މަސައްކަތްތެރިން މަސައްކަތްކުރާ މާހައުލުގެ ރައްކާތެރިކަން ކަށަވަރުކުރުމަށް ޚާއްޞަ ޤާނޫނެއް އެކުލަވާލުމަށް ރައްޔިތުންގެ މަޖިލީހަށް ހުށައަޅުއްވާފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ޖުމްހޫރީ ދުވަހުގެ ރަސްމީ ޖަލްސާގައި ރައީސް އިބްރާހީމް މުޙައްމަދު ޞާލިޙް ދެއްކެވި ވާހަކަފުޅު އެންމެ ފުރަތަމަ ފެއްޓެވީވެސް ބުދަދުވަހުގެ ރޭ މާލޭގައި ހިނގައި ދިޔަ އަލިފާނުގެ ހާދިސާގެ މައްޗަށް އަލިއަޅުއްވާލައްވަމުންނެވެ. އެގޮތުން އެ ހާދިސާއަކީ ފަހުގެ ތާރީޚެއްގައި އެންމެ ގިނަ ބައެއްގެ ފުރާނަ ގެއްލިގެންދިޔަ އެންމެ ބޮޑު އަލިފާނުގެ ހާދިސާކަން ފާހަގަކުރައްވާ، އެޙާދިސާގައި ނިޔާވި މީހުންގެ ހަނދާންތައް އައުކުރެއްވިއެވެ.
ރައީސް ވަނީ ނިޔާވި މީހުންގެ އާއިލާތަކަށް ތަޢުޒިޔާ ވިދާޅުވެފައެވެ. ބުދަދުވަހުގެރޭ މ.ނިރުފެހި ގޭގައި ހިނގި އަލިފާނުގެ ހާދިސާގައި ވަނީ 10 ބިދޭސީއަކު ނިޔާވެފައެވެ. ރައީސް ވިދާޅުވީ، އެޙާދިސާއާ ގުޅޭ ހުރިހާ ކަމެއްގައިވެސް ސަރުކާރުން ވަރަށް ބޮޑު ސަމާލުކަމެއް ދެއްވައިގެން ބައްލަވަމުން ގެންދަވާކަމަށެވެ.
"މާލޭގައި މިފަދަ ހާދިސާތައް ކުރިމަތިވަމުން މި އަންނަނީ އެތައް އަހަރަކުން އުފެދިފައިވާ، ތޮއްޖެހުމާ، މާލޭގެ ދިރިއުޅުމުގެ ދަތިކަމުން. ވަޑާންގެއަކަސް، ގުދަނަކަސް، ގަރާޖެއް ކަމުގައިވިޔަސް މީހުންނާ އެކީ އެއްތާކު ތޮއްޖެހުމަކީ ރައްކާތެރި ދިރިއުޅުމަކަށް ނުވާނެ. ކެމިކަލް ގުދަންތައް މާލެއިން ބޭރަށް ބަދަލުކުރެވިއްޖެ. ވޯކްޝޮޕްތަކާއި، ގަރާޖްތަކާއި، ވަޑާންގެތައް ވެސް މީހުން ދިރިއުޅޭ ސަރަހައްދުތަކުން އެކަހެރި ކުރަންޖެހޭ." ރައީސް ވިދާޅުވިއެވެ.
ރައީސް މިހެން ވިދާޅުވެފައިވާއިރު، 2019 ވަނަ އަހަރު އަބަދަށްފެހި މަގުގައި، ހ.ތިލަފުށީ ގޭގައިހުރި ކެމިކަލް ގުދަނެއް ގޮވައި ހިނގި އަލިފާނުގެ ހާދިސާއަށްފަހު މާލޭގައި ހުރި ކެމިކަލް ގުދަންތަކަށް ޚާއްޞަ އިމާރާތެއް ތިލަފުށީގައި ޢިމާރާތްކޮށް ވަނީ އެތަނަށް މާލޭގައި ހުރި ހުރިހާ ކެމިކަލް ގުދަނެއް ބަދަލުކޮށްފައެވެ. އެގޮތުން 34 ކެމިކަލް ގުދަނެއް ތިލަފުށީގައި ޤާއިމްކޮށްފައިވެއެވެ.
ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ރައީސް ދެއްކެވި ވާހަކަފުޅުގައި މަސައްކަތްތެރިން މަސައްކަތްކުރާ މާޙައުލުގެ ސަލާމަތާއި ރައްކާތެރިކަން ކަށަވަރުކޮށްދިނުމަށް، "އޮކިއުޕޭޝަނަލް ހެލްތް އެންޑް ސޭފްޓީ އެކްޓް" ރައްޔިތުންގެ މަޖިލީހަށް ބުރާސްފަތި ދުވަހު ފޮނުއްވާފައިވާކަމަށް ވިދާޅުވިއެވެ. މިއީ މަސައްކަތުގެ މާޙައުލުގާ ހަރަކާތްތެރިވާ ހުރިހާ ފަރުދުންނަށް ލިބިދޭންޖެހޭ ރައްކާތެރިކަން ކަށަވަރުކޮށްދޭ ޤާނޫނެއްކަން ރައީސް އިބްރާހީމް މުޙައްމަދު ޞާލިޙް ފާހަގަކުރެއްވިއެވެ.