ބޮލީވުޑް ބަތަލާ އާލިއާ ބަޓް އާއި އެކްޓަރު ރަންބީރު ކަޕޫރަށް އަލަތު ދަރިފުޅު ލިބެން އުޅޭކަން އިއުލާނުކުރީ މިދިޔަ ޖޫން މަހުއެވެ.
ބަނޑުބޮޑުވި ނަމަވެސް އުމުރުން 29 އަހަރުގެ މި ތަރީގެ ރީތިކަމަށް އެއްވެސް ބަދަލެއް ނާންނަކަން ދާދިފަހުން ނަގާ، ސޯޝަލް މީޑިއާ އަށް ދޫކޮށްލާފައިވާ ފޮޓޯތަކުންވެސް އެގެއެވެ.
އާލިއާ އަށް މިހާރު ކުރިމަތިވެފައިވަނީ ބަނޑު ބޮޑުވުމުން ގިނަ އަންހެނުންނަށް ކުރިމަތިވާ "ކްރޭވިން" ނުވަތަ ވަކި ކަހަލަ އެއްޗެއް ކާހިތްވުމުގެ ދުވަސްވަރާއެވެ. އާލިއާ ވަނީ އޭނާގެ އިންސްޓްގްރާމް ޕޯސްޓެއްގައި މުމްބާއީ އިން އެންމެ މީރު ޕިއްޒާ ލިބޭނީ ކޮންތާކުންތޯ އޭނާގެ ފޭނުންނާއި ސުވާލުކޮށްފައެވެ. އަދި މިއީ އޭނާގެ "ކްރޭވިން" ކަމަށްވެސް އާލިއާ ބުނެފައިވެއެވެ.
ރަންބީރުގެ މަންމަ އަދި ބަތަލާ ނީތޫ ކަޕޫރާއި އާލިއާގެ މަންމަ ސޯނީ ރަޒްދާން އާލިއާއަށް ބެބީ ޝާވާ އެއް ބާއްވާން ނިންމާފައިވާ ކަމަށްވެސް ވަނީ އިއުލާނުކޮށްފައެވެ. ހުސް އަންހެނުން ހިމެނޭހެން ބާއްވަން ހަމަޖައްސާފައިވާ މި ބޭބީ ޝަވާގައި ޝާހީން ބަޓް، ކަރީނާ ކަޕޫރު ޚާން، ކަރިޝްމާ ކަޕޫރު، އަކަންޝާ ރަންޖަން، އަނުޝްކާ ރަންޖަން، ނަވްޔާ ނަންދާ، ޝްވެތާ ބައްޗަން، އާރްތީ ޝެޓީ އަދި އާލިއާ ބަޓްގެ ގާލް ގޭންގް ވެސް ބައިވެރިވާނެއެވެ.
ފިރިމީހާ ރަންބީރާއެކު އިޓަލީގައި ކުރު ޗުއްޓީއެއް ހޭދަކުރުމަށްފަހު އާލިއާ އުޅުނީ ދެމަފިރިން އެކުގައި ފުރަތަމަ ފެންނަ ފިލްމު "ބްރަމަސްތްރާ" ގެ ޕްރޮމޯޝަންގެ މަސައްކަތުގައެވެ. "ބްރަމަސްތްރާ" އަށް ބޮޑު ތަރުޚީބެއް އަންނަނީ ލިބެމުންނެވެ.
ގާތްގަނޑަކަށް 4 އަހަރު ދުވަހު ރައްޓެހިވުމަށްފަހު ރަންބީރާއި އާލިއާ ކައިވެނި ކުރީ މިއަހަރުގެ އޭޕްރީލް މަހުއެވެ.