ރާއްޖޭގައި ފަތުރުވެރިކަމުގެ ވިޔަފާރި ފުޅާވެ، އޭގެ އެކި ބާވަތްތަކުގެ ފަތުރުވެރިކަން ފުޅާ ދާއިރާއެއްގައި އަންނަނީ ކުރަމުންނެވެ. ސަފާރީތަކާ ޔޮޓްތައް އިތުރުވެ، މި ވިޔަފާރިން އާމްދަނީ ހޯދާ މީހުން ވަނީ އިތުރުވެފައެވެ. ނަމަވެސް މި ވިޔަފާރި ކުރާ ފަރާތްތަކުގެ އެންމެ ބޮޑު ޝަކުވާއަކަށްވެފައި އަބަދުވެސް އޮތީ، އެ އުޅަނދުތަކަށް ބޭނުންވާ އެކަށީގެންވާ ޚިދުމަތް ނިލިބުމެވެ.
ސަފާރީތަކާއި ޔޮޓްތައް މިހާރު އަޅާފައި ބޭއްވުމަށް ބޭނުންކުރަމުން އަންނަ ހަމައެކަނި ތަނަކީ ހުޅުމާލޭގެ ފަޅު ތެރެއެވެ. ނަމަވެސް ބޯޓުފަހަރު އިތުރުވެ، މިކަންވެސް ވަނީ ތަކުލީފަކަށެވެ. ބޯޓު އަޅާފައި ބޭއްވުމަށް އެކަށީގެންވާ ރޭވުންތެރި ނިޒާމެއް ނެތެވެ. ޚިދުމަތްތަކެއް ނުލިބެއެވެ.
މި ޝަކުވާތަކަށް ޙައްލު ހޯއްދަވައި ދެއްވާނެކަމަށް ސަރުކާރުން މީގެކުރިންވެސް ވިދާޅުވެފައިވެއެވެ. ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު މިހާރު މިވަނީ، ބޯޓުފަހަރު އެޅުމަށް ދިޔަނަރު ފަޅު ކައިރިން ތަނެއް ތަރައްޤީކުރައްވާނެކަން އިޢުލާންކުރައްވާފައެވެ. މިގޮތަށް ނިންމަވާ އެތަން ރަސްމީކޮށް އިޢުލާނުކުރެއްވީ ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސްއާއި ޔޮޓް އެސޯސިއޭޝަނާއެކު ބޭއްވި ބައްދަލުކުރެއްވުމަށް ފަހުގައެވެ. ސަރުކާރުން ހާމަކުރައްވާފައިވަނީ މި ފަޅު ހިއްކުމުގެ މަސައްކަތް މިއަހަރުގެ ނޮވެމްބަރުމަހު ފަށާނެކަމަށެވެ.
ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމުގައި މި މަޝްރޫޢުގެ ތަފްސީލް ޙިއްސާކުރައްވަމުން، ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވީ، ސަރުކާރުގެ ޢަމާޒަކީ މި މަޝްރޫޢުގެ މަސައްކަތް އަންނަ އަހަރުގެ މެދުތެރެއަށް ނިންމާލެވި، ފަޅުގެ ބޭނުން ބޯޓުފަހަރަށް ހިފޭގޮތްވުންކަމަށެވެ.
މިއުވާން ވިދާޅުވީ މި ފަޅު ތަރައްޤީ ކުރާނީ، މިފަދަ ތަނަކުން ލިބޭނެ ފުރިހަމަ ޚިދުމަތާއެކުކަމަށެވެ. އެގޮތުން އުޅަނދު އަޅާފައި ބޭއްވުމާއި، ތެޔޮ އެޅުމާއި، އުޅަނދު އަޅާފައި އޮންނައިރު ކަރަންޓުގެ ޚިދުމަތާއި، ފެން ލިބޭނެ އިންތިޒާމާއި، ނަރުދަމާއާއި ގުޅުންހުރި ޚިދުމަތް އަދި އުޅަނދުފަހަރުން ފަސޭހައިން ކުނި މެނޭޖްކުރެވޭނެ ނިޒާމެއްވެސް ޤާއިމުކުރާނެކަމަށެވެ.
"އުޅަނދުތަކުގެ ވެރިންގެ ބޮޑު ޝަކުވާއެއް ފަޅުގައި އަޅާފައި އޮންނައިރު، ބޯޓުގެ ޖަނަރޭޓަރުތައް ޖައްސާފައި ބަހައްޓަން ޖެހުން. ނަމަވެސް މި ފަޅުގައި އަޅާ އުޅަނދުތަކަށް، ޖަނަރޭޓަރު ހިންގަން ނުޖެހި ކަރަންޓު ލިބޭނެ އިންތިޒާމު ހުންނާނެ. މިއީ އުޅަނދުތަކުގެ ޚަރަދުވެސް ކުޑަ ކުރެވޭނެ ކަމެއް." މިއުވާން ވިދާޅުވިއެވެ.
މިއީ މިގޮތަށް ރާއްޖޭގައި ތަރައްޤީކުރާ ފުރަތަމަ ބަނދަރަށް ވާނެއެވެ. ސަރުކާރުން އާމާޒު ހިފާފައިވަނީ އަންނަ އަހަރުގެ މެދުތެރެއަށް މި މަސައްކަތް ނިންމާ، ފަޅުގެ ބޭނުން ކުރެވޭނެ އިންތިޒާމް ހަމަޖެއްސުމެވެ.