ކޯވިޑް ފެތުރެމުންދާތީ އަޅާ ރައްކާތެރިކަމުގެ ފިޔަވަޅެއްގެ ގޮތުން ދާރުލް އާސާރާއި އުތީމު ގަނޑުވަރުގެ ޚިދުމަތް ވަގުތީ ގޮތުން މެދުކަނޑާލައިފިއެވެ. މިއީ ކޯވިޑާ ގުޅިގެން މި ތަންތަނަށް މީހުން ވެއްދުން މެދުކަނޑާލި ދެވަނަ ފަހަރެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވީ މި ފިޔަވަޅަކީ މީހުން އެއްތަނަކަށް އެއްވާ އެއްވުން ވީހާވެސް ކުޑަކޮށް، އާއްމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް އެޅި ފިޔަވަޅެއްކަމަށެވެ.
ދަރުލްއާސާރާ އުތީމު ގަނޑުވަރަކީ، ދިފެހި ސަގާފަތާ އާސާރު ދައްކުވައިދޭ ގިނަ ކަންތައްތަކެއް ފެންނަ ތަންތަނަށް ވުމާއެކު، ދިވެހިންގެ އިތުރުން ފަތުރުވެރިންގެ މެދުގައިވެސް މަޤުބޫލު ތަންތަނެވެ.
މިއީ ކޯވިޑްގެ ޙާލަތާ ގުޅީގެން އުތީމު ގަނޑުވަރާ ދާރުލް އާސާރު ބަންދުކުރި ދެވަނަ ފަހަރެވެ. އެންމެ ފުރަތަމަ ބަންދުކޮށްފައިވަނީ 2020 ވަނަ އަހަރުގެ މަރޗް މަހުން ފެށިގެންގެވެ. އޭގެފަހުން އަލުން ގަނޑުވަރު ދެއްކުމަށް ހުޅުވާލީ އޭގެ 9 މަސްފަހުން، ޙާލަތު ރަނގަޅުވުމުންނެވެ. އޭރުވެސް މީހުން ގަނޑުވަރަށާއި ދާރުލް އާސާރަށް ވައްދަމުން ދިޔައީ، ހުން ބެލުމާއި ސެނެޓައިލްކޮށް ރައްކާތެރިކަމުގެ ފިޔަވަޅުތަކާއެކުއެވެ.
އުތީމު ގަނޑުވަރަށް އަހަރަކު 6000 އަށްވުރެ ގިނަ މީހުން ޒިޔާރަތްކުރެއެވެ. ޚާއްސަކޮށް ބަންދު ދުވަސްތަކާ ދިމާކޮށް ގަނޑުވަރު ބަލާލަންދާ މީހުން ވަރަށް ބޮޑަށް އިތުރެވެ.
ކޯވިޑް 19އާއި ގުޅިގެން، މީހުން އެއްވާ އެއްވުން ކުޑަކުރުމަށް އެޗްޕީއޭއިންވެސް ވަނީ ގިނަ ފިޔަވަޅުތަކެއް އަޅާފައެވެ. އެގޮތުން މާލެ ސަރަޙައްދުގައި އަޅާފައިވާ ފިޔަވަޅުތަކުގެ ތެރޭގައި، އެއްފަހަރާ 50 މީހުންނަށްވުރެ ގިނަ މީހުން އެއްވެގެން ކުރިއަށްގެންދާ ހަރަކާތްތައް ވަނީ މަނާކޮށްފައެވެ. އަދި މަގުމަތީ ބާޒާރުފަދަ ހަރަކާތްތަކާ، ކުޅި ބަލަން ވަދެވޭގޮތަށް ކުޅުވަރި ހަރަކާތްތައްވެސް ވަނީ މަނާކޮށްފައެވެ.
ކޯވިޑް ބަލި އަތޮޅުތަކުގައިވެސް ފެތުރުން ވަނީ އިތުރުވެފައެވެ. މިއާއެކު އަތޮޅުތަކަށް ދަތުރުކުރާ މީހުންވެސް ކޯވިޑަށް ޓެސްޓުކުރުން ވަނީ މަޖުބޫރުކޮށްފައެވެ. ކުރީގެ ޕީކްތަކާ އަޅާ ބަލާއިރު، މިފަހަރުގެ ވޭވްގައި އަތޮޅުތަކުން ގިނަ ބަޔަކު އަންނަނީ ބައްޔަށް ޕޮޒިޓިވްވަމުންނެވެ.