ސުޕްރީމް ކޯޓުގެ ސެކްރެޓަރީ ޖެނެރަލްގެ މަޤާމުގައި ހުންނެވި ޑރ.ޙުސައިން ފާއިޒް މަޤާމުން ވަކިކުރައްވައިފިއެވެ. އެ މަގާމުން ޑރ. ޙުސައިން ފާއިޒް ވަކިކުރަން ނިންމާފައި ވަނީ ޝަރުއީ ދާއިރާގެ މުވައްޒަފުންގެ ކޯޑް އޮފް ކޮންޑަކްޓާއި ދައުލަތުގެ ބަޖެޓުން ހަރަދުކުރުމުގެ އުސޫލުތަކާ ހިލާފަށް އަމަލުކޮށްފައިވާކަން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ކުރި ތަހްގީގަށް ސާބިތުވުމުންނެވެ.
ޑރ.ފާއިޒް މަޤާމުން ވަކިކޮށްފައިވަނީ، ދިވެހިރާއްޖޭގެ ސުޕްރީމް ކޯޓުގެ ސެކިއުރިޓީ ހަރުދަނާކުރުމަށް ކަމަށް ބުނެ، ފަނޑިޔާރުންނާއި މުވައްޒަފުންގެ ހަރަކާތްތަކަށް ފާރަލެވޭގޮތައް ދިވެހިރާއްޖޭގެ ސުޕްރީމް ކޯޓުގެ އެތެރޭގައި ސީސީޓީވީ ކެމެރާ ހަރުކުރުމަށް ނިންމައި އެކަން ތަންފީޒުކޮށް، އޭނާގެ ކޮޓަރީގައި ކެމެރާތަކުގެ ލައިވް ފީޑް ލިބޭނެ ގޮތް ހަދައި އޭގެ ބޭނުން އެ ގޮތުގެ މަތިން ކޮށްފައިވާކަން ތަހުގީގަށް ސާބިތުވާތީކަމަށްވެސް ޑީޖޭއޭ އިން ވިދާޅުވިއެވެ.
ކެމެރާ އެޅުމުގެ މަސައްކަތަށް 2 ލައްކަ ރުފިޔާ އަށް ވުރެ ބޮޑު އަދަދެއް ހަރުދުކޮށްފައިވާއިރު، އެކަން ކޮށްފައިވަނީ ދައުލަތުގެ މާލިއްޔަތުގެ ގަވާއިދުގައި ބުނާ ގޮތަށް ސްޓޭޓްމަންޓް އޮފް ރިކްވަޔަމަންޓް ތައްޔާރުނުކޮށް، ސެކިއުރިޓީ ބެލެހެއްޓުމުގެ މަގުސަދާ ހިލާފަށްކަން ވެސް ތަހުގީގަށް ސާބިތުވެފައިވާކަން ޑީޖޭއޭއިން ފާހަގަކޮށްފައިވެއެވެ. މި އަމަލު ކޮށްފައިވަނީ ޒިންމާދާރުކަން ކުޑަގޮތެއްގައި ކަމަށްވާތީ، ދިވެހިރާއްޖޭގެ ސުޕްރީމް ކޯޓުގެ އިދާރީ އިސްވެރިޔާގެ ހައިސިއްޔަތުން ޑރ.ފާއިޒަށް ކުރެވޭ އިތުބާރު މިހާރު ވަނީ ގެއްލިފައިކަމަށް ޑީޖޭއޭއިން ވިދާޅުވިއެވެ.
ޑީޖޭއޭއިން ވިދާޅުވީ، ޝަރުއީދާއިރާގެ ކޮންމެ މުވައްޒަފަކީ ޝަރުއީދާއިރާގެ މިނިވަންކަމާއި، މުސްތަޤިއްލުކަމާއި، ގަދަރު ހިފެހެއްޓުމަށް މަސައްކަތްކުރާ މީހަކަށް ވާންޖެހޭކަމަށާއި، އިދާރީ އިސްވެރިޔާއަކީ އެހެން މުވައްޒަފުންނަށް ނަމޫނާ ދައްކަންޖެހޭ ފަރާތެއްކަމަށެވެ. ވަކި އަތަކަށް ނުޖެހުމާއި އަދި ނުޖެހޭ ކަން އަމަލުން ދެއްކުމާއި އެކަމުގައި އެހެން މުވައްޒަފުންނަށް ނަމޫނާ ދެއްކުމާއި އަދި އެކަމަށް މުވައްޒަފުންނަށް ބާރުއެޅުމަކީ ވެސް އިދާރީ އިސްވެރިޔާގެ ހައިސިއްޔަތުން އޭނާގެ ޒިންމާއެއްކަން އެ ޑިޕާޓުމަންޓުން ނެރުނު ބަޔާނުގައި ފާހަގަކޮށްފައިވެއެވެ. އެހެންނަމަވެސް، ދިވެހިރާއްޖޭގެ ސުޕްރީމް ކޯޓުގެ މައްޗަށް ރައްޔިތުން ކުރާ އިތުބާރު ދެމެހެއްޓުމުގެ ގޮތުން އެ ކޯޓުގައި ހިނގަމުންދާ މައްސަލަތަކާ ގުޅިގެން ކޯޓުގެ މުވައްޒަފުން އަމަލުތައް ބަހައްޓަންވީ ގޮތާ ބެހޭ ގޮތުން ފަނޑިޔާރުން ދީފައިވާ އިރުޝާދުތަކާއި ހިލާފުވެ މުވައްޒަފުންނަށް ނުރަނގަޅު ނަމޫނާ ދައްކާފައިވާކަން ބެލިބެލުމުން ސާބިތުވާކަަމަށްވެސް ޑީޖޭއޭއިން ވިދާޅުވިއެވެ. މި ސަބަބާހުރެ އޭނާގެ މައްޗަށް އޮތް އިތުބާރު ގެއްލުމުގެ އިތުރުން މި އަމަލަކީ ޝަރުއީ ދައިރާއާ ދޭތެރޭ އާންމުން ދެކޭގޮތް ކިލަބުވާފަދަ އަމަލެއްކަމަށްވެސް ޑީޖޭއޭއިން ވިދާޅުވިއެވެ.
ޑރ.ފާއިޒްގެ މައްޗަށް ސާބިތުވި މި މައްސަލަ ތަހުގީގްކުރަމުން ދިޔައިރު، މުސާރައާއި އިނާޔަތްތައް ލިބޭ ގޮތަށް ސަސްޕެންޝަންގައި ހުރިކަން އެ ޑިޕާޓުމަންޓުން ފާހަގަކޮށްފައިވެއެވެ.