ބައިނަލްއަޤްވާމީ ފެންވަރުގެ އެއަރ ޓްރެފިކް ކޮންޓްރޯލަރުން ތަމްރީންކުރުމުގެ މަސައްކަތް ރާއްޖޭގައި ފުރަތަމަ ފަހަރަށް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ފަށައިފިއެވެ.
އެއަރ ޓްރެފިކް ކޮންޓްރޯލަރުންނަކީ، ވައިގެ ބަނދަރުތަކުގެ ސަރަޙައްދުގެ ފްލައިޓް މޫވްމަންޓްތައް ބަލާ، ޕައިލެޓުންނަށް އިރުޝާދު ދިނުމުގެ މަސައްކަތްތައް ކުރާ ފަރާތެކެވެ. ރާއްޖޭގައި މިވަގުތުވެސް 17 އެއަރޕޯޓަކުން ޚިދުމަތްދެއެވެ. މި ހުރިހާ އެއަރޕޯޓްތަކުގެ އެއަރ ޓްރެފިކް ކޮންޓްރޯލްކުރަނީވެސް އެމްއޭސީއެލްގެ ޓަވަރުތަކުންނެވެ.
ރާއްޖޭގެ އޭޓިސީ ޓަވަރުތައް ބެލެހެއްޓުމަށް އެއަރ ޓްރެފިކް ކޮންޓްރޯލަރުން ތަމްރީންކުރަމުން އައިސްފައިވަނީ ރާއްޖެއިން ބޭރަށް ފޮނުވައިގެންނެވެ. ތަމްރީންތައް ދިިނުމަށް ރާއްޖެއިން ބޭރަށް މީހުން ފޮނުވުމަށް ކޮންމެ އަހަރަކުވެސް މިލިއަނުން އަންނަނީ ޚަރަދުކުރަމުންނެވެ.
ތަމްރީންތައް ދިނުމަށް ކުރާ ޚަރަދު ކުޑަށް، ރާއްޖޭގައި ތިބެގެން ތަމްރީން ދެވޭނެ ވަސީލަތް އެމްއޭސީއެލްއިން ޤާއިމުކޮށް ޚިދުމަތް އިފްތިތާޙްކުރީ މިދިޔަ ޑިސެމްބަރުމަހުގެ ފަހުކޮޅެވެ. ޓްރެއިނިންގ ދިނުމަށް ބައިނަލްއަޤްވާމީ ފެންވަރުގެ ޓްރެއިނިންގތައް ދެވޭ "އޭޓީސީ ޓަވަރ ސިމިއުލޭޓަރ"އެއްވަނީ ބަހައްޓާފައެވެ. މިއީ ރާއްޖޭގެ އެއަރޕޯޓްތަކުގެ ޑީޓެއިލް މެޕްތަކާއި މަންޒަރުތައް ހިމެނޭހެން ހަދާފައިވާ މޮޑެލް ސިމިއުލޭޓަރއެކެވެ.
މި ސިމިއުލޭޓަރ ބޭނުންކޮށްގެން ފަށާ، ފުރަތަމަ ތަމްރީން އެމްއޭސީއެލްއިން މިވަނީ ފަށާފައެވެ. މި ޕްރޮގްރާމަކީ މޯލްޑިވްސް ސިވިލް އޭވިއޭޝަން އޮތޯރިޓީ އަދި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން ބަލައިގަންނަ ކޯހެކެވެ.
މިފަހަރުގެ ތަމްރީން ޕްރޮގްރާމްގައި ބައިވެރިވަނީ މިހާރުވެސް އޭޓިސީ ޓަވަރުގައި މަސައްކަތްކުރާ 8 މުވައްޒަފުންނެވެ. މި ޓެރެއިނިންގ ޕްރޮގްރާމްގައި ތަމްރީން ދޭނީ ބޭރުގެ އިންސްޓްރަކްޓަރަކާއި ދިވެހި ދެ އިންސްތްރަކްޓަރުންނެވެ.
އެއަރ ޓްރެފިކް ކޮންޓްރޯލަރުން ނުލިބުމުގެ ސަބަބުން، އެމްއޭސީއެލްއިން ޢަމަލުކުރަމުން އައީ މުވައްޒަފުން ވަޒީފާއަށް ނެގުމަށްފަހު ތަމްރީންކުރާ އުސޫލުންނެވެ. ތަމްރީންކުރުމަށް ރާއްޖެއިން ބޭރަށް ފޮނުވުމަށް ބޮޑެތި ހޭދަތައް ކުރެއެވެ.
އޭޓީސީ ސިމިއުލޭޓަރާއެކު، ކުރިއަށް އޮތްތާނގައި އާއްމުކޮށް ހުޅުވާލައިގެންވެސް ކޯސްތައް ކުރިއަށްގެންދާނެކަމަށް އެމްއޭސީއެލްއިން ވިދާޅުވެއެވެ.