ޖަލުތަކުގައި ޤައިދީންނަށް ދެވެން ނެތް ސިއްޙީ ފަރުވާ ފޯރުކޮށްދިނުމަށްޓަކައި، ކުރިއަށްގެންދާ، ޚާއްޞަ ބަލިތަކުގެ ޑޮކްޓަރުންނަށް ދެއްކުމުގެ އޮޕަރޭޝަނުގެ ދަށުން 192 ޤައިދީއަކު ޑޮކްޓަރަށް ދައްކައިފިއެވެ.
"އޮޕަރޭޝަން ހޭހަން"ގެ ނަމުގައި ތިން ހަފްތާގެ މުއްދަތަށް ފެށި މި އޮޕަރޭޝަނަކީ ޖަލުގައި ތިބި ޤައިދީންނާއި، ބަލި މީހުންގެ ތެރެއިން ޚާއްސަ ބަލިތަކުގެ ޑޮކްޓަރުންނަށް ދެއްކުމަށް، ޖަލުގައި ތިއްބަވާ ޑޮކްޓަރުން ލަފާދީފައިވާ ޤައިދީންގެ އަދަދު އިތުރުވަމުންދާތީ އެކަން ހައްލު ކުރުމަށް ކުރިއަށް ގެންދެވޭ ޚާއްސަ އޮޕަރޭޝަނެކެވެ.
29 އޮކްޓޫބަރުގައި ފެށި މި އޮޕަރޭޝަނުގެ ދަށުން އެންމެ ގިނަ ޤައިދީން ދައްކާފައިވަނީ ލޮލުގެ ޑޮކްޓަރުންނަށެވެ. އެގޮތުން ލޮލުގެ ޑޮކްޓަރަށް 105 ޤައިދީއަކު ދައްކާފައިވެއެވެ. ދެން އެންމެ ގިނައިން ޤައިދީން ދައްކާފައިވަނީ ކަށީގެ ޑޮކްޓަރުންނާއި، ހިތުގެ ޑޮކްޓަރުންނާއި ކުޑަކަމުދާ ނިޒާމުގެ ބަލިތަކުގެ ޑޮކްޓަރުންނަށެވެ. އެގޮތުން ކަށީގެ ބަލިތަކުގެ ޚާއްޞަ ޑޮކްޓަރުންނަށް 14 ޤައިދީން، ކުޑަކަމުދާ ނިޒާމުގެ ބަލިތަކުގެ ޑޮކްޓަރުންނަށް 11 ޤައިދީން، ހިތުގެ ޑޮކްޓަރުންނަށް 10 ޤައިދީން، ފުއްޕާމޭގެ ބަލިތަކުގެ ޑޮކްޓަރުންނަށް 9 ޤައިދީން، ކަރުންމަތީގެ ޑޮކްޓަރުންނަށް 5 ޤައިދީން ދައްކާފައިވެއެވެ. މިނޫނަސް ހަމުގެ ޑޮކްޓަރުންނާއި އޮޕަރޭޝަން ޑޮކްޓަރުންފަދަ ޚާއްޞަ ދާއިރާތަކުގެ ޑޮކްޓަރުންނަށްވެސް ޤައިދީން ދައްކާފައިވެއެވެ.
ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވެފައިވަނީ، ޤައިދީންގެ ފަރާތުން އަންނަ އެންމެ ބޮޑު ޝަކުވާއަކީ ޑޮކްޓަރަށް ދެއްކުން ލަސްވާތީ އަންނަ ޝަކުވާކަމަށެވެ. އެހެންކަމުން އައިޖީއެމްއެޗާއެކު މަޝްވަރާކޮށްގެން ހިންގާ މި އޮޕަރޭޝަނުގެ ސަބަބުން އެ މައްސަލައަށް ބޮޑު ލުޔެއް ލިބޭނެކަމަށް ކޮމިޝަނަރ ވިދާޅުވެފައިވެއެވެ.
އޮޕަރޭޝަން "ހޭހަން" އިން ފުރަތަމަ ހަފްތާގައި ޤައިދީންނާއި ބަންދުމީހުން ޙާއްސަ ޑޮކްޓަރުންނަށް ދެއްކުނުގޮތުގެ އަދާހަމަ pic.twitter.com/8prVw8hNdp
— Maldives Correctional Service (@CorrectionsMv) November 6, 2022
ހަފްތާއެއްގެ ތެރޭގައި ޤައިދީން ސްޕެޝަލިސްޓުންނަށް ދައްކާފައިވާ ތަފްސީލް:
29 އޮކްޓޫބަރ 2022 - 10 ޤައިދީން
30 އޮކްޓޫބަރ 2022 - 13 ޤައިދީން
31 އޮކްޓޫބަރ 2022 - 13 ޤައިދިން
01 ނޮވެމްބަރ 2022 - 53 ޤައިދީން
02 ނޮވެމްބަރ 2022 - 68 ޤައިދީން
03 ނޮވެމްބަރ 2022 - 65 ޤައިދީން
ޤައިދީންނާއި، ބަންދު މީހުން ޚާއްސަ ބަލިތަކުގެ ޑޮކްޓަރުންނަށް ދެއްކުމަށް ހިންގާ މި އޮޕަރޭޝަނުގައި ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅާއި، ކަރެކްޝަންގެ ސީނިއާ މެނޭޖްމަންޓް އޮފިސަރުން ދަނީ ހަރަކާތްތެރި ވަމުންނެވެ. މި އޮރޭޝަންގައި 70 އަށްވުރެ ގިނަ އޮފިސަރުން ދަނީ ހަރަކާތްތެރިވަމުންނެވެ.