އަތޮޅުތަކުގެ ތިން ރަށެއްގައި ކޮންޓްރެކްޓަރ ފައިނޭންސްގެ އުސޫލުން އަޅައިދޭނެ ބަޔަކު ހޯދުމަށް އިޢުލާންކޮށްފިއެވެ.
ހޮސްޕިޓަލް ހަދަން އިއުލާންކޮށްފައިވަނީ ހއ.އިހަވަންދޫ، ނ.ކެނދިކުޅުދޫ، ޅ.ހިންނަވަރުގައެވެ. އެ ރަށްރަށުގައި ހޮސްޕިޓަލް ޤާއިމްކުރުމަކީ މިސަރުކާރުގެ ވަޢުދެކެވެ.
ފިނޭންސް މިނިސްޓްރީން ކޮށްފައިވާ އިއުލާންގައި ވަނީ އެ ތިން ޕްރޮޖެކްޓްގެ ބީލަން ހުޅުވުން އޮންނާނީ އަންނަ މަހުގެ 28ވާ ހޯމަ ދުވަހުގެ 13:00ގައި އެ މިނިސްޓްރީގައިކަމަށެވެ. އެ ހޮސްޕިޓަލްތައް ހަަދަން ޝަޢުގުވެރިވާ ދިވެހި ކުންފުނިތަކަށް މި މަޝްރޫއުތަކުގެ ބީލަމުގައި ބައިވެރިވެވެނީ ޕްލޭނިން މިނިސްޓްރީން އެކުލަވާލާފައިވާ "އިމާރާތްކުރުމުގެ ޢަމަލީ މަސައްކަތް ކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ރަޖިސްޓަރީވެ އަދި ވަކި ގުރޭޑްތަކަކަށް ޝަރުތު ހަމަވާ ކުންފުނިތަކަކަށެވެ. ނަމަވެސް ބޭރުގެ ކުންފުންޏަކުން މި މަޝްރޫއުތަކުގެ ބީލަމުގައި ބައިވެރިވާނަމަ ޢިމާރާތްކުރުމުގެ އަމަލީ މަސައްކަތް ކުރާ ފަރާތްތަކުގެ ޤަވާއިދުގައި ރަޖިސްޓްރީ ވާކަށް ނުޖެހެއެވެ.
ތިން ރަށުގައި ހޮސްޕިޓަލް ހަދަން ބިޑް ސެކިއުރިޓީގެ ގޮތުގައި 690،000 ރުފިޔާ ދައްކަންޖެހެއެވެ. ބިޑް ސެކިއުރިޓީ ފައިސާ ދިވެހި ރުފިޔާއިން ނުވަތަ ޔޫއެސް ޑޮލަރުން ދެއްކޭނެ ކަމަށާ، އޭގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަސްކަމަށް އެ އިޢުލާންގައިވެއެވެ.
ހއ. އިހަވަންދޫގައި ހަދާ ހޮސްޕިޓަލަށް ތިން އަހަރުގެ ތެރޭގައި 71.11 މިލިއަން ރުފިޔާ ޚަރަދުވާނެކަމަށް ސަރުކާރުން ލަފާކުރައްވައެވެ. އަދި ކެނދިކުޅުދުއާއި ހިންނަވަރުގައި ހަދާ ހޮސްޕިޓަލްތަކުގެ ތެރެއިން ކޮންމެ ހޮސްޕިޓަލަކަށް 52.11 މިލިއަން ރުފިޔާ 3 އަހަރު ތެރޭ ޚަރަދުވާނެކަމަށް ސަރުކާރުން ވަނީ ލަފާކުރައްވާފައެވެ.
ތިން ހޮސްޕިޓަލެއް ޤާއިމްކުރުމަށް ބަޔަކު ހޯދުމަށް އިއުލާންކޮށްފައިވާއިރު، ސަރުކާރުން މިމަހު ވަނީ ހދ.ކުޅުދުއްފުށި ސިޓީއާއި ގދ.ތިނަދޫގައި ތަރައްޤީކުރުމަށް ހަމަޖެހިފައިވާ ޓަރޝަރީ ހޮސްޕިޓަލްތައް ޑިޒައިންކޮށް ކުރަހާއިދޭނެ ބަޔަކު ހޯދުމަށްވެސް އިއުލާންކޮށްފައެވެ.
ރާއްޖޭގެ 5 ސަރަޙައްދެއްގައި ޓަރޝަރީ ހޮސްޕިޓަލް ތަރައްޤީކުރުމަކީ ރައީސް އިބްރާހީމް މުޙައްމަދު ޞާލިޙުގެ ރިޔާސީ ވަޢުދެކެވެ. ޓާޝަރީ ފެންވަރަށް ތަރައްޤީކުރުމަށް ސަރުކާރުން ނިންމަވާފައިވާ 5 ހޮސްޕިޓަލަކީ ހދ.ކުޅުދުއްފުށީ ރީޖަނަލް ހޮސްޕިޓަލާއި، ރ.އުނގޫފާރު ރީޖަނަލް ހޮސްޕިޓަލާއި ގދ.ތިނަދޫ ޑރ.ޢަބްދުއްސަމަދު މެމޯރިއަލް ހޮސްޕިޓަލާއި ލ.ގަމު ރީޖަނަލް ހޮސްޕިޓަލެވެ. ޓާޝަރީ ހޮސްޕިޓަލްތަކުގެ އިތުރުން އާބާދީ ބޮޑެތި ގިނަ ރަށްތަކެއްގެ ސިއްޙީ މަރުކަޒުތައް ހޮސްޕިޓަލަށް ބަދަލު ކުރުމުގެ މަސައްކަތްވެސް ސަރުކާރުން ދަނީ ކުރަމުންނެވެ.
ޞިއްޙީ ނިޒާމު ލާމަރުކަޒުކޮށް، ރާއްޖޭގެ 60 ރަށެއްގެ ހޮސްޕިޓަލްތަކާއި ޞިއްޙީ މަރުކަޒުތައް ޒަމާނީ ފެންވަރަށް ތަރައްޤީކުރުމަށް މިއަހަރުގެ ބަޖެޓްގައި ކަނޑައަޅާފައިވެއެވެ. ރަށްރަށުގެ ހޮސްޕިޓަލް އަދި ސިއްޙީ މަރުކަޒުތައް ހަދަން ޖާގަ އިތުރުކުރުމަށް 448 މިލިއަން ރުފިޔާ ބަޖެޓްގައި މިއަހަރު ހިމަނާފައިވެއެވެ.