އިންޑިއާގެ މަޝްހޫރު ތެލޫގޫ އެކްޓަރު ވިޖޭ ދެވަރަކޮންޑާ ކުޅޭ ފުރަތަމަ ހިންދީ ފިލްމު "ލައިގާ" ގެ ސީކުއަލް އެއް އުފައްދާނެކަމުގެ އިޝާރާތެއް ވިޖޭ ކޮށްފިއެވެ.
މި މަހު 25 ގައި ރިލީޒްކުރަން މިހާރު ތާވަލުކޮށްފައިވާ މި ފިލްމުގެ ޓްރެއިލާވެސް ދައްކާލާފައިވާއިރު ވިޖޭ މިހާރު އެންމެ ބިޒީކޮށް އުޅެނީ މީގެ ޕްރޮމޯޝަންގެ މަސައްކަތުގައެވެ. މި ފިލްމުގެ ސީކުއަލްއެއް އުފައްދާނެކަމަށް ވިޖޭ ބުނި ނަމަވެސް މިކަމާގުޅޭ އިތުރު ތަފްސީލެއް އޭނާ ނުދެއެވެ.
ޕޫރީ ޖަގަންނާދު ޑައިރެކްޓުކޮށް، ޕޫރީ ކަނެކްޓްސްއާއި ގުޅިގެން ދަރްމާ ޕްރޮޑަކްޝަނުން ޕްރޮޑިއުސްކުރި މި ފިލްމުން ވިޖޭއާއެކު ދެން ފެންނާނީ މިހާރު އަރަމުން އަންނަ ތަރި އަނަނިޔާ ޕާންޑޭއެވެ. މީގެ ސިނަމެޓޯގްރާފަރަކަށް ވިޝްނޫ ސަރްމާ މަސައްކަތްކޮށްފައިވާއިރު، ސްޓަންޓް ޑައިރެކްޓަރަކީ ތައިލެންޑްގެ ކެޗާއެވެ.
"އަރުޖުން ރެޑީ" އާއި "ޑިއާ ކޮމްރޭޑް" ފަދަ ކާމިޔާބު ފިލްމުތައް ކުޅުނު ވިޖޭގެ "ލައިގާ" އަކީ ބޮކްސިން އަށް ބިނާކޮށް ހަދާފައިވާ ސްޕޯޓްސް އެކްޝަން ފިލްމެކެވެ.
"ލައިގާ" އަކީ ކަރަންގެ ދަރުމާއާ އެކު އަނަންޔާ މަސައްކަތްކުރި 3 ވަނަ ފިލްމެވެ. އޭނާ ބޮލީވުޑަށް 2019 ގައި ތަޢާރަފުކުރީ އެ ސްޓޫޑިއޯގެ "ސްޓޫޑަންޓް އޮފް ދި އިޔާ 2" އިންނެވެ. އަދި އަނަނިޔާ އަކީ ދަރުމާ އިން މިއަހަރު ފެބްރުއަރީ މަހު ރިލީޒްކުރި ޝަކުން ބަޓްރާގެ "ގޭރިޔާން" ގެ އެއް ބަތަލާއެވެ. މި ފިލްމުގެ ކާސްޓުގައި ދީޕިކާ ޕަދްކޯނާއި ސިދާންތު ޗަތުރަވެދީގެ އިތުރުން ދައިރިއާ ކަރްވާ ހިމެނެއެވެ.
"ލައިގާ" ހިންދީ ބަހުގެ އިތުރުން ތެލެގޫ، ކަންނާޑާ، ތަމަޅަ އަދި މަލަޔާޅަމް ބަހުންވެސް ނެރުމަށް ވަނީ ހަމަޖެހިފައެވެ. ވިޖޭއާއެކު ކަރަންގެ ދަރުމާ އިން ފިލްމެއް ގެނެސްދޭ އިރު، ހުނަރުވެރި އެކްޓަރުގެ 2019 ގެ "ޑިއާ ކޮމްރޭޑް" ގެ ރައިޓްސް ވެސް ކަރަން ވަނީ ހޯދައިފައެވެ. އޭގެ ހިންދީ ރިމެކެއް ދަރުމާ އިން ގެނެސްދޭނެއެވެ.
"ލައިގާ" ގެ ޕޯސްޓަރު ޓްވިޓާގައި ހިއްސާކޮށް ވިޖޭ ބުނެފައި ވަނީ މިއީ ބެލުންތެރިން މޮޔަކޮށްލާނެ ވަރުގެ ފިލްމެއްކަމުގެ ގެރެންޓީދޭ ކަމަށެވެ.