މީގެ 4 އަހަރު ކުރިން ރާއްޖޭގައި އޮތް ބޭއިންސާފާއި ބިރުވެރި ހާލަތު ނިމުމަކަށް ގެނެވިއްޖެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ޖުމްހޫރީ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާގެ ވަނީ މީގެ 4 އަހަރުކުރިން ރާއްޖެއޮތް ބިރުވެރި ހާލަތު ސިފަކުރައްވާ، އެ ހާލަތު ބަދަލުކުރެއްވުމަށް ފާއިތުވި 4 އަހަރު ދުވަހު ކުރެއްވި މަސައްކަތްޕުޅު ހިއްސާކުރައްވާފައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ މީގެ 4 އަހަރު ކުރިން އެމަނިކުފާނު ދިވެހި ރައްޔިތުންނަށް އެރުވި ޔަޤީންކަމެއްވާނެކަމަށެވެ. އެއީ ދިވެހި ރައްޔިތުންގެ އުންމީދުތައް ހާސިލްކޮށްދިނުމުގައި، އެއްވެސް ރައްޔިތަކު ތަފާތު ނުކުރާނެކަމުގެ ޔަޤީންކަމާއި، ފާތެއްނެތި ހަމަހަމަކަމާއެކު ރައްޔިތުންނަށް ޚިދުމަތްކުރުމުގައި، ދެމިހުންނާނެކަމުގެ ޔަޤީންކަންކަމަށް އެމަނިކުފާނު ވިދާޅުވިއެވެ.
މިއަދު އޭގެ 4 އަހަރު ފަހުން ދެއްވާ ޔަޤީންކަމަކީ އެމަނިކުފާނު ވެވަޑައިގެންނެވި ވަޢުދުފުޅު ކަސިޔާރު ނުވެ، ދިވެހި ރައްޔިތުންނަށް ހަމަހަމަ 4 އަހަރު ފުރިހަމަކޮށްދެއްވިފައިވާކަމުގެ ޔަޤީންކަންކަމަށް ވިދާޅުވިއެވެ.
ރައީސް ވިދާޅުވީ މީގެ 4 އަހަރު ކުރިން ޤައުމުގައި އޮތީ ހާސްކަމާއި ކަންބޮޑުވުމާ، ނުތަނަވަސްކަމާ ބިރުވެރިކަމެއްގައިކަމަށެވެ. އޭގެ ސަބަބަކީ ޤާނޫނު އަސާސީން ކަށަވަރު ކޮށްދީފައިވާ ޙައްޤުތަކާ މިނިވަންކަން ލިބިދިނުމުގައި، ކަށަވަރުކަމެއް ނެތުމާއި، އެއްބަސްނުވާ ކޮންމެ މީހަކީ، ވެރިކަމުގެ ހަތުރަކަށްވެފައިވުންކަމަށް ރައީސް ވިދާޅުވިއެވެ. ނަތީޖާއަކަށްވީ، ވެރިކަމުގެ ނިޒާމް ކިލަނބުވެ، އިންސާފަކީ އެންމެ ބޮޑު ބޭއިންސާފު ކަމުގައިވުންކަމަށާއި، އިންސާފަށް އެދުމުގެ ކުރިން، އިންސާފު ލިބިދާނެ ކަމަށް އުންމީދު ނުކުރެވޭ ހިސާބަށް، ބޭއިންސާފު އޭރު އާންމުވެފައިވުންކަމަށް ރައީސް ވިދާޅުވިއެވެ.
"މީގެ 4 އަހަރު ކުރިން ރާއްޖޭގެ ހުރިހާ ސިޔާސީ ލީޑަރުން ތިއްބެވީ، ކުޑަގޮޅީގަ ނުވަތަ އެގޮޅީގެ އަނގަމަތީގަ. ގޯހުން ހިނގާ ކަންކަން ރަނގަޅު ކުރުމުގެ ފުރުޞަތު ބަންދުކުރި. ރައްޔިތުންގެ މަޖިލީހުގެ ޢިމާރާތުގެ ދޮރުތަށް ތަޅުލި. ދިގުލީ އެތަށް ދުވަހެއް ވަންދެން ، މަޖިލިހުގެ ޢިމާރާތް ބަންދުކޮށްފައި ބެހެއްޓި. އެމަޖިލީހުގެ ޢިއްޒަތްތެރި މެމްބަރުންނަކީ، މުލައްދަނޑީގެ ބާރުން ނެރެ ފާރުމަތިން އުކާލެވޭ، ބޭކާރު މުދަލެއްގެ ސިފަ ޖެއްސި. ޢަދުލް އިންސާފު ޤާއިމު ކުރުމުގެ އެންމެ މަތީމަރުޙަލާގާ، ހިޔާވަހިކަމެއް އެދުވަހަކު ނެތް. ރައްޔިތުންނަށް ގޮތް ހުސްވުމަކީ، އޮތް ހަމައެކަނި ގޮތް ކަމުގައިވެ ނިމުނު." 4 އަހަރު ކުރީގެ ރާއްޖޭގެ ހާލަތު ސިފަކުރައްވަމުން ރައީސް ވިދާޅުވިއެވެ.
ރައީސްގެ ވާހަކަފުޅުގައި ރާއްޖެ އޭރު އޮތީ ބައިނަލްއަޤްވާމީ ދުނިޔެއާ ގުޅުންކެނޑި، އެކަހެރިވެ ވަކިވެފައިކަމަށާއި، އެތައް ކައުންސިލް މަންދޫބުން ތިއްބެވީ، ގަނޑުކޮށް ސަސްޕެންޑް ކުރެވި، އެކަހެރި ކުރެވިފައިކަމަށް ވިދާޅުވިއެވެ. އަދި ރަށްތަށް އެކަހެރި ކޮށް، ރައްޔިތުންގެ މަތިން ހަނދާން ނައްތާލިކަމަށާއި، މިއީ ރައްޔިތުންގެ ދަލާ ލޭ އޮހޮރުވައިގެން ލިބިގަތް، އާޤާނޫނު އަސާސީ، އޭގެ އާރޯތާނާ ކަމުގާ ވަނިކޮށް، މިރާއްޖެ ވައްޓާލެވިދާނެ ޙާލަތެއް ކަމަށް ހިތަށް ގެންނަން ވެސް ދަތިވިކަމަށް ރައީސް ވިދާޅުވިއެވެ.
އެދުވަހު ރާއްޖޭގެ ރައްޔިތުން ބޭނުންވީ، އެއަނދަވަޅާ ދަންތުރައިން މިންޖުވާންކަމަށާއި، އެބިރުވެރިކަމާ އަނިޔާ މުޅިރާއްޖޭން ނެތިފިލާދާންކަމަށް ފާހަގަކުރައްވާ ރައީސް ވަނީ އަމާންކަމާއި ޞުލްޙަ މަސަލަސްކަމާ ހަމަޖެހުން ރާއްޖެއަށް ހޯދަން ރައްޔިތުން ބޭނުންވެފައި ތިބިކަމަށް ވިދާޅުވެފައެވެ.
ރައީސް ވިދާޅުވީ އެމަނިކުފާނުގެ ވެރިކަމުގެ ފާއިތުވި 4 އަހަރު މަސައްކަތްކުރެއްވީ ރާއްޖޭގެ ރައްޔިތުން އެދުވަހު އެމަނިކުފާނާ މަތިކުރެއްވި، ވެރިކަމުގެ މަސްއޫލިއްޔަތު އެގޮތުގައި އަދާކުރެއްވުމަށްކަމަށެވެ. އެހެންކަމުން ފުރަތަމަ ކަމަކަށްވެސް ކުރެއްވީ ތަފާތު ނުކޮށް ހަމަހަމަ ކަމާއެކު، އެންމެންނާއެކު ކުރިއަށްގޮސް، ސިޔާސީ ޒުވާބާ، ހަސަދައާ ޖަދަލާ، ނަފްރަތުން މުޖުމަތަމަޢު ސަލާމަތް ކުރުމަށްކަމަށް ރައީސް ވިދާޅުވިއެވެ.
ރާއްޖެ ބަދަލުކުރުމަށް އެމަނިކުފާނު ވެވަޑައިގެންނެވި ވަޢުދުފުޅުގެ ދަށުން ގެންނެވި އެންމެ ބޮޑު ބަދަލަކީ އިދާރީ ގޮތުން ރާއްޖެ ހިނގަމުންދާ ލާމަރުކަޒީ ބޮޑު ބަދަލުކަމަށް ރައީސް ވިދާޅުވިއެވެ. އޭގެ ބޭނުމަކީ، އެއްތަނެއްގާ ހިފެހެއްޓި ގަނޑުވެފައިވާ ބާރުތައް، އޭގެ ޒާތުން ދިރި، މުޅިރާއްޖެއަށް ފަތުރާލުންކަމަށާއި، އާމްދަނީ އާ ވަޒީފާތައް ރައްޔިތުންނާ ގާތްވާނެ ހަމަހަމަ، ހަމަތަކެއް، މި 4 އަހަރުން ހޯދިއްޖެކަމަށް ރައީސް ވިދާޅުވިއެވެ. އަދި ޖީބަށްލުއި، ބާރުދުވެލީގާ ރަށްތައް އަމުނާ، ގަތާ، ރައްޔިތުން ބަދަހި ކުރާނެ ދަތުރުފަތުރުގެ ނިޒާމް ، ތަޢާރަފް ކުރެވިފައިވާކަން ރައީސް ފާހަގަކުރެއްވިއެވެ. އަދި ތިމާވެއްޓާ ރަށްޓެހި، ވިޔަވަތި ޖަޒީރާ ރާއްޖެއަކަށް ހިޖުރަ ކުރެވޭނެ މަގު ހޯދިއްޖެކަމަށާއި، ފަޚްރުވެރި ޢާއިލާއެއް ބިނާ ކުރެވޭނެ އަސާސީ ބަދަލުތައް ގެނެވޭނެ މަގު، ކޮށާ އަލިކުރެވިއްޖެކަމުގެ ހިތްޕުޅުހަމަޖެހުން ރައީސް ފާޅުކުރެއްވިއެވެ.
ރައީސް ވިދާޅުވީ މިނިވަން ޖުޑިޝަރީއެއްގެ ޒަރީޢާއިން، ޢަދުލު އިންސާފާމެދު، ގެއްލިފައިއޮތް އިތުބާރު، އިޢާދަ ކުރުމަށް ބޭނުންވާ، ޤާނޫނީ އޮނިގަނޑު ބަދަލުކޮށް، މިނިވަން ސުޕްރީމް ކޯޓެއްގެ ދައުރު، ފުރިހަމައަށް އަދާކުރެވޭނެ ފުރުޞަތު، މި 4 އަހަރުން ފަހިކޮށްދެއްވާފައިވާކަމަށް ރައީސް ވިދާޅުވިއެވެ.
ރައީސް ވިދާޅުވީ، ރާއްޖޭގާ މީހުން ދިރިއުޅޭ ހުރިހާ ރަށެއްގައި ފެނާ، ނަރުދަމާ ޤާއިމުކުރުމުގެ ފުޅާ މަޝްރޫޢު، މިހާރު ހިނގަމުންދާކަމަށާއި، ރަށް ރަށުގެ ލަފާ ފުރުމުގެ ދަތިކަމަށް، ދެމެހެއްޓެނިވި ޙައްލު ހޯދައިދިނުމުގެ މަޝްރޫޢުވެސް ކުރިއަށްދާކަމަށެވެ.
ރައީސްގެ ވާހަކަފުޅުގައި ތަޢުލީމީ ދާއިރާގެ މުވައްޒަފުންގެ މުސާރައަށް ގެންނެވި ހެޔޮ ބަދަލަށްފަހު ކުރިއަށް އޮތީ ސިއްޙީ ދާއިރާގެ މުވައްޒަފުންގެ މުސާރައަށް ހެޔޮ ބަދަލެއް ގެންނެވުންކަމަށްވެސް ވިދާޅުވިއެވެ.
"ވަޒީފާ އަދާކުރާ މީހާއަށް އެންމެ ކުޑަވެގެން ދެވޭނެ އުޖޫރަ ، އެއީ ޤާނޫނަކުން ކަށަވަރުކޮށްދޭ ޙައްޤެއްގެ ގޮތުގާ ކަނޑައެޅިއްޖެ. އެ ޤާނޫނުގެ ލާބަ މަސައްކަތްތެރިންނަށް މިހާރު އެދަނީ ލިބެމުން. އަދި ތަޢުލީމީ ދާއިރާގެ މުސާރައިގެ އޮނިގަނޑަށް ގެނެވުނު ހެޔޮ ބަދަލުގެ އަސަރު ލިބެމުން އެބަދޭ. އިރާދަކުރެވިއްޔާ އަންނަ އަހަރު މި ހެޔޮ ބަދަލު ގެނެވޭނީ ޞިއްޙީ ދާއިރާއަށް." ރައީސް ވިދާޅުވިއެވެ.
ރައީސް ވިދާޅުވީ، އިންސާފުގެ މަގަށް ރާއްޖެ ރުޖޫޢަ ކުރެވޭނެ ކަމުގެ އުންމީދު، މި 4 އަހަރުން އިންތިހާއަށް ބޮޑުވެފައިވާކަމަށެވެ. އަދި ވާހަކަފުޅުގައި ފާއިތުވި 4 އަހަރުން 2 އަހަރަކީ ޒަމާން ތަކުންވެސް ފެންނާން ނެތް ޢާލަމީ ވަބާއަކުން، ދުނިޔެ ބަނަކުރި ދެއަހަރުކަން ފާހަގަކުރައްވާ ރައްޔިތުންގެ ފުރާނަ ސަލާމަތްކުރުމަށް މުޅި ދައުލަތުން ކުރެއްވި މަސައްކަތްތަކުގެ މައްޗަށްވެސް އަލިއަޅުއްވާލެއްވިއެވެ.