ރަށްރަށުގައި ހުރި ގިނަ ދުވަސްވީ ކުނި ރަށުން ބޭރުކުރުމަށް ކުރިއަށްގެންދާ މަޝްރޫޢުގެ ދަށުން ވ.ތިނަދޫން މިހާތަނަށް 900 ޓަނުގެ ކުނި ބޭރުކޮށްފިއެވެ.
މިމަސައްކަތްކުރަމުން އަންނަ ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ވިދާޅުވީ ދެބުރަކަށް ބަހާލައިގެން ތިނަދޫގައި ހުރި ހުރިހާ ކުންޏެއް ބޭރުކޮށް ނިންމޭނެކަމަށެވެ.
ވ.ތިނަދޫއަކީ ގިނަ ދުވަސްވީ ބޮޑު ކުނި ފުންޏެއް ހުރި ރަށެކެވެ. އެރަށުގެ ކުނި ފުނީގެ ނުރައްކާތެރި އަލިފާނުގެ ޙާދިސާތައްވެސް ހިނގާފައިވެއެވެ. މިއީ ކައުންސިލާއި ރަށުގެ ރައްޔިތުންނަށް ކުރިމަތިވެފައިވާ ކަންބޮޑުވުމެކެވެ. ޕީއެސްއެމްނިއުސްއަށް މަޢުލޫމާތު ދެއްވަމުން ވ.ތިނަދޫ ކައުންސިލްގެ ރައީސް ޝިފާޤް ހުސެއިން ވިދާޅުވީ އެރަށުން އެންމެ ފަހުން ކުނި ބޭރުކުރިކަމަށްވަނީ މީގެ 25 އަހަރުކުރިން އޭރުގެ އަތޮޅު އޮފީހުގެ ދޯންޏެއްގައިކަމަށެވެ.
އޭގެފަހުން މިވީ ދިގު މުއްދަތުގައި ރަށުން ކުނި ބޭރުކުރާނެ ގޮތެއް އަދި ކުނި ރައްކާތެރިގޮތުގައި މެނޭޖްކުރެވޭނެ ގޮތެއްވެސް ނެތުމުގެ ކަންބޮޑުވުން ކައުންސިލްގެ ރައީސްވަނީ ފާޅުކުރައްވާފައެވެ. ޝިފާޤް ވިދާޅުވީ ރަށްރަށުގައި ހުރި ޒަމާންވީ ކުނިފުނި ރަށުން ބޭރުކުރުމަށް މިހާރު އެންވަޔަރަމަންޓް މިނިސްޓްރީން ވެމްކޯއާއި ޙަވާލުކޮށްފައިވާކަމަށެވެ.
މިދިޔަ އޯގަސްޓް މަހުގެ 17ވަނަ ދުވަހު ތިނަދޫން ކުނި ބޭރުކުރުމުގެ މަސައްކަތްވަނީ ފަށާފައެވެ. ވެމްކޯއިން ވިދާޅުވީ މިތާނަށް 900 ޓަނުގެ ކުނި އެރަށުން ބޭރުކުރެވިފައިވާކަމަށެވެ. އަދި ދެވަނަ ބުރުގައި ކުނި ނެގުމުން ރަށުގައިހުރި ހުރިހާ ކުންޏެއް ބޭރުކޮށް ނިމޭނެކަމަށް ވެމްކޯއިން ވިދާޅުވެއެވެ. ވެމްކޯއިން ލަފާކުރައްވާގޮތުގައި އެރަށުން 1300 ޓަނުގެ ކުނި އެއްކޮށް ބޭރުކުރެވޭނެއެވެ.
ތިނަދޫގެ އިތުރުން ވ.އަތޮޅުގެ އެހެން ހުރިހާ ރަށަކުންވެސް ވެމްކޯއިންވަނީ މިމުއްދަތުގެ ތެރޭގައި ކުނި ބޭރުކޮށްފައެވެ. މީގެ އިތުރުން މާލެއަތޮޅު ގުޅިއާއި ގުރައިދުއާއި މާފުށިންވެސް ކުނިވަނީ ބޭރުކޮށްފައެވެ. ވެމްކޯއިން ވިދާޅުވީ މިދެއަތޮޅުން މިމުއްދަތުގެ ތެރޭގައި ޖުމްލަ 1800 ޓަނުގެ ކުނި މިހާތަނަށް ބޭރުކޮށް ނިމިފައިވާކަމަށެވެ.
ރައްކާތެރިގޮތުގައި ކުނި މެނޭޖްނުކުރެވުމުގެ މައްސަލައަކީ ރާއްޖޭގެ ހުރިހާ ރަށަކަށްވެސް ކުރިމަތިވެފައިވާ ތިމާވެށީގެ ބޮޑު މައްސަލައެކެވެ. މިމައްސަލަ ޙައްލުކުރުމަށް ރައީސުލްޖުމްހުރިއްޔާގެ ސީދާ އިރުޝާދުގެ ދަށުން، ރަށްރަށުގައިހުރި ދުވަސްވީ ކުނިފުނިތައް ރަށުން ބޭރުކުރުމުގެ މަސައްކަތް ވެމްކޯއިން ފަށަފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ. މިހާތަނަށް 17 ވަރަކަށް ރަށުން ނުވަދިހަ ހާސް ޓަނަށްވުރެ ގިނަ ކުނި ބޭރުކޮށްފައިވާކަމަށް ސަރުކާރުން ވިދާޅުވެއެވެ.