔާ ވަނީ ޕްރައިމަރީއަށްފަހު ރިޔާސީ އިންތިޚާބު އެމްޑީޕީއަށް ކާމިޔާބުކުރުމުގެ މުހިންމުކަމާއި ގުޅޭގޮތުން ވާހަކަ ދައްކަވާފައެވެ.
މިމަހުގެ 28 ވަނަ ދުވަހު ބާއްވާ އެމްޑީޕީގެ ޕްރައިމަރީގައި ވާދަކުރައްވާ ރައީސް ނަޝީދާއި، ރައީސް ޞާލިހު ގެންދަވަނީ އަތޮޅުތެރޭގެ ރަށްތަކަށް ވަޑައިގެން އެމްޑީޕީގެ މެމްބަރުންނާއި ބައްދަލު ކުރައްވައި ވާދަވެރި ކެމްޕޭނެއް ކުރައްވަމުންނެވެ. ކެމްޕެއިންގައި މިއަދު ރައީސް ޞާލިހު ވަނީ ނ.މިލަދޫއަށް ވަޑައިގެން އެރަށުގެ އެމްޑީޕީ މެމްބަރުންނާއި ބައްދަލު ކުރައްވާފައެވެ. މިލަދޫގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ އެމްޑީޕީގެ އާންމު މެމްބަރުން އެންމެ ބޮޑަށް ވިސްނުން ބަހައްޓަވަންވީ ޕްރައިމަރީއަށްފަހު ކުރިމަތީގައި އޮތް ރިޔާސީ އިންތިޚާބަށް ކަމަށެވެ.
ރާއްޖޭގެ އެއްވެސް ރަށެއް ތަފާތު ކުރުމެއްނެތި، މިހާރު އަންނަމުންދާ ތަރައްޤީ ކުރިއަށްގެންގޮސް ކުރަންހުރި ގިނަ މަސައްކަތްތައް ނިންމާލުމަށް އެމްޑީޕީ ވެރިކަމުގައި ދެމިއޮތުމަކީ ކުރަންއޮތް އެންމެ ބޮޑު އަދި އެންމެ މުހިންމު މަސައްކަތް ކަމުގައި ރައީސް ވިދާޅުވިއެވެ. މާޒީގައި އެމްޑީޕީން ކޮށްފައިވާ ތަޖުރިބާއާއި، އަދި މިހާރު ވެރިކަމުގައި އޮވެ ފެންނަމުންދާ ބަދަލުތަކާއިއެކު ރާއްޖޭގެ ރައްޔިތުންނަށް އެންމެ ފަހިގޮތަކީ އެމްޑީޕީ ވެރިކަމުގައި އޮތުންކަމަށްވެސް ރައީސް ވިދާޅުވިއެވެ.
"އަޅުގަނޑުމެން މިބޭނުންވާ ޚިދުމަތްތަކާއި ކަންތައްތައް ފޯރުކޮށް ދިނުމަށްޓަކައި ރިޔާސީ އިންތިޚާބު ކާމިޔާބު ކުރުމަކީ ކޮންމެހެން ބޭނުންތެރިކަމެއް. ތިބޭފުޅުންނަށް ފެނިވަޑައިގަންނަވާނެ އެމްޑީޕީ ވެރިކަމުގައި އޮވެ، ކުރެވުނު ކަންތައްތަކާއި އަދި މިހާރުވެސް ކުރަމުން މިދާ ކަންތައްތައް. އަދި ވެރިކަމުގައި ނެތް އިރު އަޅުގަނޑުމެން ތިބެންޖެހުނު ހާލު. މަގުމަތީގައާއި އަނިޔާވެރިކަމާއި ބިރުވެރިކަމެއްގެ ތެރޭގައި އަޅުގަނޑުމެން އުޅެންޖެހުނީ. ހަމައެކަނި މަގުމައްޗަކަށްނޫން، އެތައްބަޔަކު ޖަލަށްވެސް ދާންޖެހުނު. އަޅުގަނޑުމެންގެ ތެރެއިން އެކަކުވެސް ދެން އެދުވަސް އަންނާކަށް ނޭދޭނެ." ރައީސް ޞާލިހު ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މީގެ ކުރިން މިލަދޫ ފަދަ ރަށްތަކަކީ ސަރުކާރުތަކުން އެހާބޮޑު ސަމާލުކަމެއް ދިން ރަށްތަކެއް ނޫންކަމަށެވެ. ނަމަވެސް މިސަރުކާރު ވެރިކަމަށް އައިފަހުން މިލަދޫގެ ބަނދަރުގެ މައްސަލައަށް ހައްލު ކުރެވި، އިންޖީނުގެ އަޕްގްރޭޓް ކުރެވި، ފެނުގެ ނިޒާމު ގާއިމްކުރުމުގެ މަސައްކަތް ކުރެވެމުންދާކަމަށެވެ. އަދި މިއަހަރު މިލަދޫގައި އޭޓީއެމްއެއް ބެހެއްޓީގެންދާނެ ކަަމަށް ރައީސް ވިދާޅުވިއެވެ.
އެމްޑީޕީގެ ޕްރައިމަރީގައި އޮތް ވާދަވެރިކަމާއި ގުޅޭގޮތުން ރައީސް ވިދާޅުވީ މިވާދަވެރިކަމަކީ ޕްރައިމަރީގައި އޮންނަންޖެހޭ ވާދަވެރިކަމެއްކަމަށެވެ. އަދި މިކަން ނިމި ރިޔާސީ އިންތިޚާބަށް ނިކުންނައިރު އެމްޑީޕީ އެކަތިގަނޑެއްގެ ގޮތުގައި ނިކުމެ އިންތިޚާބު ކާމިޔާބުކުރުމަށް ކުރަންހުރި މަސައްކަތް މާބޮޑުކަމަށް ރައީސް ވަނީ ވިދާޅުވެފައެވެ.