ސަންޖޭ ދަތް ލީޑްރޯލުން ފެންނަ ހިއުމަން ސްޕޯޓްސް ޑްރާމާ "ޓޫލްސިޑާސް ޖޫނިއަރ" އަންނަ މަހު ރިލީޒްކުރަން ނިންމައިފިއެވެ. މި ފިލްމުގެ ޑައިރެކްޓަރަކީ މިރުދުލްއެވެ.
އަޝުތޯޝް ގްރޯވިކާ އާއި ބޫޝަން ކުމާރު ޕްރޮޑިއުސްކުރާ މި ފިލްމުގައި ސަންޖޭގެ އިތުރުން ވަރުން ބުދަދޭވް ކިޔާ ކުޑަކުޖަކުވެސް ލީޑްރޯލުން ފެންނާނެއެވެ.
މި ފިލްމުގައި ކުރީގެ މަޝްހޫރު ތަރި ރާޖީވް ކަޕޫރްގެ މުހިއްމު ރޯލެއްވެސް ހިމެނެއެވެ. މިދިޔަ އަހަރުގެ ފެބްރުއަރީ މަހު މަރުވި ރަޖީވްގެ އެންމެ ފަހުން ކުޅުނު ފިލްމަކީވެސް މިއެވެ.
ރާޖީވް ކަޕޫރަކީ ފިލްމު އިންޑަސްޓްރީގައި މަޝްހޫރު ކަޕޫރު އާއިލާގެ އެންމެ ހަގު ދަރިފުޅެވެ. މި ފިލްމުގެ ޚާއްޞަ ސްކްރީނިން އެއް ކަޕޫރު އާއިލާއަށް ވަކިން ވަނީ ދައްކާވެސް ލާފައެވެ. ހާޓް އެޓޭކެއް ޖެހިގެން ރާޖީވް ކަޕޫރު މަރުވީ އުމުރުން 58 އަހަރެވެ.
އަންނަ މަހު ފިލްމު ރިލީޒްކުރަން ހަމަޖެހުމުން ބޮކްސް އޮފީހުގައި މި ފިލްމު ކުރިމަތިލާން ޖެހޭނީ އަމީތާބުގެ ނުކުންނަށް ތައްޔާރުވަމުން އަންނަ "ޖޫންދު" އެވެ.