އައްޑޫސިޓީގެ އިސްމެހެލާހެރަ ރިސޯޓެއްގެ ގޮތުގައި ތަރައްޤީކުރުމަށް ޙަވާލުކުރަން ނިންމަވާފައިވާ ކުންފުނިން މިހާރު އެރަށުގައި ކުރަމުންދާ ސާރވޭ ނިމުމުން އެއްބަސްވުމުގައި ސޮއިކުރެވޭނެކަމަށް ޓުއަރިޒަމް މިނިސްޓްރީން ހާމަކުރައްވައިފިއެވެ. އައްޑު އަތޮޅު މީދޫ ކައިރީގައި އޮންނަ އިސްމެހެލާހެރަ ތަރައްގީ ކުރުމުގެ މަޝްރޫއު ސަރުކާރުން އިފުތިތާހު ކުރީ 28 އެޕްރީލް ދެހާސް ފަނަރައިގައިއެވެ. އިސްމެހެލާހެރައިގަ ތަރައްގީކުރުމަށް ހަމަޖައްސަވާފައިވަނީ 600 އެނދުގެ ރިސޯޓެކެވެ. މި ރަށުގައި ރިސޯޓެއް ތަރައްގީކުރުމަށް ހުޅުވާލި ފުރުސަތުގައި ބޭރުގެ ކުންފުނިތަކާއި ރާއްޖޭގެ ކުންފުންޏަކުންވެސް ޝައުޤުވެރިކަން ފާޅުކޮށްފައިވާކަމަށް ޓުއަރިޒަމް މިނިސްޓްރީން މައުލޫމާތުދެއްވައެވެ.އެގޮތުން އިސްމެހެލާހެރަ ތަރައްްގީކުރުމަށް ދޫކުރުމަށް ނިންމަވާފައިވަނީ ދިވެހި ކުންފުންޏަކަށް ކަމަށްވެސް ޓުއަރިޒަމް މިނިސްޓްރީން ވަނީ ވިދާޅުވެފައިއެވެ. ނަމަވެސް އެއީ ކޮން ކުންފުންޏެއްކަމެއް މިނިސްޓްރީން އަދި ހާމަކޮށްފައެއްނުވެއެވެ. ޓުއަރިޒަމް މިނިސްޓްރީން ވިދާޅުވީ މި ކުންފުންޏާއެކު އެއްބަސްވުމަކަށް އައުމަށް ހަދަންޖެހޭ ލީގަލް ޑޮކިއުމަންޓްތައް ހެދުމުގެ މަސައްކަތް މިހާރު ކުރިއަށްދާކަމުގައިއެވެ. އަދި އެ ލީގަލް ޑޮކިއުމެންޓްތަކަށް ބޭނުންވާ ބައެއް މައުލޫމާތު ހޯދުމަށް މިހާރު އެކުންފުނިން އިސްމެހެލާހެރައިގައި ސާރވޭއެއް ހަދަމުންދާކަމަށްވެސް މިނިސްޓްރީން ވިދާޅުވިއެވެ. އަދި މި ސާރވޭ ހަދާ ނިމޭއިރަށް އެގްރިމެންޓްގައި ސޮއިކުރެވި ރިސޯޓް ހެދުމުގެ އަމަލީ މަސައްކަތްތައް ފެށިގެންެދާނެކަމަށްވެސް ޓުއަރިޒަމް މިނިސްޓްރީން ވިދާޅުވެއެވެ. އިސްމެހެލާހެރަ ތަރައްގީކޮށް ރިސޯޓެއްގެ ގޮތުގައި ހުޅުވުމުން އައްޑޫ ސިޓީގައި އަނެއްކާވެސް ގިނަ ވަޒީފާގެ ފުރުސަތުތަކެއް ހުޅުވިގެންދާނެއެވެ.