މިއަދު ހެނދުނު ގ.މާވާވިލާ ކުރިމަތިން އަލިކިލޭގެފާނު މަގުން ފެނުނު އެއްޗަކީ އެއްވެސް ނުރައްކަލެއް ކުރިމަތިވެދާނެފަދަ ގޮވާތަކެތި ހުރިއެއްޗެއް ނޫންކަން ޔަޤީންކުރެވިފައިވާކަމަށް އެމްއެންޑީއެފުން ހާމަކުރައްވައިފިއެވެ.މިއަދު ހެނދުނު ގާތްގަނޑަކަށް 7:20 އެހާކަންހާއިރު އަލިކިލޭގެފާނު މަގު ގ.މާވާވިލާ ކުރިމަތީގައި ޕާކްކޮށްފައި އޮތް ވެހިކަލެއްގެ ދަށުގައި އައި.އީ.ޑީ އެއްކަމަށް ޝައްކުކުރެވޭ އެއްޗެއް އޮތްކަމުގެ މަޢުލޫމާތު ފުލުހުންނަށާއި، އެމްއެންޑީއެފަށް ލިބުމާއި ގުޅިގެން، ހަމަޖެހިފައިވާ އުސޫލުގެ މަތިން ޓީމުތައް އެސަރަޙައްދަށް ގޮސް ބަލާ ފާސްކުރައްވާފައިވާ ކަމަށް އެމްއެންޑީއެފުން ވިދާޅުވިއެވެ. ވެހިކަލްގެ ދަށުން ފެނުނު އެއްޗަކީ އައިއީޑީއަކަށް ވެދާނެކަމަށް ބައްލަވައި މިފަދަ ޙާލަތްތަކުގައި އެމްއެންޑީއެފުން ޢަމަލުކުރުމަށް ހަމަޖެހިފައިވާ އުސޫލުގެ މަތިން ވަނީ ޢަމަލުކުރައްވާފައިވާ ކަމަށާއި އޭގެ އެއްވެސް ނުރައްކަލެއް ނެތް ކަމަށް އެމްއެންޑީއެފުން ހާމަކުރައްވައެވެ.އަދި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގައި ދިވެހި ސިފައިން އަބަދުމެ ދެމިތިބޭނެ ކަމުގެ ޔަޤީންކަން ސަލާމަތީ ބާރުތަކުން ދެއްވާފައިވެއެވެ.