މިހާތަނަށް 19 ރަށެއްގެ ލޭންޑު ޔޫސް ޕްލޭން ފާސްކޮށްފައިވާކަމަށް ލޯކަލް ގަވަރުމަންޓް އޮތޯރިޓީ (އެލްޖީއޭ)ގެ ސީއީއޯ ފާޠިމަތު އަފްޝަން ލަޠީފް ވިދާޅުވެއްޖެއެވެ.
މިހާރު ކުރިއަށްދާ އެމްޑީޕީގެ ކޮންގްރެސްގައި ލާމަރުކަޒީ ނިޒާމާއި ގުޅޭގޮތުން ވާހަކަފުޅު ދައްކަވަމުން އަފްޝަން ވިދާޅުވީ، މީގެކުރިން ކައުންސިލްތަކަށް އޮތް އެންމެ ބޮޑު ދައްޗަކީ ކައުންސިލްގެ އިޚްތިޞާސް ހިނގާ ސަރަހައްދުގެ ލޭންޑު ޔޫސް ޕްލޭންފައިވާ ހުސް ބިންތަކާއި އިޖްތިމަޢީ އަދި އިޤްތިޞާދީ ބޭނުން ފަދަ ކަންކަމަށް ޚާއްޞަކުރެވިފައިވާ ބިންތައް ރައްޔިތުންގެ މަންފާއަށް ބޭނުންކުރުމުގެ ބާރު ނެތުންކަމަށެވެ. ނަމަވެސް ސަރުކާރުން ލާމަރުކަޒީ ޤާނޫނަށް އެންމެ ފަހުން ގެނައި ބަދަލުތަކާއެކު، މަރުކަޒީ ސަރުކާރުގެ ބޭނުންތަކަށް ނަގާފައިވާ ބިންތައް ލޭންޑް ޔޫސް ޕްލޭނުގައި ހިމެނިފައިވާގޮތަށް އިތުރު ހުއްދައެއް ނެގުމަކާއި ނުލައި ރައްޔިތުންނަށް ނަފާ ލިބޭގޮތަށް ބޭނުންކުރުމުގެ ބާރު ޤާނޫނުން މިހާރު ފަހިކޮށްދީފައިވާކަމަށެވެ.
ލާމަރުކަޒީ ޤާނޫނުގެ ދަށުން ލޭންޑް ޔޫސް ޕްލޭން، ހެދުން ކައުންސިލްތަކަށް ލާޒިމްކުރެއެވެ. އެޤާނޫނުގައި ބަޔާންކުރަނީ، ކައުންސިލްތަކުގެ އިންތިޚާބަށްފަހު އިންތިޚާބުކުރެވޭ މެންބަރުން މަޤާމާ ޙަވާލުވުމަށްފަހު 3 މަސްދުވަހުގެ ތެރޭގައި، އަތޮޅު ކައުންސިލުން ފޯރުކޮށްދޭ ފަންނީ އެހީތެރިކަމާއެކު، އެރަށެއްގެ ރަށުގެ ތަރައްޤީގެ ޕްލޭނާއި ލޭންޑް ޔޫސް ޕްލޭން ކޮންމެ ރަށެއްގެ ރަށު ކައުންސިލުން އެކުލަވާލައްވާނެކަމަށެވެ. ނަމަވެސް ކައުންސިލަރުން ހުވައިކުރިތާ އަހަރެއް ފާއިތުވިނަމަވެސް ގިނަ ކައުންސިލްތަކުން ލޭންޑު ޔޫސް ޕްލޭން އެކުލަވާލާފައިނުވެއެވެ.
އެލްޖީއޭގެ ސީއީއޯ އަފްޝަން ވިދާޅުވީ މިހާތަނަށް 68 ރަށެއްގެ ކައުންސިލަކުން ލޭންޑު ޔޫސް ޕްލޭން ހުށައަޅާފައިވާކަމަށާއި، އޭގެ ތެރެއިން 19 ލޭންޑު ޔޫސް ޕްލޭން ފާސްކޮށްފައިވާކަމަށެވެ.
"އެލްޖީއޭގެ ބަޖެޓުގައި ހިމެނިގެން ލޭންޑު ޔޫސް ޕްލޭން ހެދުމަށް ހަވާލުކުރެވުނު ހުރިހާ ރަށެއްގެ ފަންޑްސް މިހަރު ވަނީ އެކައުންސިލަކާ ހަވާލުކުރެވިފައި. ނޫނީ ލޭންޑް ޔޫސްޕްލޭން ހަދާ ފަރާތަކާ ހަވާލުކުރެވި އެ މަސައްކަތް ދަނީ ޝެޑިއުލާ އެއްގޮތަށް ކުރެވެމުން. އަޅުގަނޑުމެންގެ އުއްމީދަކީ ވީހާވެސް އަވަހަކަށް ރަށްރަށުގެ ލޭންޑް ޔޫސް ޕްލޭންތައް ހެދި ރަށްރަށުގެ އިޚްތިޞާސްގެ ތެރޭގައި ހިމެނޭ ބިންތަކުގެ އެންމެ ފުރިހަމަ ނަފާ ރައްޔިތުންނަށް އެންމެ ފައިދާވާނެގޮތަކަށް ކުރެވިގެން ދިއުން." އަފްޝަން ވިދާޅުވިއެވެ.
ރަށްރަށުގެ ތަރައްޤީގެ ކަންކަމާއިވެސް ގުޅިފައިވާ އެންމެ ބޮޑު އެއް ބަޔަކީ ލޭންޑް ޔޫސް ޕްލޭނަށްވާއިރު މިމަސައްކަތްތައް މިހާރުވެސް ލަސްވެފައިވުމަކީ ރަށްރަށުގެ ކައުންސިލްތަކަށްވެސް އޮތް ބޮޑު ގޮންޖެހުމެކެވެ. ނަމަވެސް އެލްޖީއޭއިން މިހާރު މަސައްކަތް ކުރަމުންދަނީ ބޭރުގެ އެކި ފަރާތްތަކުގެ މާލީ އެހީތެރިކަމާއިއެކުގައިވެސް މިމަސައްކަތް ވީހާވެސް އަވަހަކަށް ނިންމުމަށެވެ.
ލާމަރުކަޒީ ގާނޫނުގައިވާ ގޮތުން ކައުންސިލްތަކުން އެކުލަވާލާ ލޭންޑް ޔޫސް ޕްލޭން، ޕްލޭނިން މިނިސްޓްރީއަށް ހުށަހަޅައި ފާސްކުރުމަށްފަހު، އެއަށް އަމަލުކުރަން ފަށާނީ އެ ޕްލޭނަށް އަމަލުކުރުމަށް، ރައްޔިތުންނާއެކު ބާއްވާ ބައްދަލުވުމެއްގައި ފާސްކުރުމުންނެވެ. އަދި މި ޕްލޭނަށް އެއްވެސް ބަދަލެއް ގެންނަ، ކޮންމެ ފަހަރަކުވެސް އެގޮތަށް އަމަލުކުރަން ޖެހޭނެކަމަށް ބުނެފައިވެއެވެ.