ރާއްޖޭގައި މިހާތަނަށް ހަދާ އެންމެބޮޑު އިންޖީނުގޭގެ މަސައްކަތްތަކަށް ސްޓެލްކޯއިން ތައްޔާރުވާން ފަށައިފިއެވެ. މިއީ 100 މެގަވޮޓް ކަރަންޓު އުފެއްދޭ ކެޕޭސިޓީގެ އިންޖީނުގެއެކެވެ. ސްޓެލްކޯއިން މިހާރުވަނީ މި މަޝްރޫޢުގެ ކޮންސަލްޓެންސް މަސައްކަތް ކޮށްދޭނެ ފަރާތެއް ހޯދުމަށް އިޢުލާންކޮށްފައެވެ.
ސްޓެލްކޯއިން މަޢުލޫމާތުދެއްވާ ގޮތުގައި ހުޅުމާލޭގެ ފުރަތަމަ ފިޔަވަހީގައި ތަރައްޤީކުރުމަށް ނިންމާފައިވާ މި އިންޖީނުގެ ވާނީ 100 މެގަވޮޓުގެ ކަރަންޓު އުފެއްދޭނެ ކެޕޭސިޓީގެ އިންޖީނުގެއަކަށެވެ.
މި މަޝްރޫޢު ކުރިއަށްގެންދާނީ ހުޅުމާލޭގެ ފުރަތަމަ ފިޔަވަހީގައި ސްޓޭލްކޯއިން ތަރައްޤީކުރި "ފިފްތް ޕަވަތް ޕްރޮޖެކްޓް" އިންޖީނުގެއާ، އިންވެގެން އޮތް ބިމުގައެވެ. ފިފްތް ޕަވަރ މަޝްރޫޢަކީ މިހާތަނަށް އެއް އިމާރާތެއްގައި ޚިދުމަތްދޭ އެންމެ ބޮޑު އިންޖީނުގެއެވެ. މި އިންޖީނުގޭގައި 50 މެގަވޮޓްގެ ކަރަންޓު ދެވޭ ކެޕޭސިޓީވަނީ ޤާއިމުކޮށްފައެވެ.
ސްޓެލްކޯއިންދަނީ މާލެ ސަރަޙައްދުގައި އިތުރުވަމުންއަންނަ އާބާދީއަށް ބޭނުންވާ ކަރަންޓު ކެޕޭސިޓީ ޤާއިމުކުރަމުންނެވެ. އެ ކުންފުނިން ވިދާޅުވީ އަލަށް ތަރައްޤީކުރާ 100 މެގަވޮޓްގެ ކެޕޭސިޓީގެ އިންޖީނުގެ ވެގެންދާނީ ހަކަތައިގެ ޚިދުމަތް ދިނުމަށް ރާއްޖޭގައި މިހާތަނަށް ބޭނުންކުރާ އެންމެ ބޮޑު އިންޖީނުގެއަށް ކަމަށެވެ.
ސްޓެލްކޯއިން މިހާރުވަނީ މި މަޝްރޫޢުގެ ކޮންސަލްޓެންސީ މަސައްކަތްތައް ކޮށްދޭނެ ބަޔަކު ހޯދުމަށް އިޢުލާންކޮށްފައެވެ. އެގުތުން އިޢުލާންކޮށްފައިވަނީ ކުންފުނީގެ "ސިކްސްތް ޕަވަރ ޕްރޮޖެކްޓް"ގެ މަސައްކަތުގެ ޓެންޑަރ އަދި އެއްބަސްވުމުގެ ލިޔެކިޔުންތައް ތައްޔާރުކުރުމާއި، ޑިޒައިން ރިވިއުކޮށް ސައިޓް ސުޕަވައިޒްކުރުމަށް، ކޮންސަލްޓެންސީގެ ޚިދުމަތް ދޭނެ ފަރާތެއް ހޯދުމަށެވެ. މި މަސައްކަތަށް ބިޑް ހުށައެޅުން އޮންނާނީ ފެބްރުއަރީ 6ވަނަ ދުވަހުއެވެ.
ސްޓެލްކޯއިން ދަނީ ޒަމާނީ ހަކަތައިގެ ވިއުގައެއް މާލެ ސަރަޙައްދުގައި ޤާއިމުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ފާހަގަކޮށްލެވޭ އެއް މަސައްކަތަކީ ގްރޭޓަރ މާލެ ސަރަޙައްދުގެ ކަރަންޓުގެ ވިއުގަ ގުޅާލުމެވެ. މި މަސައްކަތަށް ބޭނުންވާ 100މެގަވޮޓްގެ އިންޓަރކަނެކްޝަން ކޭބަލް އަޅައި އޭގެ ދަށުން ހުޅުލޭގެ ކަރަންޓުވަނީ އެއް ވިއުގައަކުން ގުޅާލާފައެވެ. ހުޅުލެއަށް ކުރިން ކަރަންޓުދެމުން އައީ، ހުޅުލޭގައި ހުރި ސްޓެލްކޯގެ އިންޖީނުގެއަކުންނެވެ. ނަމަވެސް އިންޓަކަނެކްޝަން ކޭބަލާއެކު، މިހާރު ހުޅުލެއަށް ކަރަންޓު ދެނީ ހުޅުމާލޭގައި ހުރި ފިފްތް ޕަވަރ އިންޖީނުގޭގައި އުފައްދާ ހަކަތައިންނެވެ.
ސްޓެލްކޯއިން މާލެއަށް ކަރަންޓުދިނުމަށް، އިންޖީނުގޭގެ ކެޕޭސިޓީ އިތުރުކުރުމުގެ 4 މަޝްރޫޢެއް މިހާތަނަށް ކުރިއަށް ގެންގޮސްފައި ވެއެވެ. ނަމަވެސް ސްޓެލްކޯގެ މާލޭގެ އިންޖީނުގޭގެ މުޅި ކެޕޭސިޓީވެސް 100 މެގަވޮޓަކަށް ނާރައެވެ.
ސްޓެލްކޯއިން ތައްޔާރުވަމުންދަނީ، މާލޭގެ އިތުރުވަމުން އަންނަ އާބާދީއާއި އަދި ކުރިމަގުގައި ހުޅުމާލޭގެ ދެ ފިޔަވަހީގެ އާބާދީއަށް އަންނާނެ ބޮޑެތި ބަދަލުތަކަށް ބަލައިގެންނެވެ.