އަތޮޅުތަކުގެ 14 ރަށެއްގެ ބޯހިޔާވަހިކަމުގެ މަޝްރޫޢުގެ މަސައްކަތް މިވަގުތުވެސް އެކި މަރުހަލާގައި ކުރިއަށްދާ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ. މިނިސްޓަރ ވިދާޅުވީ މިމަޝްރޫޢުތަކުގެ އަގު 1.5 ބިލިއަން ރުފިޔާއަށް އަރާކަމަށެވެ. ހައުސިންގ މިނިސްޓަރ މުޙައްމަދު އަސްލަމް މިހެން ވިދާޅުވީ ސަރުކާރުން ފާދިއްޕޮޅު ނައިފަރުގައި ތަރައްޤީކުރި 100 ހައުސިންގ ޔުނިޓްގެ މަސައްކަތް ނިންމާ، ކައުންސިލާއި ހަވާލުކުރުމަށް ބޭއްވި ރަސްމިއްޔާތުގައެވެ.
ރާއްޖޭގެ ގިނަ ރަށްތަކަށް ކުރިމަތިވަމުން އަންނަ އެންމެ ބޮޑު އިޖުތިމާޢީ މައްސަލައަކީ ބޯހިޔާވަހިކަމުގެ ދަތިކަމުގެ މައްސަލައެވެ. އެއް ގެއެއްގެ ތެރޭގައި އެތައް އާއިލާއެއް ދިރިއުޅެންޖެހޭ ޙާލަތަށް ގިނަ ރަށްތަކެއްވަނީ ގޮސްފައެވެ. ގެވަޅެއް އޮތް ނަމަވެސް މާލީ ދަތިކަމުގެ ސަބަބުން، ގެ އަޅައިގެން އެތަންތަނަށް ބަދަލުވެވޭނެ ގޮތެއް ނެތް އާއިލާތައްވެސް ގިނައެވެ.
ފާދިއްޕޮޅު ނައިފަރުގައި ތަރައްޤީކުރި 100 ހައުސިން ޔުުނިޓްގެ މަސައްކަތް ނިންމާ، އިމާރާތުގެ ތަޅުދަނޑި ނައިފަރު ކައުންސިލާއި ރަމްޒީކޮށް ހަވާލުކޮށްދެއްވީ ހައުސިންގ މިނިސްޓަރ މުޙައްމަދު އަސްލަމްއެވެ. ޅ.ނައިފަރުގައި ސަރުކާރުން ތަރައްޤީކުރި ހައުސިންގ ޔުނިޓްތައް ހަވާލުކުރުމުގެ ރަސްމިއްޔާތުގައި މިނިސްޓަރ އޮފް ނެޝަނަލް ޕްލޭނިން ހައުސިންގ އެންޑް އިންފްރާސްޓްރަކްޗަރ މުޙަމައްދު އަސްލަމް ވިދާޅުވީ އަތޮޅުތަކުގެ ބޯހިޔާވަހިވަހިކަމުގެ މައްސަލައަކީ މިއަދު ދިމާވެގެން އުޅޭ މައްސަލައެއް ނޫންކަމަށެވެ. މިއީ އެތައް އަހަރެއްވީ ބޮޑު މައްސަލައެއްކަމަށެވެ. ނަމަވެސް މި މައްސަލައަށް ޙައްލު ހޯއްދަވައިދެއްވުމަށް އެންމެ ގިނަ މަސައްކަތް ކޮށްދެމުންދާ ސަރުކާރަކީ މި ސަރުކާރުކަމަށް މިނިސްޓަރ އަސްލަމް ވިދާޅުވިއެވެ.
މި މައްސައަށް ޙައްލު ނުލިބި ހުރި ގިނަ ރަށްތަކެއްގައި މަޝްރޫޢުތައް ފަށާ އަދި ފެށުމަށް ތައްޔާރުވަމުންދާ ގިނަ ރަށްތަކެއް ހުރިކަމަށް މިނިސްޓަރ ވިދާޅުވިއެވެ.
"އަތޮޅުތަކުގެ ބޯހިޔާވަހިކަމަށް މާބޮޑު ފަރުވާލެއް އޮތްތަން ކުރިން ފެނިގެނެއް ނުދޭ. ނައިފަރު އެކަންޏެއް ނޫން. ސަރުކާރުގެ ބަޖެޓުން 1.5 ބިލިއަން ރުފިޔާ ޖަހައިގެން، 14 ރަށެއްގެ މިފަދަ އިތުރު މަޝްރޫއު ފެށުމުގެ މަސައްކަތްތައް މިދަނީ ކުރަމުން." މިނިސްޓަރ އަސްލަމް ވިދާޅުވިއެވެ.
އަސްލަމް ވިދާޅުވީ ރަށްރަށުން ގެވަޅު ދޫކޮށް، ގޭގެ އިމާރާތް އެޅޭނެ ތަނަވަސްކަން ނެތް އާއިލާތަކަށް ސަރުކާރުން ދޫކުރަންފެށި "ގެދޮރުވެރިޔާ ލޯން"އަށް އެދި ގިނަ ބަޔަކު ހުށައަޅާފައިވާކަމަށެވެ. އަދި މީގެތެރެއިން ގިނަ ފޯމްތަކުގެ ރިވިއު މަސައްކަތްތައް ނިމި، ސޮއިކޮށް ފައިސާ ދޫކުރުމާއި ހަމައަށް ގޮސްފައިވާކަމަށެވެ. ގެދޮރުވެރިޔާ ލޯނަކީ، އިންޓްރެސްޓް ރޭޓް ކުޑަކޮށް ދޫކުރާ ލޯނެވެ.
"ގެ އަޅަން ގެދޮރުވެރިޔާ ލޯނަށް 297 މީހުން އެދިފައިވޭ. މީގެތެރެއިން 96 މީހެއްގެ ލޯންވަނީ އެޕްރޫވްކޮށްފައި. އަދި 28 މީހުންނަށް ލޯނުގެ ފައިސާ ދޫކުރުމާއި ހަމައަށް މިހާރު މަސައްކަތް ގޮސްފައިވޭ." އަސްލަމް ވިދާޅުވިއެވެ.
މިނިސްޓަރ ވިދާޅުވީ ލޯނުގެ ކަންކަމަށް ފަސޭހަ އިންތިޒާމްތަކެއް ހަމަޖައްސާފައިވާކަމަށެވެ. އެގޮތުން ވެރިފަރާތަށް ލޯނުގައި ސޮއިކުރަން ނާދެވޭ ޙާލަތުގައި "ޕަވަރ އޮފް އެޓަރނީ"އެއް ހަމަޖައްސާ ލޯނުގައި ސޮއިކުރުމުގެ ކަންކަން ކުރިއަށްގެންދެވޭނެކަމަށެވެ.
މިނިސްޓަރ ވަނީ މިހެން ހުރި ފުރުޞަތުތައް ރައްޔިތުންނަށް ޙޯދައިދިނުމުގައި، ކައުންސިލްގެ އެއްބާރުލުމާއި އެހީތެރިކަން ވީހާވެސް ބޮޑަށް ރައްޔިތުންނަށް ފޯރުކޮށްދިނުމަށް އެދިފައެވެ.
ސަރުކާރުން މިމަހުގެ ތެރޭގައިވެސް ވަނީ 8ރަށެއްގައި ހައުސިން މަޝްރޫޢު ހިންގައިދޭނެ ބަޔަކު ހޯދުމަށް އިޢުލާން ކޮށްފައެވެ.
އަދި ނައިފަރުގެ އިތުރުން، އިތުރު 5 ރަށެއްގެ މަސައްކަތް ހަވާލުކޮށް، އެކަމުގެ މަސައްކަތްތައް އެ ރަށްރަށުގައި ދަނީ ކުރިއަށެވެ. މީގެތެރޭގައި ރޯހައުސްއާއި ފްލެޓްތައް ތަރައްޤީކުރުމުގެ ޕްރޮޖެކްޓްތައް