ކާޑޭޝިއަން އާއިލާގެ މެމްބަރުންގެ ދިރިއުޅުން ދައްކުވައިދޭ ޝޯ "ކީޕިންގ އަޕް ވިތް ކާޑޭޝިއަން" ގެ 20 ސީޒަނަށްފަހު އެ އާއިލާއިން އަނެއްކާވެސް އައު ޝޯއެއް ފަށަން ތައްޔާރުވެއްޖެއެވެ.
އެމެރިކާގެ މަޝްހޫރު ރިއަލިޓީ ސެލިބްރިޓީން ހިމެނޭ މި ޢާއިލާގެ މި ފަހަރުގެ ޝޯގެ ނަމަކީ "ދަ ކާޑޭޝިއަންސް" އެވެ. އައު އަހަރު ފެށުނު ދުވަހު ޝޯ ގެ ޓީޒަރ އެއްވެސް މިހާރު ވަނީ ދައްކާލާފައެވެ.
އަލަށް ފަށާ މި ޝޯގައިވެސް ބެލުންތެރިން ޝައުޤުވެރިވާ ކަހަލަ ކަންތައްތަކެއް ހިމެނޭނެ ކަމަށް ރިޕޯޓްތައް ބުނެއެވެ. މިގޮތުން ކިމް އާއި ކާންޔޭ ވެސްޓްގެ ވަކިވުމާއި، ކިމް އާއި ޕީޓް ޑޭވިޑްސަންގެ ގުޅުން، ކޯޓްނީ އާއި ޓްރެވިސް ބާކާގެ އެންގޭޖްމެންޓްގެ އިތުރުން ކައިލީ ދެވަނަ ދަރިފުޅަށް ބަލިވެ އިންކަމުގެ ވާހަކަތައްވެސް ޝޯގައި ދައްކާނެކަމަށް މިހާރު ވަނީ އަޑުތައް އަރާފައެވެ.
2020 ވަނަ އަހަރު ކާޑޭޝިއަން އާއިލާއާއި ހުލޫ އާއި ދެމެދު ވެފައިވާ މަލްޓި ޔިއަރ އެއްބަސްވުމެއްގެ ދަށުން ޝޯ ސްޓްރީމް ކުރާނީ ހުލޫ އިންކަމުގައިކަމަށްވެސް މިހާރު ވަނީ ޢިޢުލާނުކޮށްފައެވެ. ނަމަވެސް ސްޓްރީމްކުރާނެ އިރެއް އަދި ހާމައެއް ނުކުރެއެވެ.
ހަ މެމްބަރުން ހިމެނޭ ކަޑޭޝިއަން އާއިލާގެ މެމްބަރުންނަކީ ކިމް ކަޑޭޝިއަން ކައިލީ ޖެނާ ގެ އިތުރުން ކްލޯއީ ކަޑޭޝިއަން އާއި ކޯޓްނީ ކަޑޭޝިއަން އާއި ކެންޑަލް ޖެނާ އަދި ހަމައެކަނި ފިރިހެން ދަރިފުޅު ރޮބް ކަޑޭޝިއަން އެވެ. މި އާއިލާގެ އިސް މީހަކީ މަންމަ ކްރިން ޖެނާ އެވެ.