ޢަރަބިއްޔާ ސްކޫލްގެ ބެލެނިވެރިންނާ، މިނިސްޓަރ އޮފް އެޑިއުކޭޝަން އައިޝަތު އަލީ ބައްދަލުކުރައްވައި ކަންބޮޑުވުންތައް އޮޅުންފިލުއްވައިފިއެވެ.
މިނިސްޓްރީ އޮފް އެޑިއުކޭޝަންގައި ކުރިއަށްގެންދިޔަ މި ބައްދަލުވުމަކީ، ސްކޫލްގެ ހިންގުމުގެ ކަންކަމުގައި ދިމާވާ ދަތިތަކާ، ބެލެނިވެރިންގެ ހުރި ކަންބޮޑުވުން އަޑުއެހުމަށް ބޭއްވި ބައްދަލުވުމެކެވެ. ސްކޫލްގެ ބެލެނިވެރިންވަނީ، މިހާރު ޢަރަބިއްޔާ ހިންގަމުން އަންނަގޮތާއި ދަރިވަރުންނަށް ކުރިމަތިވާ ގޮންޖެހުންތައް ޙިއްސާކޮށްފައެވެ. އަދި ސްކޫލްގެ ހިންގުމަށް ގެންނަ ބައެއް ބަދަލުތަކުގެ ކަންބޮޑުވުންތައްވެސް ވަނީ ފާޅުކޮށްފައެވެ.
ޢަރަބިއްޔާ ސްކޫލްގެ ބެލެނިވެރިން އެންމެ މުހިންމު ކަމެއްގެ ގޮތުގައި ފާހަގަކުރަނީ، ސްކޫލްގެ ޢިމާރާތުގެ ދަތިކަމުގެ ސަބަބުން ކުދިންނަށް ދިމާވާ ދަތިތަކެވެ.
އަލްމަދްރަސަތުލް ޢަރަބިއްޔަތުލް އިސްލާމިއްޔާގެ ބެލެނިވެރިންނާ މިނިސްޓަރ @aisthly ބައްދަލުކުރެއްވުން. މި ބައްދަލުކުރެއްވުމުގައި މިނިސްޓަރ ވަނީ އެބޭފުޅުންގެ ހުރި ކަންބޮޑުވުންތައް އަޑުއައްސަވައި، @Arabiyya_Schoolގެ އައު އިމާރާތާ ގުޅޭ މަޢުލޫމާތު ޙިއްޞާކުރައްވާފައި. pic.twitter.com/q7drAmca1W
— Ministry of Education (@MoEdumv) November 7, 2022
މި ބައްދަލުވުމުގައި އެޑިއުކޭޝަން މިނިސްޓަރ ވަނީ ޢަރަބިއްޔާ ސްކޫލްގެ އައު އިމާރާތުގެ މަސައްކަތާ ގުޅޭ ފަހުގެ ތަފްސީލްތައް ބެލެނިވެރިންނާ ޙިއްސާކުރައްވާފައެވެ. އެ ސްކޫލް މިހާރު ހިންގަނީ، ކުރިން ފޮރިން މިނިސްޓްރީ ހިންގަމުން އައި އިމާރާތުގައެވެ.
ސަރުކާރުން ދަނީ ޢަރަބިއްޔާގެ އައު އިމާރާތުގެ މަސައްކަތް އަވަސްކުރުމަށް މަސައްކަތްކުރަމުންނެވެ. އައު އިމާރާތް އަޅަނީ ކުރީގެ ޖަމާލުއްދީން ސްކޫލް ހިންގި އިމާރާތުގައެވެ. އެއިމާރާތް ތަޅާލުމުގެ މަސައްކަތް މިމަހުގެ ނިޔަލަށް ނިންމާ، ސްކޫލްގެ ޢަމަލީ މަސައްކަތްތައް ވަރަށް އަވަހަށް ފަށާނެކަމުގެ ޔަގީންކަން ސަރުކާރުންދެއެވެ.
ސަރުކާރުގެ އަމާޒަކީ އައު އިމާރުގެ މަސައްކަތް، 2023 ވަނަ އަހަރުގެ ޑިސެމްބަރު މަހުގެ ފަހުކޮޅު ނިމި 2024 ވަނަ އަހަރުގެ ދެވަނަ ޓަރމް ކިޔެވުން ފެށޭއިރު އިމާރާތް ބޭނުންކުރަން ފެށުމެވެ.
އާ ސްކޫލްގައި 41 ކްލާސްރޫމް ހުންނާނެއެވެ. އަދި ސްކޫލެއްގައި ހުންނަންޖެހޭ ހުރިހާ ފެސިލިޓީތައް ފުރިހަމައަށް ހުންނާނެއެވެ.