މި ފަހުގެ ތާރީޚެއްގައި އެޅުވި އެންމެ މަޤުބޫލު ބިރުވެރި ފްރެންޗައިޒް ފިލްމު "ދަ ކޮންޖަރިން" ގެ 4 ވަނަ ބަޔަކީ ފްރެންޗައިޒްގެ އެންމެ ފަހު ފިލްމަށް ވުމަކީ އެކަށީގެންވާ ކަމެއް ކަމަށް ޕްރޮޑިއުސަރު ޖޭމްސް ވާން ބުނެފިއެވެ.
އެމެރިކާގެ ސުޕަރނެޗުރަލް އެކްސްޕާޓުން ކަމަށްވާ އެޑް އަދި ލޮރޭން ވޯރެން ދެމަފިރިންގެ ވާހަކަތަކަށް ބިނާކޮށް ތައްޔާރުކުރާ "ކޮންޖަރިން" ފިލްމު ސީރީޒްގެ ފުރަތަމަ ފިލްމު ނެރެފައިވަނީ 2013 ވަނަ އަހަރުގައެވެ. "ކޮންޖަރިން" ގެ ފުރަތަމަ ފިލްމުން ފެށިގެން އޭގެ ޑައިރެކްޓަރު އަދި ޕްރޮޑިއުސަރުގެ ރޯލު އަދާކުރަމުން އަންނަނީ ބިރުވެރި ފިލްމުތައް އުފެއްދުމަށް މަޤުބޫލު ޑައިރެކްޓަރު ޖޭމްސް ވާންއެވެ.
މިހާތަނަށް މި ފްރެންޗައިޒްގެ 3 ފިލްމެއް ނެރެފައިވާއިރު އެންމެ ފަހުން ފިލްމެއް ނެރުނީ 2021 ވަނަ އަހަރުގައެވެ. އެ އަހަރު ނެރުނު ފިލްމަށް ކިޔަނީ "ދަ ޑެވިލް މޭޑް މީ ޑޫ އިޓް" އެވެ. މިއީ އެމެރިކާގެ ތާރީޚުގައި ވެސް ފާހަގަކޮށްލެވޭ ހާދިސާއަކަށް ބިނާކޮށް ތައްޔާރު ކުރި ފިލްމެކެވެ. މި ފިލްމުގެ ހާދިސާތަކަކީ އެމެރިކާގައި ފުރަތަމަ ފަހަރަށް ރޫހާނީ ބާރުތަކާއި ގުޅޭ މައްސަލައަކާއި ގުޅިގެން ކޯޓެއްގައި އެކަމަށް އާ އިއްވުމެއް ކަނޑައެޅުމާއި ގުޅިގެން އެކަމަށް ބިނާކޮށް ތައްޔާރުކުރި ފިލްމެކެވެ.
ދެން ކުރިއަށް އޮތީ މީގެ 4 ވަނަ ބައެވެ. ފިލްމުގެ 4 ވަނަ ބައެއް ނެރޭނެކަން އޮތީ ކުރީން ކަށަވަރު ކޮށްދީފައެވެ. ނަމަވެސް ވާން ދާދި ފަހުން "ކޮލައިޑާ" އަށް ދިން އިންޓަވިއުއެއްގައި ބުނެފައިވަނީ ކުރިއަށް ނެރުމަށް ހަމަޖެހިފައިވާ ފިލްމަކީ ފްރެންޗައިޒްގެ ފަހު ފިލްމަށް ވުން އެކަށީގެންވާ ކަމަށެވެ.
އެގޮތުން ކޮންޖަރިންގެ ވާހަކައަކީ އޭނާ އާ ވަރަށް ގާތް ވާހަކަތަކަށް ވެފައި 4 ވަނަ ފިލްމަށް ވެސް އިތުރު އަޅާލުމެއް ދޭނެ ކަމަށް ވާން ބުންޏެވެ. އަދި މިހާރު މަސައްކަތް ކުރަމުން އަންނަނީ ހަތަރު ވަނަ ފިލްމުން ވާހަކައަށް ރަނގަޅު ނިމުމެއް ގެނައުމަށް ކަމަށް އޭނާ ބުންޏެވެ.
އެހެންކަމުން މި ފިލްމު ތައްޔާރުކުރުމަށްޓަކައި ވަގުތު ނަގާނެ ކަމަށްވެސް އޭނާ ބުންޏެވެ. ޕެޓްރިކް ވިލްސަން އާއި ވެރާ ފާމިގާ 4 ވަނަ ފިލްމުގައި ވެސް ލީޑުން ފެންނާނެއެވެ. ފްރެންޗައިޒްގެ 4 ވަނަ ފިލްމު ނެރޭނެ ދުވަހެއް އަދި ހާމަކޮށްފައެއް ނުވެއެވެ.