ހދ.ނޭކުރެންދޫ ބަނދަރު އަޕްގްރޭޑްކުރުުގެ މަސައްކަތާއި، ރ.އިންނަމާދޫގެ ގޮނޑުދޮށް ހިމާޔަތްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފިއެވެ.
ނޭކުރެންދޫ ބަނދަރު އަޕްގްރޭޑް ކުރުމުގެ މަސައްކަތުގެ އެއްބަސްވުމުގައި މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޝާނާ ފާރޫޤްއެވެ. އެމްޓީސީސީގެ ފަރާތުން ސޮއިކުރެއްވީ ޗީފް އޮޕަރޭޓިން އޮފިސަރ ޝާހިދު ހުސެއިން މޫސާއެވެ.
ނޭކުރެންދޫ ބަނދަރު އަޕްގްރޭޑްކުރުމުގެ މަސައްކަތުގެދަށުން، 212 މީޓަރުގެ އެއްގަމު ތޮއްޓެއްލުމަށް ވަނީ ހަމަޖެހިފައެވެ. އަދި 166 މީޓަރުގެ ރިވެޓްމަންޓް ޖެހުމާއި ބޮޑުހިލައިގެ ބޭރު ތޮއްޓެއްލުމާއި ރޭމްޕެއް ހެދުންވެސް މިމަސައްކަތުގެ ތެރޭގައި ހިމެނެއެވެ. ބަނދަރު މަސައްކަތް ނިމޭއިރު ބަނދަރު ބައްތި ޖެހުމާއި ޕޭމަންޓް ހެދުމަށްވެސްވަނީ ހަމަޖެހިފައެވެ.
ނޭކުރެންދޫ ބަނދަރު އަޕްގްރޭޑްކުރުމުގެ މަސައްކަތް އެއް އަހަރުގެ ތެރޭގައި ނިންމުމަށް ހަވާލުކޮށްފައިވަނީ، 47.6 މިލިއަން ރުފިޔާއަށެވެ.
ނޭކުރެންދުއަކީ 1400މީހުންގެ އާބާދީއެއް އޮތް ރަށެކެވެ. ރަށުގައި މުދާ އުފުލާ ބޯޓުފަހަރު އޮތުމާއި، އަދި މިހާރު ފެރީގެ ޚިދުމަތްވެސް ދެމުން އަންނާތީ ރަށުގެ ބަނދަރުގެ ޖާގައިގެ ދަތިކަން ބޮޑެވެ. މި މަޝްރޫޢާއެކު ރަށުގެ ބަނދަރުގެ ޖާގައިގެ މައްސަލައަށްވެސް ހައްލު ލިބޭނެއެވެ.
ރ.އިންނަމާދޫގެ ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން އެމްޓީސީސީއާ ހަވާލުކޮށްފައިވަނީ، ރަށުގެ އުތުރު ފަރާތު ގޮނޑުދޮށް ހިމާޔަތްކުރުމަށެވެ. ރަށް ހިމާޔަތްކުރުމަށް 360 މީޓަރުގެ ސަރަހައްދެއްގައި ގްރޮއިންސް ޖެހުން ހިމެނެއެވެ.
މިމަސައްކަތް ހަވާލުކޮށްފައިވަނީ 7 މަސް ދުވަހުން ނިންމާގޮތަށް، 15.6 މިލިއަން ރުފިޔާއަށެވެ. އާބާދީގައި 900 މީހުން ދިރިއުޅޭ އިންނަމާދޫއަކީ، އޮޑިފަހަރު ބަނުމާއި ވަޑާންކުރުމުގެ ފަންނުގައި ފާހަގަކޮށްލެވޭ ރަށެކެވެ. މިރަށުގެ އުތުރުފަރާތުން ވެލިގަނޑު ގިރަމުންދިޔުމާއެކު އިޤްތިޞާދީ މަސައްކަތްތަކަށްވެސް އަންނަނީ ހުރަސްއެޅެމުންނެވެ. އެހެންކަމުން މި މަޝްރުޢޫ ވާނީ ރަށަށް ވަރަށް މުހިންމު މަޝްރޫޢަކަށެވެ.