މިދިޔަ އަހަރުގެ ފެބުރުއަރީ މަހު، ގއ.މާމެންދޫގައި ތޫނު ހަތިޔާރު ބޭނުންކޮށްގެން އެރަށު ލީލީ އޮފް ދިވެލީ ޢުމުރުން 17 އަހަރުގެ އަޙްމަދު އުދައްޔު މަރާލި މައްސަލަ، ސާބިތުވެފައިވާ ޢުމުރުން 18 އަހަރުން ދަށުގެ ކުއްޖާ 25 އަހަރާއި 5 މަސްދުވަހަށް ބަންދުކުރުމަށް ޖުވަނައިލް ކޯޓުން ހުކުމް ކޮށްފިއެވެ.
ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ މިދިޔަ އަހަރުގެ ފެބުރުއަރީ މަހުގެ 8 ވަނަ ދުވަހު، ގއ. މާމެންދޫގައި ހިނގި މާރާމާރީގައި ލިބުނު އަނިޔާތަކަކަށް ފަރުވާދެމުން ދަނިކޮށް ޢުމުރުން 17 އަހަރުގެ ކުއްޖާ މަރުވި މައްސަލައިގައި، ޢުމުރުން 18 އަހަރުން ދަށުގެ ކުއްޖެއްގެ މައްޗަށް ޖުވެނައިލް ކޯޓަށް ހުށަހެޅި ދަޢުވާތައް ސާބިތުވާކަމަށް މިދިޔަ ސެޕްޓެމްބަރު މަހު ކަނޑައެޅިކަމަށެވެ. އަދި އެ މައްސަލާގައި މިއަދު އެކުއްޖާގެ މައްޗަށް އަދަބު ކަނޑައެޅާފައިވާކަމަށް ޕީޖީ އޮފީހުން ވިދާޅުވިއެވެ.
އެގޮތުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާއާ ގުޅިގެން 18 އަހަރާއި 9މަހަަށް ކުޑަކުދިން ބަންދުކުރާ މަރުކަޒެއްގައި ބަންދުކުރުމަށާއި، މަރުގެ ދިޔައިގެ ގޮތުގައި އެއް އަހަރުތެރޭގައި 1 މިލިއަން ދިވެހި ރުފިޔާ ނިޔާވި ކުއްޖާގެ ވާރިސުންނަށް ދިނުމަށާއި، ކައްފާރާގެ ގޮތުގައި ވިދިވިދިގެން 2 މަސް ދުވަހު ރޯދަހިފުމަށް ޖުވަނައިލް ކޯޓުން ކަނޑައެޅި އަދަބުގައިވެއެވެ.
މީގެ އިތުރުން އެކުއްޖާގެ މައްޗަށް ސާބިތުވި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާއާ ގުޅިގެން 6 އަހަރާއި 8 މަސްދުވަހަށް ކުޑަކުދިން ބަންދުކުރާ މަރުކަޒެއްގައި ބަންދުކުރުމަށްވެސް ވަނީ ކަނޑައަޅާފައެވެ. އެހެންކަމުން އެކުއްޖާގެ މައްޗަށް ސާބިތުވި ދައުވާތަކާއި ގުޅިގެން ޖުމްލަ 25 އަހަރާއި 5 މަސްދުވަހަށް ބަންދުކުރާނެއެވެ.
މީގެ އިތުރުން މި މައްސަލާގައި ޝަމިލްވާ،ގއ.މާމެންދޫ ރިހިފަރުދާގެ، އަޙުމަދު ޝަމީމްއާއި ހަމައެރަށު ބިލަތްމާގޭ ޝަރަފު ރަޝީދުގެ އިތުރުން ގުލްފާމުގޭ މުޙައްމަދު މާޒިންގެ މައްޗަށް ކްރިމިނަލް ކޯޓަށް ހުށަހެޅި ތޫނު އެއްޗެއް ބޭނުންކޮށްގެން ޤަޞްދުގައި މީހަކު މަރާލުމުގައި ބައިވެރިވުމުގެ ކުށުގެ ދަޢުވާއާއި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ އަޑުއެހުންތައް ކްރިމިނަލް ކޯޓުގައި މިހާރު ދަނީ ހިނގަމުންނެވެ.
މިމީހުންގެ މައްޗަށް ކްރިމިނަލް ކޯޓުގައި ދަޢުވާކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މަރާލުމުގައި ބައިވެރިވުމުގެކުށުގެ ދަޢުވާއާއި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދަޢުވާއެވެ.
އަޙްމަދު އުދައްޔު މަރާލި މާރާމާރީގައި އޭނާގެ ބުރަކަށީގެ އެކި ތަންތަނަށް ވަޅިން ހަމަލާދީފައިވާކަމަށާއި 4 ނުވަތަ 5 އިންޗި ފުނަށް ވަޅި ހަރައި ޒަޚަމްކޮށްލާފައިވާ ނިޝާންތައްވެސް ހުރިކަމަށް ގއ.އަތޮޅު ހޮސްޕިޓަލުން ކުރިން ވިދާޅުވެފައިވެއެވެ. އޭގެފަހުން އުދައްޔު ވަޅުލާފައިވަނީ އޭނާގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ހެދުމަށްފަހުއެވެ.