ނުރައްކާތެރި ގޮވާތަކެތި ދެނެގަތުމަށް ޚާއްޞަ ތަމްރީން ދީގެން ރާއްޖެގެނައި 10 ކުއްތާ ފުލުހުންގެ އޮޕަރޭޝަންތަކުގައި ބޭނުންކުރަން ފަށައިފިއެވެ.
ފުލުހުން ވިދާޅުވީ އެންމެ ފަހުން ގެނައި ކުއްތާތަކަކީ ނުރައްކާތެރި ގޮވާތަކެތި ދެނެގަތުމަށް ހާއްސަކޮށްގެން އެމެރިކާގައި ތަމްރީނުކޮށްފައިވާ ކުއްތާތައްކަމަށެވެ. މި ކުއްތާތައް އޮޕަރޭޝަންތަކުގައި ބޭނުންކުރުމާއި، ކުއްތާތައް ބެލެހެއްޓުމަށް އެމެރިކާގައި 10 ފުލުހުން ތަމްރީނުކޮށްފައިވާކަމަށްވެސް ފުލުހުން ވިދާޅުވިއެވެ.
މި އަހަރުގެ ޖުލައި މަހު ރާއްޖެ ގެނައި މި ކުއްތާތައް، ފުލުހުން ހިންގި އޮޕަރޭޝަނެއްގައި އެންމެ ފުރަތަމަ ބޭނުންކޮށްފައިވަނީ ނޮވެމްބަރ މަހު އައްޑޫ ސިޓީގައި ކުރިއަށް ގެންދިޔަ ކައުންޓަރޓެރަރިޒަމް އޮޕަރޭޝަނުގައެވެ. އެއީ ބާރުގަދަ ގޮވާތަކެތި ބޭނުންކޮށްގެން ގިނަބަޔަކު މަރާލުމަށް ބަޔަކު ރާވަމުން ދިޔަ ހަމަލާ ހުއްޓުވުމަށް ހިންގި އޮޕަރޭޝަނެކެވެ. އެ ހަމަލާ ސަލާމަތީ ބާރުތަކުން ވަނީ ހުއްޓުވާފައެވެ.
ފުލުހުން ވިދާޅުވީ، ޓެރަރިޒަމް އޮޕަރޭޝަންތަކުގެ އިތުރުން އިންޓެލިޖެންސް ބައެއް މައުލޫމާތުތަކާ ގުޅިގެން ހިންގާ ތަފާތު އޮޕަރޭޝަންތައް، ކަސްޓަމްސް، މޯލްޑިވްސް ޕޯޓްސް ލިމިޓެޑް، އެއާޕޯޓާއި އެއާޕޯޓު ކާގޯ އޭރިއާ އަދި ރާއްޖެއާއި ރާއްޖެއިން ބޭރުގެ ހައި ޕްރޮފައިލް ބޭފުޅުންގެ އިވެެންޓުތަކުގައިވެސް ފުލުހުންގެ ޑޯގް ސްކޮޑް ބޭނުންކުރަމުންގެންދާކަމަށެވެ.
ޑޯގް ސްކޮޑަށް އިތުރަށް ގެނައި 10 ކުއްތާއާއެކު ފުލުހުންގެ ޑޯގް ސްކޮޑުގައި މިހާރު ބޭނުންކުރަމުންގެންދަނީ 25 ކުއްތާއެވެ. ޑޯގް ސްކޮޑް ބޭނުންކޮށްގެން ކާމިޔާބު ތަފާތުއެކި އޮޕަރޭޝަންތައް ފުލުހުން ހިންގާފައިވެއެވެ.
ފުލުހުންގެ ޑޯގް ސްކޮޑަށް އެންމެފަހުން ގެނައި ކުއްތާތައް އޮޕަރޭޝަންތަކުގައި ބޭނުންކުރަންފަށައިފިhttps://t.co/7Y4sGtc23b pic.twitter.com/568v8wj2Ks
— Maldives Police (@PoliceMv) December 7, 2022
ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށްޓަކައި، ފުލުހުން ހިންގާ އޮޕަރޭޝަންތަކުގައި ބޭނުންކުރުމަށް އެންމެ ފުރަތަމަ ކުއްތާތަކެއް ގެނެސްފައިވަނީ 2015ވަނަ އަހަރު މާރޗު 24ގައެވެ. އެންމެ ފުރަތަމަ ރާއްޖެ ގެނައީ 5 ކުއްތާއެވެ.
ރާއްޖެ އެތެރެކުރާ މަސްތުވާތަކެތި ހޯދުމުގެ އިތުރުން ގޮވާތަކެއްޗާއި، ވަގު ފައިސާ ހޯދުމުގެ ޤާބިލުކަން ފާރަ ގެމައިގަ ހިމެނޭ ކުއްތާތަކަށް ލިބިގެންވާކަމަށް ފުލުހުން ވިދާޅުވެފައިވެއެވެ.