ސްކޫލް ނިންމާ ނިކުންނަ ޒުވާނުންނަށް ޖުޑީޝަރީ ދާއިރާއަށް ޝައުގުވެރި ކުރުމަށް ކުރިއަށްގެންދިޔަ ޕްރޮގްރާމް ނިންމާލައިފިއެވެ. މިއީ ޖުޑީޝަރީ ދާއިރާއަށް ޒުވާނުން ޝައުގުވެރިކުރުވާ، ދާއިރާގެ ތަޖުރިބާ ހިއްސާކުރުމަށް ކުރިއަށްގެންދިޔަ 8 ދުވަހުގެ ޕްރޮގްރާމެކެވެ. މިއީ މިހާ ފުޅާދާއިރާއެއްގަިއ މިފަދަ ޕްރޮގްރާމެއް ކުރިއަށްގެންދިޔަ ފުރަތަމަ ފަހަރެވެ.
"ޖުޑީޝަރީ ފޮރް ޖޫނިއަރސް"އަކީ ޖުޑީޝަލް ސަރވިސް ކޮމިޝަނާއި ޔޫއެންޑީޕީ އާއި ޔޫކޭ.އެއިޑް ގުޅިގެން ކުރިއަށްގެންދިޔަ 8 ދުވަހުގެ ޕްރޮގްރާމެކެވެ. މި ޕްރޮގްރާމް ޚާއްސަކޮށްފައިވަނީ އުމުރުން 16 އަހަރާއި 20އަހަރާއި ދެމެދުގެ ޒުވާނުންނަށެވެ.
ޖުޑީޝަރީ ފޮރ ޖޫނިއަރސް ޕްރޮގްރާމް ނިންމުމަށް ބޭއްވި ރަސްމިއްޔާތުގައި ބައިވެރިންނަށް ސެޓްފިކެޓް ހަވާލުކޮށްދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛް ހުސްނުއްސުޢޫދު އާއި ޔޫއެންޑީޕީގެ ރާއްޖޭގެ ރެޒިޑެންޓް ރެޕްރެޒެންޓެޓިވް އެންރީކޯ ގަވެގްލިއާއެވެ.
މި ރަސްމިއްޔާތުގައި ވާހަކަދައްކަވަމުން ސުޕްރީމް ކޯޓުގެ ފަނޑިޔާރު ހުސްނުއްސުޢޫދު ވިދާޅުވީ ޝަރުޢީ ނިޒާމެއް ނެތް މުޖުތަމަޢެއް އޮންނާނެ ގޮތް ކޮންމެ މީހަކުވެސް ތަޞައްވުރު ކުރަންޖެހޭކަމަށެވެ. ބޮޑެތި މައްސަލަތައް އަމިއްލައަށް ހައްލުކުރަންޖެހޭ ހާލަތެއް އޮތްނަމަ، މުޖުމަތަޢުން ފެނިގެންދާނީ ބައިބައިވުމާއި ލޭއޮހުރުވުން ކަމަށް ހުސްނުއްސުޢޫދު ވިދާޅުވިއެވެ.
މިކަމުންވެސް ދޭހަވަނީ ވަށާޖެހޭ ޝަރުޢީ ނިޒާމެއްގެ މުހިންމުކަންކަމަށާއި، ޝަރުޢީ ނިޒާމާއި ގުޅުންހުރި އެތައް އިދާރާއެއް، މުއައްސަސާއެއް ގުޅިގެން މަސައްކަތް ކުރަމުން އަންނައިރު، މިއިން އެއްވެސް އިދާރާއެއް ނެތްނަމަ ދެން ހާލަތު ބަދަލުވާނެގޮތްވެސް ހިތައް ގެންނަންޖެހޭ ކަމަށް ހުސްނުއްސުޢޫދު ވިދާޅުވިއެވެ.
"ދިރިއުޅުން ފުރިހަމަކުރުމަށް އެހެން ޢާއްމު ޚިދުމަތްތައް މުހިންމު. ވިޔަފާރިތައް ތަޢުލީމު، ސިއްޙީ ނިޒާމު. ހަމަ މިއާ އެއްވަރަށް، މުޖުތަމަޢުގެ ހަމަޖެހުން ޤާއިމުވެފައި އޮތުމަށް ޝަރުޢީ ނިޒާމުގެ މުހިންމުކަން އިންތިހާއަށް ބޮޑު." ހުސްނުއްސުޢޫދު ވިދާޅުވިއެވެ.
މި ރަސްމިއްޔާތުގައި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ އައިޝަތު ރިޒްނާ ވިދާޅުވީ ސުޕްރީމް ކޯޓުން ފެށިގެން، މެޖިސްޓްރޭޓް ކޯޓާ ހަމައިން ކުރާ މަސައްކަތްތަކުގެ ތަޖުރިބާ ޕްރޮގްރާމްގެ ބައިވެރިންނަށް ދީފައިވާކަމަށެވެ. މީގެތެރޭގައި ކޯޓުގެ އަޑުއެހުންތަކަށް ވަދެ، ޣާޒީންނާއި ވަކީލުންނާ އިދާރީ މަސައްކަތްތައް ކުރިއަށްދާގޮތްތައް ބަލާފައިވާކަމަށެވެ.
އެގޮތުން ހައިކޯޓާއި، ކ.ގުޅީގެ މެޖިސްޓްރޭޓް ކޯޓަށް ބައިވެރިން ޒިޔާރަތްކޮށް، މަސައްކަތްތައް ހިނގާ ނުހިނގާގޮތް ތަޖުރިބާ ކޮށްފައިވާކަމަށެވެ. އަދި އެޓަރނީ ޖެނެރަލްގެ އޮފީހާއި ޕްރޮސެކިއުޓާރ ޖެނެރަލްގެ އޮފީހުގެ އިތުރުން، ފުލުހުންނާއި ކަރެކްޝަންސްފަދަ މުއައްސަސާތަކުގެ އިސްވެރިންނާ ބައްދަލުކޮށް، މަޢުލޫމާތު އޮޅުންފިލުވުމުގެ ފުރުޞަތު ދީފައިވާކަމަށެވެ.
"ހައިކޯޓުގައި ހިންގަމުން ދިޔަ މައްސަލައެއްގެ އަޑުއެހުން ކުރިއަށްދިޔަގޮތް ތަޖުރިބާކޮށްފައިވޭ. އަދި ޣާޒީންނާއި ފަނޑިޔާރުންގެ ބެންޗާވެސް ބައްދަލުކޮށްފައިވޭ." ރިޒްނާ ވިދާޅުވިއެވެ.
މި ޕްރޮގްރާމްގައި ޝަރުޢީ ދާއިރާއާއި ގުޅުންހުރި ކޯސްތަކުގައި ކިޔަވަމުންދާ ދަރިވަރުންނާއި، މި ދާއިރާއަށް ޝަޢުގުވެރިކަން ހުންނަ 38 ޒުވާނުން ބައިވެރިވިއެވެ.
"ކުރިން އިވެނީ ޝަރުޢީ ދާއިރާގެ ވާހަކަތައް. އެކަމަކު މި ތަނަށް އައިސް މިވީ 8 ދުވަހު ފެނިޖެއް މަސައްކަތްތައް ރޭވިފައިވާގޮތް. މި ކުރަނީ ކިހާ ބޮޑު، ބުރަ މަސައްކަތެއްކަން. ކޯޓުތަކަށް ދެވިއްޖެ، އަޑުއެހުންތަކުގައި ބައިވެރިވެ މައްސަލައެއްގައި ކަންކުރާ ގޮތް އެނގިގެން ހިނގައްޖެ." ޕްރޮގްރާމްގެ ބައިވެރިން ފާހަގަކުރިއެވެ.
މިއީ އަލަށް ސްކޫލް ނިންމާ ނިކުންނަ ދަރިވަރުންނަށް ޚާއްސަކޮށް، ޝަރުޢީ ދާއިރާއަށް ޝައުގުވެރިކަން އިތުރުކުރުމަށް ބޭއްވި މިފަދަ ފުރަތަމަ ޕްރޮގްރާމެވެ. ކުރިއަށް އޮތްތާންގައި މީގެ އިތުރު ޕްރޮގްރާމްތައް ބާއްވާނެ ކަމަށް ޖޭއެސްސީން ވިދާޅުވެއެވެ.