ބައި-އިލެކްޝަންތަކުގެ ކެމްޕެއިން ޙަރަކާތްތައް ކުރިއަށް ގެންދިއުމުގައި އިންތިޚާބުތަކާބެހޭ ޤާނޫނުތަކާއި ޤަވާޢިދުގެ ތެރެއިން، ސުލޫކީ މިންގަނޑާ ޚިލާފު ނުވާ ގޮތުގެމަތިން ކުރިއަށް ގެންދިއުމަށް އިލެކްޝަންސް ކޮމިޝަނުން އިލްތިމާސްކުރައްވައިއެވެ.
އެކޮމިޝަނުން ވިދާޅުވީ ފަހަކަށްއައިސް، ކެމްޕޭނު ޙަރަކާތައް ހިންގުމުގައި އިންތިޚާބަށް ނުރަނގަޅު ނުފޫޒު ފޯރާފާނެފަދަ ކަންކަން ކުރަމުންދާކަމުގެ ޝަކުވާ ނުރަސްމީކޮށް ލިބެމުންދާ ކަމަށެވެ.
ކެމްޕޭނު ޙަރަކާތްތައް ހިންގުމުގައި އެއްވެސް ސިޔާސީ ޕާޓީއަކުން ނުވަތަ އެއްވެސް ކެންޑިޑޭޓެއް ތަމްސީލުކުރާ ފަރާތަކުން، އަނެއް ކެންޑިޑޭޓުގެ އިންތިޚާބީ ޙައްގަކަށް އުނިކަން އަތުވެދާނެ އެއްވެސް ކަމެއް ކުރުމަކީ އިންތިޚާބާބެހޭ ޤާނޫނާއި ޤަވައިދުގައި މަނާ ކަމެކެވެ. އެހެންކަމުން ކެމްޕޭން ޙަރަކާތްތައް ހިންގުމުގައި އެއްވެސް ކެންޑިޑޭޓެއްގެ އިންތިޚާބީ ޙައްޤަކަށް އުނިކަން އަތުވެދާނެކަމެއް ނުކުރުމަށް އިލެކްޝަންސް ކޮމިޝަނުން ހުރިހާ ސިޔާސީ ޕާޓީތަކަށާއި ހުރިހާ ކެންޑިޑޭޓުންނަށާއި ކެންޑިޑޭޓުންނަށް ތާއީދުކުރާ ފަރާތްތަކަށްވަނީ އަންގަވާފައެވެ.
މިފަދަ އެއްވެސް ކަމަކާ ގުޅިގެން އެއްވެސް ޝަކުވާއެއް އޮތްނަމަ، ކަނޑައެޅިފައިވާ އުސޫލުން އިލެކްޝަންސް ކޮމިޝަނަށް ހުށަހަޅަން ވަނީ އަންގަވާފައެވެ.