ކުރިޔަށް ނިކުންނަށް ހުރި ފިލްމުތަކުގެ ލިސްޓަށް ބަލާލުމުންވެސް އިންޑިއާގައި ކްރިކެޓަށް އޮންނަ ފޯރި އެގިގެންދެއެވެ.
"ޖާޒީ"، "ޝާބާޝް މީތޫ" އަދި "ޗަކްދޭ އެކްސްޕްރެސް" އަކީ ކުރިއަށް ހުރި ކްރިކެޓް ފިލްމުތަކެވެ. މި ލިސްޓަށް އަނެއްކާވެސް އިތުރު ފިލުމެއް އެއްވާން މިވަނީ ތައްޔާރުވެފައެވެ.
މިފަހަރުގެ ފިލްމުގައި ލީޑްރޯލުން ފެންނާނީ އަބީޝޭކް ބައްޗަން، ޝާބާނާ އާޒްމީ އަދި ޝައިޔާމީ ކޭރް އެވެ. މި ފިލްމުގައި އަބީޝެކް ފެނިގެންދާނީ ކްރިކެޓް ކޯޗެއްގެ ގޮތުގައިކަމަށް ހަބަރުތައް ބުނެއެވެ. މިއީ މި ކަހަލަ ރޯލަކުން އަބީޝޭކް ފެންނާނެ ފުރަތަމަ ފަހަރެވެ.
މިދިޔަ އަހަރު ރިލީޒްކުރި "ބޮބް ވިސްވާސް" އިން އެންމެ ފަހުން ފެނުނު އަބީޝެކް މިހާރު ދަނީ އެނާގެ ކާމިޔާބުވި ޓީވީ ސީރީޒްގެ "ބްރެތް:އިން ޓު ދަ ޝެޑޯޒް" ގެ ދެވަނަ ބައިގެ މަސައްކަތް ކުރަމުންނެވެ. އަބީޝެކާއިއެކު ނިތިޔާ މެނަން އަދި އަމިތް ސަދް ވެސް ލީޑްރޯލުން ފެންނަ މި ސީރީޒްގެ ދެވަނަ ބައިގެ މަސައްކަތް ފަށާފައިވަނީ މިދިޔަ އަހަރު އޮކްޓޫބަރުގައެވެ.