ފަތުރުވެރިކަމުގެ ދާއިރާގައި ހަރަކާތްތެރިވާ ތަންތަނުގެ ޙަބަރާއި މައުލޫމާތު ހިއްސާކުރުމަށް އެދިއްޖެ
މޯލްޑިވްސް ޓޫރިޒަމް އަޕްޑޭޓްސްއަށް ފަތުރުވެރިކަމުގެ ދާއިރާގައި ހަރަކާތްތެރިވާ ތަންތަނުގެ ޙަބަރާއި މައުލޫމާތު ހިއްސާކުރުމަށް މިނިސްޓްރީ އޮފް ޓޫރިޒަމުން އެދިއްޖެއެވެ.
ޓޫރިޒަމް މިނިސްޓްރީ އަންނަނީ ކޮންމެ ހަފްތާއަކު ”މޯލްޑިވްސް ޓޫރިޒަމް އަޕްޑޭޓްސް“ ރިޕޯޓެއް ނެރެމުންނެވެ. މި ރިޕޯޓްގައި އެ ހަފްތާއެއްގައި ރާއްޖޭގެ ފަތުރުވެރިކަމުގެ އެންމެ ފަހުގެ މައުލޫމާތު ހިއްސާކުރެއެވެ.
ޓޫރިޒަމް މިނިސްޓްރީން ވިދާޅުވީ، ”މޯލްޑިވްސް ޓޫރިޒަމް އަޕްޑޭޓްސް“ގައި ފަތުރުވެރިކަމުގެ ދާއިރާގެ އިތުރު ޚަބަރުތައް ހިމެނުމުގެ މަޤްސަދުގައި، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ޙަބަރުތަކާއި މައުލޫމާތު ހިއްސާކުރުމަށް ހުޅުވާލާފައިވާކަަމަށެވެ.
މައުލޫމާތު ހިއްސާކުރުމުގައި މުވައްޒަފުންނާއި ގުޅުންހުރި މައުލޫމާތާއި، ކުންފުނިތަކުން މުޖްތަމައުގެ ކުރިއެރުމަށްޓަކައި ހިންގޭ ހަރަކާތްތަކުގެ މައުލޫމާތާއި، ތަން ތަރައްޤީކުރުމަށް ގެނެވޭ އިތުރު އައު ބަދަލުތަކުގެ މައުލޫމާތު ހިމެނެއެވެ. މީގެއިތުރުން ތަނުގައި ކުރިއަށްގެންދާ ތިމާވެއްޓާއި ރަށްޓެހި ދެމެހެއްޓެނިވި ތަރައްޤީއާއި ޕްރޮގްރާމްތަކުގެ މައުލޫމާތު ހިއްސާކުރުމަށް މިނިސްޓްރީން ވަނީ އެދިފައެވެ.
މުވައްޒަފުންނާއި ގުޅުންހުރި މައުލޫމާތުގެ ތެރޭގައި މުވައްޒަފުންގެ ކުރިއެރުމަށް ހިންގޭ ތަމްރީން ޕްރޮގްރާމާއި، މަސައްކަތާއި ގުޅިގެން ލިބޭ އެވޯޑްތަކުގެ މައުލޫމާތުގެ އިތުރުން ތަނުގެ އިސްމަގާމުތަކަށް ދިވެހި މުވައްޒަފުން އައްޔަންކުރުމާއި ގުޅޭ މައުލޫމާތު ހިއްސާކުރުމަށް މިނިސްޓްރީން ވަނީ އެދިފައެވެ.
މޯލްޑިވްސް ޓޫރިޒަމް އަޕްޑޭޓްގައި ޓޫރިޒަމް މިނިސްޓްރީން މިހާރު ހިމަނަމުން އަންނަނީ ރާއްޖެ އަންނަ ފަތުރުވެރިންގެ މައުލޫމާތާއި، ސަރުކާރުން ހިންގާ އެކިއެކި މަސައްކަތްތަކެވެ.